یوکرینی صدرکا ٹرمپ سےمعافی مانگنے سےانکار

یوکرین کے لئے امریکی فوجی امداد بند، صدر زیلنسکی کے فوری استعفے کا مطالبہ

ویب ڈیسک :یوکرین کے لئے امریکی فوجی امداد بند، صدر زیلنسکی کے فوری استعفے کا مطالبہ کردیا۔

واشنگٹن پوسٹ کے مطابق وائٹ ہاؤس کے سینئر اہلکار کا کہنا ہے ٹرمپ انتظامیہ یوکرین کے تمام فوجی امداد بند کرنے پر غور کررہی ہے۔

 نام نہ بتانے کی شرط پرسینئر حکام نے بتایا ہے کہ معاہدے کے تحت  اس وقت اربوں ڈالر کے ریڈار، گاڑیاں، گولہ بارود، اور میزائل یوکرین کو بھیجے جانے کے منتظر ہیں۔

 ٹرمپ انتظامیہ کی پریس سکریٹری کیرولین لیویٹ نے کہا کہ امریکا اب یوکرین کو فوجی امداد فراہم نہیں کرے گا کیونکہ ان کی ترجیح امن مذاکرات ہیں۔ یہ فیصلہ زیلنسکی کے دورہ امریکا کے دوران ہونے والے تنازعہ کے بعد سامنے آیا ہے۔ لیویٹ نے کہا کہ اب ہم حقیقی، دیرپا امن کے بغیر کسی دور دراز ملک میں جنگ کے لئے بلینک چیک نہیں بھرتے رہیں گے، اس کا مطلب ہے کہ اب امریکا پہلے کی طرح یوکرین کو پیسے نہیں دے گا۔

 دوسری طرف روس سے جنگ میں یوکرین کے  سب سے بڑے حمایتی اور سینٹ کمیٹی برائے خارجہ تعلقات کے سابق سربراہ امریکی سینیٹر لنڈسے گراہم نے یوکرائن کے صدر ولادیمیر زیلنسکی سے استعفے کا مطالبہ کردیا ہے ، انہوںنے  وائٹ ہاؤس میں جمعے کے روز امریکی صدر ڈونلڈ ٹرمپ اور نائب صدر جے ڈی وانس کے ساتھ ملاقات  کو مکمل طور پر تباہی قراردیا ۔

جنوبی کیرولائنا کے سینیٹر نے  میڈیا سے گفتگوکرتے ہوئے کہا ہے کہ "زیلینسکی کو یا تو بنیادی طور پر تبدیل ہونا پڑے گا یا جانا پڑے گا۔" " زیادہ تر امریکی، آج جو کچھ انہوں نے دیکھا اس کے بعد، زیلنسکی کے ساتھ شراکت دار نہیں  بننا چاہیں گے۔"

گراہم، جو پہلے سینیٹ کمیٹی برائے خارجہ تعلقات میں خدمات انجام دے چکے ہیں، کریملن کے خلاف دفاعی جنگ میں کیف کی بھرپور حمایت کے لیے جانے جاتے ہیں۔

ٹرمپ کی زیلنسکی سے تلخ کلامی،یورپ نےیوکرین کی حمایت کردی

ویب ڈیسک: امریکی صدر ڈونالڈ ٹرمپ اور ان کے یوکرینی ہم منصب ولادیمیر زیلنسکی کے درمیان جمعہ کے روز وائٹ ہاؤس میں ہونے والی ملاقات تلخ کلامی میں بدلنے کے بعد یورپی دارلحکومتوں کے مقابلے میں امریکی مؤقف زیادہ مضبوط ہو کر سامنے آیا ہے۔ یورپی ممالک اس بات کے خواہش مند ہیں کہ جنگ کے تصفیے سے متعلق معاہدے میں یوکرین کی سلامتی کو بھی کسی ایسے معاہدے کا حصہ بنایا جائے۔

تفصیلات کے مطابق عوامی سطح پر پیدا ہونے والا یہ بحران اب نیٹو میں شامل یورپی مُمالک اور امریکا کے درمیان پیدا ہونے والے کشیدہ حالات کی جانب اشارہ کر رہا ہے۔

ادھر یورپی یونین کی خارجہ پالیسی کی سربراہ کاجا کلاس نے کہا کہ ہم یوکرین کے ساتھ کھڑے ہیں۔"یوکرین یورپ کے ساتھ ہے۔" دوسری جانب فرانس، جرمنی، فن لینڈ اور نیدرلینڈز سمیت یورپی ملکوں کے عہدیداروں نے سوشل میڈیا پر یوکرین کی حمایت کا اظہار کیا۔

ایوان نمائندگان میں ڈیموکریٹک رہنما حکیم جیفریز نے ایک بیان میں کہا، "صدر زیلنسکی اور یوکرین کے عوام تین سال سے جمہوریت، آزادی اور سچائی کے ساتھ کھڑے ہیں۔ ان کی کامیابی امریکا کی قومی سلامتی کے مفاد میں ہے۔ ہمیں فتح حاصل ہونے تک یوکرین کے ساتھ کھڑا رہنا چاہیے۔"

روس کی قومی سلامتی کونسل کے نائب چیئرمین دمتری میدویدیف نے ایکس پر پوسٹ کیا کہ ٹرمپ درست کہہ رہے ہیں: کیف کی حکومت "تیسری عالمی جنگ کو داؤ پر لگا رہی ہے۔

یوکرین کے"مہمان"کوٹرمپ کا وقت ضائع کرنے پر معافی مانگنی چاہیے،مارکوروبیو

ویب ڈیسک: امریکی وزیر خارجہ مارکو روبیو جو گذشتہ رات وائٹ ہاؤس میں امریکی صدر ڈونلڈ ٹرمپ اور ان کے یوکرینی ہم منصب ولادیمیر زیلنسکی کے درمیان طوفانی ملاقات کے دوران تقریباً ایک گھنٹے تک خاموش بیٹھے رہے، نے اس حوالے سے سخت بیانات جاری کیے ہیں۔

انہوں نے آج ہفتے کے روز اپنے بیانات میں زور دیا کہ یوکرین کے مہمان کو ٹرمپ ٹیم کا وقت ضائع کرنے پر معافی مانگنی چاہیے۔ انہوں نے ملاقات کو زیلنسکی کے لیے تباہ کن ناکامی قرار دیا۔

"وہ دشمن تھا"
انہوں نے اس بات پر زور دیا کہ یوکرینی صدر کی دشمنی کی کوئی وجہ نہیں ہے۔

انہوں نے روسی صدر ولادیمیر پوتین پر زیلنسکی کی تنقید کا حوالہ دیتے ہوئے کہا کہ جب آپ زبردستی بات کرنا شروع کر دیں گے تو آپ لوگوں کو مذاکرات کی میز پر آنے کے لیے قائل نہیں کر پائیں گے۔

مارکو روبیو نے زور دے کر کہا کہ دنیا کا واحد لیڈر جو اس جنگ کو ختم کر سکتا ہے وہ ٹرمپ ہے۔ یوکرین میں جنگ عوامی مطالبات سے نہیں بلکہ سفارت کاری کے ذریعے ختم ہوگی۔

جہاں تک زیلنسکی کے یوکرین میں صدارت سے دستبردار ہونے کا تعلق ہے تو انہوں نے زور دے کر کہا کہ امریکی صدر کے پاس استعفے کا مطالبہ کرنے کا کوئی جواز نہیں ہے۔ انہوں نے مزید کہا کہ جب وہ معاہدہ ختم کرنے کا فیصلہ کریں تو انہیں واپس آنا چاہیے۔

امریکی اور یوکرینی صدور کے درمیان جھگڑے کے پھوٹ پڑنے کے فوراً بعد وائٹ ہاؤس کے ایک اہلکار نے اس سے قبل تصدیق کی تھی کہ زیلنسکی دھاتوں کے سودے میں امریکی سلامتی کی ضمانتوں پر مسلسل اصرار کر رہے تھے۔

اہلکار نے زور دے کر کہا کہ امریکی انتظامیہ نے زیلنسکی پر واضح کر دیا ہے کہ سکیورٹی کی ضمانتیں دونوں ممالک کے درمیان اس اقتصادی معاہدے کا حصہ نہیں ہوں گی۔

جب کہ ٹرمپ نے زور دے کر کہا کہ روس کے ساتھ امن کا فیصلہ کرنے سے پہلے یوکرینی صدر دوبارہ وائٹ ہاؤس نہیں آ سکتے۔

قابل ذکر ہے کہ دونوں صدور کے درمیان دنیا کے سامنے کل ہونے والا بے مثال تنازعہ دونوں صدورکے درمیان ہفتوں کی کشیدگی اور تنقید کے بعد سامنے آیا۔

مارکو روبیو کے مطابق ’جب آپ جارحانہ انداز میں بات کرنا شروع کرتے ہیں اور دوسری جانب صدر ٹرمپ جو کہ ایک ڈیل میکر ہیں جنھوں نے اپنی پوری زندگی ایسے سودے کیے ہیں تو یہ جو کچھ ہوا وہ لوگوں کومذاکرات کی میز پر لانے میں مددگار نہیں۔‘

روبیو نے مزید کہا کہ ’آ پ یہ سمجھنے لگتے ہیں کہ شاید صدر زیلنسکی امن معاہدہ نہیں چاہتے جبکہ ان کا دعویٰ ہے کہ وہ ایسا چاہتے ہیں مگر شاید وہ یہ ثابت نہ کر سکے۔

ٹرمپ،زیلنسکی گرماگرم ملاقات کے بعد امریکی اسٹاک مارکیٹ میں تیزی

ویب ڈیسک: ٹرمپ اور زیلنسکی کی گرما گرم ملاقات کے بعد امریکی اسٹاک ایکسچیج میں تیزی دیکھنے میں آئی ہے۔

تفصٰیلات کے مطابق وال اسٹریٹ میں کاروباری ہفتے کا اختتام مثبت انداز میں ہوا حالانکہ سرمایہ کاروں کو امریکی صدر ڈونلڈ ٹرمپ اور یوکرینی صدر ولادیمیر زیلنسکی کی ہنگامہ خیز ملاقات کے بعد غیر یقینی صورتحال کا سامنا کرنا پڑا۔ 

ماہرین کا کہنا ہے کہ ٹرمپ اور زیلنسکی کی ملاقات کے اثرات اگلے چند دنوں تک مارکیٹ میں محسوس کیے جا سکتے ہیں جبکہ سرمایہ کار عالمی معیشت اور سیاسی استحکام سے متعلق مزید اشاروں کے منتظر ہیں۔ 

زیلنسکی اور وانس کی جھڑپ، ’’مقابلہ تو دل ناتواں نے خوب کیا’’

ویب ڈیسک : تجزیہ کاروں کا کہنا ہے کہ اوول آفس میں ہونے والی دو صدور کی ملاقات جس کا اختتام خوشگوار نہیں تھا میں یوکرینی صدر زیلنسکی کی پرفارمنس اچھی رہی ۔

 ڈیلی میل کی رپورٹ کے مطابق وائٹ ہاؤس حکام نے وضاحت کی ہے کہ یہ صدر زیلنسکی کو ذلیل کرنے کے لئے پہلے سے طے شدہ ٹیگ آپریشن نہیں تھا۔

امریکی صدر ٹرمپ نے اپنی گفتگو کا آغاز خوشگوار انداز میں  زیلنسکی کے غیر رسمی لباس پر ایک تبصرے سے کیا  لیکن 40 سالہ زیلنسکی نے 78 سالہ ٹرمپ کے بڑھتے ہوئے دباؤ کا ہمت سے مقابلہ کیا۔

آپ نے یہ فوجی لباس کیوں پہنا ہوا ہے ... آپ نے وائٹ ہاؤس کے لائق کپڑے کیوں نہیں پہنے؟"۔

اسی طرح زیلنسکی نے ٹرمپ سے کہا کہ "آپ نے میری توہین کے لیے وائٹ ہاؤس میں میرا استقبال کیا ہے"۔

جب دونوں رہنما صحافیوں سے سوالات لینے بیٹھے تو ایک صحافی نے ان سے اشتعال انگیز لہجے میں پوچھا کہ "آپ سرکاری سوٹ کیوں نہیں پہنتے؟ کیا آپ کے پاس نہیں ہے؟ کوئی مہمان غیر رسمی لباس میں ملک کے اعلیٰ ترین مقام پر آتا ہے"۔

زیلنسکی نے جواب دیا کہ جب ان کے ملک میں جنگ ختم ہو جائے گی تو وہ سوٹ پہنیں گے، کیونکہ ان کے پاس پہلے ہی کافی مسائل ہیں۔ تاہم صحافی نے ہار نہیں مانی اور کہا کہ امریکیوں کو بھی مسائل ہیں، لیکن جب وہ اعلیٰ ترین سرکاری مقامات پر آتے ہیں تو وہ سوٹ پہنتے ہیں۔ پھر ٹرمپ لائن میں داخل ہوئے، ہلکی سی مسکراہٹ کے ساتھ دوبارہ کہا کہ ان کے مہمان کا لباس خوبصورت ہے اور وہ اسے پسند کرتے ہیں۔

وائٹ ہاؤس کے ذرائع کا کہنا تھا کہ یوکرین سے نایاب معدنیات کے معاہدے میں برتری حاصل کرنے کے لئے سخت گیر موقف نہیں اپنایا گیا۔

 دوسری طرف ذرائع کا کہنا ہے کہ اوول آفس کے اندر  جو کچھ بھی ہوا  ایسے اشارے مل رہے تھے کہ صدر ٹرمپ اس سے لطف اندوز ہو رہے ہیں۔

صدر زیلنسکی نے نائب صدر کو ان کے پہلے نام سے پکارتے ہوئے سوال کیا 

'جے ڈی، آپ کس قسم کی سفارتکاری کے بارے میں بات کر رہے ہیں،' 

 اس پر وانس نے زیلنسکی کو لیکچر دیا، اور پھر  جواب دیا کہ 'میں اس قسم کی سفارت کاری کے بارے میں بات کر رہا ہوں جو آپ کے ملک کی تباہی کو ختم کرنے والی ہے، مسٹر صدر [زیلینسکی]۔ جناب صدر، احترام کے ساتھ۔ مجھے لگتا ہے کہ امریکی میڈیا کے سامنے اس پر مقدمہ چلانے کی کوشش کے لیے اوول آفس آنا آپ کے لیے بے عزتی ہے،'' وینس نے کہا۔

صدر زیلنسکی نے پھر سوال کیا ' کیا آپ کبھی یوکرین گئے ہیں کہ آپ ہمارے مسائل کو سمجھتے ہیں؟' 

'میں گیا ہوں - میں نے حقیقت میں دیکھا ہے، میں نے کہانیاں دیکھی ہیں، اور میں جانتا ہوں کہ آپ لوگوں کو لانے سے کیا ہوتا ہے۔ آپ انہیں ایک پروپیگنڈا ٹور پر لائیں، مسٹر پریزیڈنٹ،' وینس نے جواب دیا۔

اس کے بعد ٹرمپ اپنے نائب صدر کے دفاع میں  گفتگو میں کود پڑے۔ 'آپ نے بہت بری پوزیشن میں  ہیں اور آپ اچھی پوزیشن میں نہیں ہیں۔ ابھی آپ کے پاس کارڈ نہیں ہیں۔' آپ ہمیں نہ بتائیں کہ ہمیں کیا کرنا چاہیے ... آپ امریکا کے بغیر کمزور ہیں"

'میں تاش نہیں کھیل رہا ہوں،' زیلنسکی نے جواب دیا۔

ٹرمپ نے زیلنسکی کو دو بدو گفتگو میں کچل ڈالا، ماہرین باڈی لینگوئج

ویب ڈیسک : باڈی لینگوئج کے ماہرین  نے امریکی صدر ڈونلڈ ٹرمپ  کو ’’ الفا میل’’ قراردیتے ہوئے کہا ہے کہ انہوں نے اپنے نائب صدر جے ڈی  وینس کے ساتھ مل کر یوکرینی صدر زیلنسکی کو کچل ڈالا۔

رپورٹ کے مطابق باڈی لینگویج کی ماہر جوڈی جیمز نے وائٹ ہاؤس کے اوول آفس میں دو صدور کے مابین لڑی جانے والی لفظی جنگ کو تاریخی قرار دیا ہے  اور کہا ہے کہ امریکی  نائب صدر جے ڈی وینس نے 'ونگ مین' کا کردار ادا کیا۔

 جوڈی جیمز کا کہنا تھا کہ ’’الفا میل ’’ کی فطرت تبدیل نہیں ہوسکتی نہ وہ ہار سکتا ہے ڈونلڈ ٹرمپ نے جے ڈی وینس اور زیلنسکی کے درمیان گفتگو کو سنا اور بالآخر رنگ میں خود کود پڑے۔

انہوں نے مزید کہا کہ ' یہ مناسب ہوسکتا ہےا کہ ایک ونگ مین زبانی تنازعہ میں پڑ جائے لیکن الفا کے لیے نہیں، جسے تبدیل نہیں کیا جا سکتا اور نہ ہی اسے ہارتے ہوئے دیکھا جا سکتا ہے۔

جیمز نے جاری رکھا: 'چنانچہ ٹرمپ نے بہت زیادہ خطرہ مول لیا جب اس نے دو آدمیوں کی جھگڑے کو سنا اور آخر کار خود رنگ میں قدم رکھنے کا فیصلہ کیا۔

انہوں نے بتایا کہ ڈونلڈٹرمپ نے  جھگڑا ختم کرنے کے لئے دونوں ہاتھ اٹھائے  پھر انہوں نے اپنی شہادت کی انگلی اٹھائی جو حتمی اختیار یا ’’ کمانڈنگ ’’اشارہ تھا جس کی عام طور پر اطاعت کی جاتی ہے تاہم اس سے بھی چیخ وپکارختم نہ ہوسکی ۔

 جس کے بعد ڈونلڈ ٹرمپ نے’’ الفا میل’’ کی پوزیشن اختیار کرتے ہوئے جارحانہ انداز میں چیخ کر کہا کہ زیلنسکی تیسری جنگ عظیم پر جوا کھیل رہا ہے ان کا چہرہ سرخ تھا ۔

اور گفتگو کا اختتام ٹی وی اسٹار ٹرمپ نے آنکھ مار کرکیا جس کا مقصد ناظرین کو یہ بتانا تھا کہ سب ٹھیک ہے جبکہ سابق کامیڈین زیلنسکی نے ’’تھمس اپ ’’ کا نشان بنایا

دونوں افراد تناؤ میں تھے اور دفاعی انداز  اختیار کررکھا تھا  جبکہ وہاں بیھٹی امریکا میں یوکرین کی سفیر اوکسانا مارکارووا نے اپنا چہرہ اپنے ہاتھوں میں دفن کر  رکھاتھا۔

زیلنسکی نےاوول آفس میں امریکا کی توہین کی،امن کیلئےواپس آسکتے ہیں:ٹرمپ

ویب ڈیسک:امریکی صدر ڈونلڈ ٹرمپ نے کہاکہ زیلنسکی نے اوول آفس میں امریکا کی توہین کی، جب زیلنسکی امن کیلئے تیار ہوں تو واپس آسکتے ہیں۔

تفصیلات کے مطابق امریکی صدرڈونلڈ ٹرمپ نے یوکرینی صدرسے ملاقات کے بعد ایکس پرپیغام میں کہا کہ یوکرین مذاکراتی عمل میں امریکا کی ضمانت کے بغیر امن کیلئے تیار نہیں،صدرزیلنسکی کو لگتا ہے ہماری شمولیت سے انہیں فائدہ ہوگا۔

ڈونلڈ ٹرمپ کا مزید کہنا تھا کہ میں کسی کا فائدہ نہیں صرف امن چاہتا ہوں۔

ٹرمپ کی یوکرینی صدرسےتلخ کلامی،زیلنسکی کو وائٹ ہاؤس سےچلتا کر دیا

ویب ڈیسک: امریکی صدر ڈونلڈ ٹرمپ اور یوکرینی صدر زیلنسکی کے درمیان تلخ کلامی ہوگئی۔

تفصیلات کے مطابق وائٹ ہاؤس میں ڈونلڈ ٹرمپ اور یوکرین کے صدر کی ملاقات ہوئی، ملاقات کے دوران ڈونلڈ ٹرمپ غصے میں آگئے، ملاقات میں امریکی نائب صدر جے ڈی وینس بھی موجود تھے۔

یوکرینی صدر نے امریکی نائب صدر پر برہمی کا اظہار کرتے ہوئے کہا کہ آپ چیخیں مت، امریکی صدر نے کہا کہ جے ڈی وینس چیخ نہیں رہے بات کر رہے ہیں۔

ڈونلڈ ٹرمپ نے یوکرینی صدر کو جھاڑ دیتے ہوئے کہا کہ آپ تیسری جنگ عظیم پر جوا کھیل رہے ہیں، آپ کی وجہ سے روس کے ساتھ جنگ نہیں رک رہی، آپ کو اپنا رویہ تبدیل کرنا ہوگا۔

زیلنسکی نے مطالبہ کیا کہ معدنیات معاہدے کے ساتھ امریکا کی سکیورٹی گارنٹی چاہتے ہیں، ٹرمپ نے جواب دیا کہ یوکرین کی سکیورٹی کی گارنٹی امریکا کی نہیں یورپ کی ذمہ داری ہے، تلخ کلامی کے بعد مشترکہ نیوز کانفرنس منسوخ کردی گئی۔

دونوں ملکوں کے درمیان معدنیات کے معاہدے پر دستخط کی تقریب بھی منسوخ ہوگئی، گرما گرمی کے بعد یوکرینی صدر وائٹ ہاؤس سے چلے گئے۔