2 سے 4 مارچ تک بارشوں کی پیشگوئی، پی ڈی ایم اے کا الرٹ جاری

(ویب ڈیسک ) ترجمان پی ڈی ایم اے کا کہنا ہے کہ   رمضان المبارک میں 2 سے 4 مارچ کے دوران صوبے کے بیشتر اضلاع میں بارشوں کی پیشگوئی ہے۔

رمضان المبارک اور بارشوں کے سلسلے کی آمد پی ڈی ایم اے پنجاب نے بارشوں بارے الرٹ جاری کردیا  ہے۔ترجمان کا کہنا ہے کہ   رمضان المبارک میں 2 سے 4 مارچ کے دوران صوبے کے بیشتر اضلاع میں بارشوں کی پیشگوئی ہے، مری ، گلیات سمیت دیگر پہاڑی علاقوں میں بارش اور برفباری کی پیشگوئی ہے ۔

ڈی جی پی ڈی ایم اے عرفان علی کاٹھیا  نے کمشنرز و ڈپٹی کمشنر کو الرٹ رہنے کی ہدایت کردی۔ ڈی جی پی ڈی ایم اے کا کہنا ہے کہ  واسا، ریسکیو،محکمہ آبپاشی،لائیو سٹاک اور دیگر متعلقہ محکموں کو الرٹ جاری کردیا گیا ہے ۔ راولپنڈی ،جہلم، اٹک ،چکوال، سرگودھا ،میانوالی ،خوشاب اور منڈی بہاوالدین میں بارشوں کی پیشگوئی ہے۔

ڈی جی پی ڈی ایم اے   کے مطابق لاہور، شیخوپورہ ،حافظ آباد،  گجرانوالہ،گجرات، سیالکوٹ، نارووال، فیصل آباد اور ٹوبہ ٹیک سنگھ میں بھی بارشوں کا امکان ہے ۔ اس کے علاوہ ملتان ڈیرہ غازی خان راجن پور بہاولپور خانیوال لیہ بھکر ساہیوال اور پاکپتن میں بھی بادل برسیں گے ۔

ڈی جی عرفان علی کاٹھیا کا کہنا ہے کہ  شہریوں سے گزارش ہے کہ خراب موسم کی صورتحال میں غیر ضروری سفر سے گریز کریں ۔ پی ڈی ایم اے کنٹرول روم میں صورتحال کی مانیٹرنگ 24/7 جاری ہے۔ شہری خراب موسم کی صورتحال میں غیر ضروری سفر سے گریز کریں ۔ ایمرجنسی صورتحال میں پی ڈی ایم اے ہیلپ لائن 1129 پر کال کریں۔