کراچی (پبلک نیوز) سندھ ہائی کورٹ نے ٹک ٹاک پر پابندی کا فیصلہ واپس لے لیا ہے۔ عدالت نے پاکستان ٹیلی کام اتھارٹی ( پی ٹی اے) کو ٹک ٹاک کی بحالی کا حکم دے دیا۔ تفصیلات کے مطابق سندھ ہائیکورٹ نے فیصلہ پی ٹی اے کی متفرق درخواست پر دیا۔ پی ٹی اے کو ایل جی بی ٹٰی سے متعلق درخواستیں جلد نمٹانے کا حکم دے دیا گیا۔ سندھ ہائیکورٹ نے 28 جون کو ٹک ٹاک معطل کرنے کا حکم دیا تھا۔ پی ٹی اے نے 30 جون کو ٹک ٹاک کو ملک بھر میں بند کر دیا تھا۔ آج پی ٹی اے نے حکم امتناعی واپس لینے کی استدعا کی تھی۔ پی ٹی اے حکام نے بتایا کہ شکایت کنندہ کی درخواست پر 5 جولائی تک فیصلہ کردیں گے۔ عدالت نے حکم دیا کہ پی ٹی اے شکایت کنندہ کی درخواست پر 5 جولائی تک فیصلہ کرے۔ ٹک ٹاک کی جانب سے ہم جنسی پرستی کو فروغ دینے پر درخواست دائر کی گئی تھی۔ عدالت نے سماعت 5 جولائی کے لیے ملتوی کردی۔