سعودی سرکاری خبر رساں ایجنسی کا کہنا ہے کہ انتظامیہ کے سربراہ اعلیٰ شیخ ڈاکٹر عبدالرحمٰن السدیس کے مطابق کعبے کا نیا غلاف یکم محرم کو تبدیل کیا جائے گا۔ عبدالرحمٰن السدیس کے مطابق ایوان شاہی سے یہ ہدایت جاری کی گئی ہیں کہ اس سال غلاف کعبہ 10 ذی الحجہ عید الاضحیٰ کو کلید بردار کعبہ کے سربراہ کے حوالے کیا جائے اور نیا غلاف حوالے ہونے کے بعد یکم محرم الحرام کو تبدیل کر دیا جائے گا۔ واضح رہے کہ کو کسوۃ الکعبہ مطلب کعبے کو ڈھانپنے والا کپڑا 20 جون کو نچلی جگہ سے تین میٹر تک اوپر کر دیا گیا ہے۔ حج سے پہلے احتیاطی تدابیر کے طور پر ہر سال غلاف کعبہ کا حصہ اوپر کر دیا جاتا ہے۔ کرونا کی عالمگیر وبا کے باعث اس تقریب کا اہتمام 2 سال کے وقفے سے کیا گیا ہے۔ دوران تقریب غلاف کعبہ کو اوپر کر کے کعبے کے نچلے حصے کو سفید کپڑے سے ڈھانپ دیا گیا اور اس کام کو کسوہ فیکٹری کے 50 سے زیادہ ماہرین نے سر انجام دیا۔ حرمین شریفین انتظامیہ کے سربراہ ڈاکٹر عبدالرحمٰن السدیس اور دیگر عہدے داروں نے بھی اس اہم کام میں حصہ لیا ہے۔عبد الرحمٰن السدیس نے حجر اسود اور خانہ کعبہ کے دروازے کے نچلے حصے پر عطر بھی لگایا۔ یاد رہے کہ کسوہ کو زمین سے بلند کرنے کا مقصد غلاف کعبہ کی صفائی کو یقینی بنانا ہے۔