(ویب ڈیسک ) اسرائیلی میڈیا رپورٹس کے مطابق اسرائیل ڈیفنس فورس (آئی ڈی ایف) کو فوجیوں کی تعداد میں کمی کا سامنا کرنا پڑرہا ہے۔
آئی ڈی ایف کی جانب سے جاری اعداد و شمار کے مطابق طویل جنگ کے بعد اب غزہ اور لبنان میں جنگ لڑنے کے لیے حامی بھرنے والے ریزرو فوجیوں میں 15 سے 25 فیصد تک کمی آچکی ہے۔
اسرائیلی فوج کا کہنا ہے کہ فوجیوں کی تعداد میں کمی سے جنگ میں آئی ڈی ایف کے آپریشنل فیصلے متاثر ہورہے ہیں۔
میڈیا رپورٹس کے مطابق یہ صورتحال اس وقت سامنے آئی ہے جب اسرائیل میں حکومتی اتحاد قدامت پسند یہودیوں کو فوج میں لازمی سروس سے استثنیٰ دینے کے قانون کی منظوری کے لیے کوششیں کررہا ہے۔
واضح رہے کہ 1سال قبل غزہ میں شروع ہونے والی اسرائیلی جنگ کے آغاز میں فوج میں شامل ہونے کیلئے حامی بھرنے والے ریزرو فوجیوں کی شرح 100 فیصد تھی۔
میڈیا رپورٹس میں بتایا گیا ہے کہ جنگ کے آغاز میں ریزرو فوجیوں کی درکار تعداد پوری ہونے کے باوجود مزید فوجی بھی جنگ میں شامل ہونے کا مطالبہ کررہے تھے اور کچھ ریزرو فوجی بیرون ملک سے صرف جنگ میں شرکت کے لیے اسرائیل واپس آئے تھے۔
تاہم اب 1 سال سے زائد عرصے سے جاری جنگ اور مستقبل قریب میں جنگ کے اختتام کا امکان نہ ہونے کے باعث ریزرو فوجی جنگ میں شامل ہونے سے تکرانے لگے ہیں۔