اسلام آباد: وزیر اعظم سٹریٹیجک ریفارمز یونٹ کے سربراہ سلمان صوفی کی جانب سے حکومتی ادائیگیوں کو ڈیجیٹل بنانے کے لیے عملی اقدامات کا آغاز کردیا گیا ہے۔ تفصیلات کے مطابق وزیر اعظم شہباز شریف کے ڈیجیٹل اکانومی کے وزن کے مطابق عوام کی سہولت کو یقینی بنانے کے لیے وزیر اعظم سٹریٹیجک ریفارمز یونٹ کے سربراہ سلمان صوفی کی جانب سے حکومتی ادائیگیوں کو ڈیجیٹل بنانے کے لیے عملی اقدامات کا آغاز کردیا گیا ہے۔ اس سلسلے میں وزیر داخلہ رانا ثناءاللہ خان کی سربراہی میں ڈائیریکٹوریٹ جنرل امیگریشن اینڈ پاسپورٹ (DGIP) نے کامیابی کے ساتھ ایک ایپ تیار کی ہے جس کے ذریعے پاسپورٹ کی تمام ادائیگیاں آن لائن وصول کی جائیں گی، اور یوں شہریوں کو بینکوں کی لمبی قطاروں سے نجات مل سکے گی۔ وزیر داخلہ نے اس پراجیکٹ کی کامیابی میں کلیدی کردار ادا کیاہے۔اس سلسلے میں ان کی کاوشیں قابل تحسین ہیں۔ ادائیگیوں کا یہ آن لائن سسٹم اس ماہ کے آخر تک کام کرنا شروع کر دے گا۔ پاکستان بھر میں کسی بھی جگہ ڈیبٹ یا کریڈٹ کارڈ کے ذریعے آسانی کے ساتھ گھر بیٹھے پیمنٹ کی جا سکے گی اور شہریوں کو بینک کے چکر نہیں لگانا پڑیں گے۔