مذہبی جماعت کے ملک گیر مظاہرے، اہم شاہراہیں بلاک

مذہبی جماعت کے ملک گیر مظاہرے، اہم شاہراہیں بلاک

اسلام آباد(پبلک نیوز) امیر جماعت سعد حسین رضوی کی گرفتاری کے خلاف تحریک لبیک کے کارکن سڑکوں پر نکل آئے ہیں۔ کارکنوں نے ٹائر جلا کر اور رکاوٹیں کھڑی کر کے سڑکیں بلاک کر دیں۔

کراچی کے مختلف علاقوں میں شدید ٹریفک جام دیکھنے میں آ رہا ہے۔ بلدیہ، اورنگی، ملیر، کورنگی، پاورہاؤس، نارتھ ناظم آباد سمیت مختلف علاقوں میں ٹریفک شدید جام ہے۔ آئی آِی چندریگڑ روڈ، ایم اے جناح روڈ پر بھی ٹریفک جام ہے جس کی وجہ سے شہری شدید پریشانی میں مبتلا ہیں۔

فیصل آباد میں سرگودھا روڈ ، تھانہ جھمرہ چوک، ریلوے پھاٹک جھمرہ، گوجرہ رجانہ چوک سمندری بند ہے۔ پولیس کی بھاری نفری طلب کر لی گئی۔ لاٹھی چارج سے متعدد کارکن زخمی ہو گئے۔ مظاہرین فرانس مردہ باد اور فرانسیسی سفیر کی بیدخلی کے نعرے لگا رہے ہیں۔

گجرات میں بھی کارکنوں نے دھرنا دے دیا ہے۔ دھرنے کے باعث جی ٹی ایس چوک ٹریفک کی روانی مکمل بند ہو چکی ہے۔ سیالکوٹ میں بھی سیکڑوں کارکن سڑکوں پر آگئے۔ سڑکیں بلاک ہونے سے گاڑیوں کی لمبی قطاریں لگ گئیں۔

بھاولپور میں دریائے ستلج پل پر تحریک لیبک کے کارکنوں کا احتجاج جاری ہے۔ ٹائر جلا کر قومی شاہراہ بند کردی گئی۔ تحریک لبیک کے دو اہم کارکن گرفتار کر لیے گئے۔ عاشق فرید امیر احمد پور ایسٹ سے گرفتار جبکہ الهت وسایا کو احمد پور سے حراست میں لیا گیا۔

نیشنل ہائی ویز اور موٹروے پولیس کی جانب سے سامنے آنے والے ٹویٹ میں کہا گیا ہے کہ لاہور، اسلام آباد موٹروے ایم 2 کو بند کر دیا گیا ہے۔ ٹویٹ میں کہا گیا ہے کہ فیض آباد انٹر چینج اور کوٹ عبدالمالک انٹر چینج کو بند کر دیا گیا ہے۔اس ٹویٹ میں مزید کہا گیا کہ ان شاہرائوں کو احتجاج کی وجہ سے بند کیا گیا۔

اس سے قبل تحریک لبیک پاکستان کے سربراہ سعد رضوی کو گرفتار کرلیا گیا۔ تحریک لبیک پاکستان کے رہنما پیر اعجاز اشرفی تصدیق کرتے ہوئے بتایا ہے کہ سعد رضوی کو لاہور سے گرفتار کیا گیا ہے۔ سعد رضوی جامع مسجد رحمت العالمین میں نماز پڑھانے گئے تھے جہاں سے انہیں حراست میں لے لیا گیا ہے۔

شیئر کریں:

شازیہ بشیر

شازیہ بشیر نےلاہور کالج فار ویمن یونیورسٹی سے ایم فل کی ڈگری کر رکھی ہے۔ پبلک نیوز کا حصہ بننے سے قبل 42 نیوز اور سٹی42 میں بطور کانٹینٹ رائٹر کام کر چکی ہیں۔

مزید خبریں

پاکستان