ویب ڈیسک: پاکستان تحریک انصاف نے آج ملک گیر احتجاج کی کال دے رکھی ہے۔ جس کے بعد پہلے پی ٹی آئی کارکنوں کو لبرٹی چوک پہنچنے کا کہا تھا تاہم اب احتجاجی پوائنٹ کو تبدیل کردیا گیا ہے۔
تفصیلات کے مطابق پی ٹی آئی کے سینئر رہنما حماد اظہر نے سماجی رابطوں کی ویب سائٹ ایکس پر ایک ٹوئٹ پوسٹ کی ہے جس میں انہوں نے کارکنوں کے نام پیغام جاری کیا ہے۔
اپنے مختصر پیغام میں انہوں نے لکھا ہے کہ لاہور میں آج کے احتجاج کا پوائنٹ لبرٹی چوک سے تبدیل کرکے جی پی او چوک کردیا گیا ہے۔ انہوں نے کارکنوں کو ہدایت کی ہے کہ سب فورا جی پی او چوک پہنچیں۔
دوسری جانب پاکستان تحریک انصاف کے احتجاج کے معاملے میں انتظامیہ بھی متحرک ہوگئی ہے۔ پولیس کی اینٹی رائٹ فورس کے جوانوں کی نفری جی پی او چوک تعینات کر دی گئی ہے۔اس کے علاوہ جی پی او چوک میں واٹرکینن اور پرزن وین بھی پہنچا دی گئی ہے۔
فیصل آباد میں بھی انتظامیہ متحرک:
پی ٹی آئی کی جانب سے آج ملک گیر احتجاج کی کال دی گئی ہے۔ جس کے بعد پی ٹی آئی مقامی قیادت کی جانب سے سلیمی چوک میں احتجاج کی کال دی گئی۔ اس سےقبل چوک گھنٹہ گھر میں احتجاج کا اعلان کیا گیا تھا۔
سلیمی چوک،چوک گھنٹہ گھر سمیت شہر بھر کے اہم مقامات پر پولیس کی بھاری نفری تعینات کردی گئی ہے۔ پولیس کی جانب سے راستے بند کرنے کیلئے مال بردار گاڑیوں کی پکڑ دھکڑ جاری ہے۔ پولیس نے چوک گھنٹہ گھر سے ملحقہ بازاروں کو مال برداری گاڑیاں لگا کر بند کر دیا۔