ویب ڈیسک: لڑکیوں کے حقوق کے تحفظ پر کام کرنے والی 22 سالہ حدیقہ بشیر ممتاز گلوبل سٹیزن یوتھ لیڈر ایوارڈ سے نوازا گیا ہے۔ حدیقہ یہ اعزاز حاصل کرنے والی پہلی پاکستانی بن گئی ہیں۔
تفصیلات کے مطابق سوات سے تعلق رکھنے والی 22 سالہ کارکن حدیقہ بشیر کو اپنے علاقے میں خواتین کے حقوق کی حمایت اور کم عمری کی شادیوں کا مقابلہ کرنے کے لیے ان کی انتھک کوششوں کی وجہ سے ممتاز گلوبل سٹیزن یوتھ لیڈر ایوارڈ سے نوازا گیا ہے۔
سوات میں سیدو شریف کی رہنے والی، حدیقہ یہ اعزاز حاصل کرنے والی پہلی پاکستانی بن گئی ہیں، جس نے صنفی مساوات اور تعلیم کی وکالت کے طور پر اپنے پہلے سے شاندار کیریئر میں ایک اور قابل ذکر سنگ میل کا اضافہ کیا۔
گرلز یونائیٹڈ فار ہیومن رائٹس‘ کی بانی حدیقہ بشیر نے خود کو وادی سوات میں خواتین اور لڑکیوں کو بااختیار بنانے کے لیے وقف کررکھا ہے جبکہ انہوں نے خاص طور پر کم عمری کی شادیوں کے نقصان دہ رواج کو ختم کرنے پر توجہ مرکوز کی ہے۔
سماجی انصاف اور پائیدار ترقی کے لیے ان کی غیر متزلزل وابستگی کو بین الاقوامی سطح پر پذیرائی ملی ہے۔
گلوبل سٹیزن نے، حدیقہ بشیر کو خراج تحسین پیش کرتے ہوئے، تعلیم پر ان کے یقین کو قبائلی علاقوں میں مثبت تبدیلی کے لیے ایک محرک قرار دیا۔
حدیقہ اس سے پہلے محمد علی ہیومینٹیرین ایوارڈ اور ایشین گرلز ایمبیسیڈر ایوارڈ جیسے اعزازات حاصل کرچکی ہیں۔