امریکی صدر ڈونلڈ ٹرمپ کی سوشل میڈیا کمپنی ٹروتھ سوشل کے شیئرز 13 فیصدبڑھ گئے

بانی پی ٹی آئی کا ٹرمپ کی جیت پر اہم ٹویٹ سامنے آگیا

ویب ڈیسک: بانی پی ٹی آئی عمران خان نے ڈونلڈ ٹرمپ کوامریکی صدارتی انتخابات جیتنے پر مبارکباد دی۔

تفصیلات کےمطابق سابق وزیراعظم عمران خان نے امریکا کا دوبار صدر بننے پر ڈونلڈ ٹرمپ کو مبارک باد دی، سماجی رابطے کی سائٹ ایکس پر پوسٹ شیئر کرتے اپنے پیغام میں لکھا کہ ’امریکی صدارتی انتخابات جیتنے پر میری طرف سے اور پی ٹی آئی کی طرف سے مبارک ہو!

بانی پی ٹی آئی نے لکھا کہ ’ امریکی عوام کی مرضی تمام مشکلات کے خلاف ہے، با نی پی ٹی آئی نے کہا کہ’ٹرمپ جمہوریت اور انسانی حقوق پر مبنی پاک امریکہ تعلقات کے لیے بہتر ہوں گے،
امید ہے ٹرمپ عالمی سطح پر امن، انسانی حقوق اور جمہوریت کے لیے زور دیں گے۔

قبل ازیں پی ٹی آئی رہنما ذلفی بخاری نے سماجی رابطے کی سائٹ ایکس پر ڈونلڈ ٹرمپ اور نائب صدر جے ڈی وانس کو امریکی صدارتی الیکشن میں فتح پر مبارک باد دی،انہوں نے لکھا کہ ’میں عمران خان اور تحریک انصاف کی جانب سے ٹرمپ اور جے ڈی وانس کو تاریخی فتح اور کم بیک پر مبارک باد پیش کرتا ہوں‘۔

ٹرمپ کو یہ عظیم فتح بڑی مشکلات اور رکاوٹوں کے بعد حاصل ہوئی تاہم یہ فتح حقیقی تبدیلی اور معاشی استحکام کیلیے واضح پیغام ہے،اس سے باقی سب (ممالک) کو بھی امید ملتی ہے۔

ذلفی بخاری نے لکھا کہ ’یہ کامیابی مستقبل کی امیدوں کے لئے ایک نوید کی حیثیت رکھتی ہے، امید ہے کہ اس کے بعد اب دنیا کے مسائل مستقل حل کی طرف جائیں گے۔

انہوں نے غزہ تنازع کا تذکرہ کرتے ہوئے امید ظاہر کی کہ ٹرمپ کی فتح کے بعد فلسطینیوں پر جاری بربریت ختم ہوگی اور اس تنازع کا بھی دیرپا حل نکلے گا۔

امریکی صدارتی الیکشن میں ٹرمپ کی کامیابی کے بعد حماس کا پہلا ردعمل سامنے آگیا

(ویب ڈیسک )  امریکی صدارتی الیکشن میں ڈونلڈ ٹرمپ کی کامیابی کے بعد فلسطینی مزاحمتی تنظیم حماس کا پہلا ردعمل سامنے آگیا ہے۔

حماس رہنما سمی ابوذوہری نے امریکی صدارتی انتخابات میں  ڈونلڈ ٹرمپ کے کامیاب ہونےپر ردعمل دیتے ہوئے  کہا کہ ٹرمپ کو ان کے بیانات کے حساب سے جانچا جائیگا کیونکہ انہوں نے کہا تھا وہ بطور امریکی صدر غزہ جنگ کو چند گھنٹوں میں روکیں گے۔ 

حماس پولیٹیکل بیورو کے ممبر باسم نعیم نے کہا کہ صیہونی ریاست کی اندھی حمایت ختم ہونی چاہیے کیونکہ یہ حمایت ہمارے لوگوں کے مستقبل اور خطے کے کی قیمت پر آتی ہے۔ 

خیال رہے کہ  ڈونلڈ ٹرمپ نے  اپنی انتخابی مہم کے دوران یہ کہتے رہے ہیں کہ  وہ مشرق وسطیٰ کو حقیقی اور پائیدار  امن کی طرف لوٹتے دیکھنا چاہتےہیں ۔

دوسری مرتبہ صدارتی الیکشن جیتنے کے بعد اپنے پہلے خطاب میں منتخب امریکی صدر ڈونلڈ ٹرمپ نے کہا کہ وہ نئی جنگیں شروع کرنے کے بجائےجنگوں کو ختم کریں گے۔

ٹرمپ کے دوبارہ صدر بننے پر چین سے اہم پیغام آگیا

ویب ڈیسک: چین نے نومنتخب امریکی صدر ڈونلڈ ٹرمپ کو ایک بار پھر صدارت کا منصب سنبھالنے پر مبارک باد دے دی،چینی وزارتِ خارجہ کے ترجمان کا کہنا ہے کہ چین باہمی احترام کی بنیاد پر امریکا کے ساتھ کام جاری رکھے گا۔

تفصیلات کےمطابق چین کی وزارتِ خارجہ کا کہنا ہے کہ امریکا کے لیے چین کی پالیسی میں کوئی تبدیلی نہیں ہے، امریکی عوام کے انتخاب کا احترام کرتے ہیں۔

واضح رہے کہ امریکی صدارتی انتخابات میں ڈونلڈ ٹرمپ کامیاب ہو گئے ہیں، وہ امریکا کے 47 ویں صدر منتخب ہوئے ہیں۔

ڈونلڈ ٹرمپ دوسری مرتبہ امریکا کے صدر منتخب ہوئے ہیں۔

امریکی صدارتی انتخاب میں 538 میں سے ریپبلکن امیدوار ڈونلڈ ٹرمپ نے 277 اور ڈیموکریٹ امیدوار کملا ہیرس نے 226 الیکٹورل ووٹ حاصل کیے ہیں۔

کسی بھی امیدوار کو جیت کے لیے کل 538 میں سے کم از کم 270 الیکٹورل ووٹ درکار ہوتے ہیں۔

ٹرمپ کی کامیابی کےبعد عالمی منڈی میں سونےاور خام تیل کی قیمتوں میں کمی

ویب ڈیسک: امریکی صدارتی انتخابات میں ڈونلڈ ٹرمپ کی کامیابی کے بعد عالمی منڈی میں سونے اور خام تیل کی قیمتوں میں کمی واقع ہوئی ہے۔

غیر ملکی میڈیا کے مطابق، سونے کا بھاؤ 18 ڈالر کم ہو کر 2731 ڈالر فی اونس ہو گیا ہے۔ اسی طرح، عالمی منڈی میں خام تیل کی فی بیرل قیمت 1.17 ڈالر کم ہو کر 70.82 ڈالر ہوگئی ہے۔

میڈیا کی رپورٹس میں یہ بھی بتایا گیا ہے کہ ڈاؤ جونز انڈیکس 1114 پوائنٹس کے اضافے سے 46495 پر پہنچ گیا ہے۔

یہ بات قابل ذکر ہے کہ ڈونلڈ ٹرمپ نے امریکی صدارتی انتخابات میں کامیابی حاصل کی ہے اور وہ امریکا کے 47 ویں صدر منتخب ہوئے ہیں، اور اب وہ دوسری مرتبہ عہدۂ صدارت پر فائز ہوں گے۔

ٹرمپ کی جیت پر کرپٹو مارکیٹ میں طوفان، بٹ کوائن نے اپنے گزشتہ ریکارڈ توڑ ڈالے

(ویب ڈیسک )علی رضا:  ٹرمپ کی جیت پرکرپٹو مارکیٹ میں طوفان سا آگیا ہے۔ بٹ کوائن نے اپنے گزشتہ ریکارڈ توڑ ڈالے ہیں ،75 ہزار ڈالر  کی حد پار کرلی ہے۔

بٹ کوائن سرمایہ کار مانتے ہیں کہ ٹرمپ کی پالیسیاں کرپٹو کرنسی مارکیٹ کے لیے موافق ہیں۔ ان کی سوچ ہے کہ ٹرمپ کے اقتدار میں آنے کی حالت میں بٹ کوائن کی قیمتوں میں اور زیادہ اُچھال آئے گا۔

ڈونالڈ ٹرمپ اپنے انتخابی جلسہ میں بھی کئی مرتبہ امریکا کو کرپٹو کیپٹل بنانے کی بات کہہ چکے ہیں۔ اس کے سہارے انہوں نے کرپٹو کرنسی سرمایہ کاروں، خاص کر نوجوانوں کو اپنی طرف راغب کرنے کی کوشش کی ہے۔

 ٹرمپ کے ساتھ ان کے حمایتی اور ٹیسلا کے مالک ایلن مسک بھی کرپٹو کرنسی کو کافی پسند کرتے ہیں۔ امریکہ میں کرپٹو کرنسی میں سرمایہ کرنے والوں کی تعداد کُل آبادی کا تقریباً 16 فیصد ہے، جو ظاہری طور پر انتخابی نتائج پر بڑے اثرات مرتب کرنے کی طاقت رکھتے ہیں۔

سی این بی سی ڈاٹ کام سے بات چیت میں بٹ وائز ایسٹ مینجمنٹ کے ریسرچ ہیڈ ریان راسموسین نے کہا کہ انتخاب کا کرپٹو پر بہت بڑا اثر پڑ رہا ہے۔ انہوں نے کہا کہ انتخابی نتیجہ کی پرواہ کیے بغیر بٹ کوائن کی قیمت بڑھنے کا امکان ہے۔

امریکی انتخابات کو لے کر خدشات ہیں۔ اس کا اثر نہ صرف بٹ کوائن پر پڑا ہے بلکہ اس سے جڑے بازاروں پر بھی اس کا اثر دیکھنے کو ملا ہے۔ مثال کے طور پر ایکسچینج آپریٹر کوائن بیس نے آفٹر آورس ٹریڈنگ میں 3 فیصد کا اضافہ دیکھا، جبکہ ایک دیگر اہم پلیئر مائیکرواسٹریٹجی نے 4 فیصد کی اچھال پائی۔ یہ اُتار چڑھاؤ انتخاب کے نتیجوں کے تئیں براڈر مارکیٹ کی حساسیت اور کرپٹو کرنسی سیکٹر پر اس کے ممکنہ اثرات کو ظاہر کرتا ہے۔

عمران خان کی جانب سے منتخب امریکی صدر ڈونلڈ ٹرمپ کو جیت کی مبارکباد

(ویب ڈیسک ) بانی پی ٹی آئی  عمران خان کی جانب سے  نو منتخب امریکی صدر ڈونلڈ ٹرمپ کو جیت کی مبارکباد دی  گئی ہے۔

سماجی رابطے کی ویب سائٹ ایکس پر  پی ٹی آئی رہنما زلفی بخاری نے   عمران خان کی جانب سے  نو منتخب امریکی صدر ڈونلڈ ٹرمپ کو جیت کی مبارکباد دی۔

انہوں نے کہا کہ  عمران خان اور پی ٹی آئی کی جانب سے منتخب صدر ڈونلڈ ٹرمپ اور نائب صدر جے ڈی وینس کو مبارکباد۔انہوں نے متعدد چیلنجز  کے باوجود شاندار واپسی  کرکے فتح حاصل کی۔

زلفی بخاری نے کہا کہ   ہمیں امید ہے کہ اس نئے باب میں عالمی مسائل کے حل کے لیے فیصلہ کن اقدامات دیکھنے کو ملیں گے، خاص طور پر غزہ کے تنازع کو ختم کرنے کے لیے۔انہوں نے کہا کہ  جمہوریت کو غالب دیکھ کر ہم میں سے باقی لوگوں کو امید ملتی ہے۔

ادھر اپوزیشن لیڈر عمر ایوب خان نے  ڈونلڈ ٹرمپ کو امریکی صدارتی انتخاب جیتنے پر مبارکباد دی اور کہا کہ  منتخب صدر ڈونلڈ ٹرمپ اور نائب صدر منتخب جے ڈی وینس کو امریکا کا الیکشن جیتنے پر مبارکباد دیتے ہیں ۔امید ہے کہ یہ ٹیم پاکستانی اور امریکی عوام کے درمیان بہتر تعلقات کو فروغ دے گی۔

سینیٹ میں قائد حزب اختلاف سینیٹر سید شبلی فراز  نے  امریکی نو منتخب صدر ڈونلڈ ٹرمپ کو مبارکباد  دی ہے۔شبلی فراز نے کہا کہ  امریکی عوام نے اپنے ملک کی بہتری کےلئے فیصلہ کیا ۔ امریکہ کی عوام نے جس کو مینڈیٹ دیا اس کی قدر کرتے ہیں ۔

انہوں نے کہا کہ  امید ہے نو منتخب صدر ڈونلڈ ٹرمپ خطے و عالمی امن کےلئے کام کریں گے ۔ڈونلڈ ٹرمپ نے واضح برتری کے ساتھ انتخابات جیتے ،امریکہ کے انتخابات دنیا کےلئے اہم ہوتے ہیں ۔امریکا کی پہلی ترجیح اپنا ملک ہوتا ہے ۔امریکی پہلے کوشش کرتے ہیں کہ وہ اپنے ملک کو کیسے طاقتور اور بہتر بنائیں۔

شہبازشریف اور بلاول بھٹو سمیت عالمی رہنماؤں کی ڈونلڈ ٹرمپ کو مبارکباد

ویب ڈیسک: ڈونلڈ ٹرمپ کے فتح کے دعویٰ کے بعد سوشل میڈیا پر دنیا بھر کے رہنماؤں کی جانب سے مبارکباد کے پیغامات پوسٹ کیے جا رہے ہیں۔

بدھ کے روز سماجی رابطے کی ویب سائٹ ایکس (سابق ٹوئٹر) پر پاکستان کے وزیراعظم شہباز شریف نے اپنے پیغام میں ڈونلڈ ٹرمپ کو مبارکباد دی۔

شہباز شریف نے اپنی پوسٹ میں لکھا ’نو منتخب صدر ڈونلڈ ٹرمپ کو دوسری مدت کے لیے ان کی تاریخی فتح پر مبارکباد! میں پاکستان اور امریکہ کے تعلقات کو مزید مضبوط اور وسیع کرنے کے لیے آنے والی انتظامیہ کے ساتھ مل کر کام کرنے کا منتظر ہوں۔‘

پاکستان پیپلز پارٹی کے چیئرمین بلاول بھٹو زرداری نے بھی ایکس پر ڈونلڈ ٹرمپ کے لیے پیغام جاری کرتے ہوئے لکھا ’ڈونلڈ ٹرمپ کو صدارتی الیکشن میں تاریخی کم بیک پر مبارکباد۔ امریکی لوگوں نے ڈونلڈ ٹرمپ اور ان کی ٹیم جے ڈی وینس، ایلون مسک، رابرٹ کینیڈی جونیئر، تلسی گبارڈ کو شاندار کامیابی دی ہے۔‘

بلاول بھٹو نے اپنی پوسٹ میں مزید لکھا ’یہ جنگ مخالف بیانیے کی فتح ہے اور جنگ مخالف بیانیے کا مینڈیٹ ہے۔ ہمیں امید ہے کہ نئی انتظامیہ امن کو ترجیح دے گی اور عالمی تنازعات کو ختم کرنے میں مدد کرے گی۔‘ 

وزیر اعلیٰ پنجاب مریم نواز شریف نے بھی ڈونلڈ ٹرمپ کو صدرانتخاب جیتنے پر مبارکباد پیش کی ہے۔ اپنے بیان میں انہوں نے کہا ہے کہ امریکا کا صدارتی انتخابات جیتنے پر ڈونلڈ ٹرمپ اور امریکی قوم کو مبارکباد۔

امیر قطر نے بھی ڈونلڈ ٹرمپ کو مبارکباد دیتے ہوئے لکھا ’نومنتخب صدر ڈونلڈ ٹرمپ کو امریکی صدارتی انتخاب جیتنے پر مبارکباد۔ میں آپ کی مدت کے دوران آپ سب کے لیے نیک خواہشات کا اظہار کرتا ہوں اور اپنے سٹریٹجک تعلقات اور شراکت داری کو مضبوط بنانے، خطے اور عالمی سطح پر سلامتی اور استحکام کو فروغ دینے کے لیے ہماری مشترکہ کوششوں کو آگے بڑھانے کے لیے دوبارہ مل کر کام کرنے کا منتظر ہوں‘۔

ترکیہ کے صدر رجب طیب ایردوان نے ری پبلکن پارٹی کے امیدوار ڈونلڈ ٹرمپ کو مبارک باد دی ہے۔

سوشل میڈیا پر ایک بیان میں رجب طیب ایردوان کا کہنا تھا کہ ’’میں اپنے دوست ڈونلڈ ٹرمپ کو دوبارہ امریکہ کا صدر منتخب ہونے پر مبارک باد پیش کرتا ہوں۔‘‘

انہوں نے امید ظاہر کے نئے دور میں امریکا اور ترکیہ کے تعلقات مضبوط ہوں گے۔

فرانس کے صدر نے بھی اپنی ایکس پوسٹ میں ڈونلڈ ٹرمپ کو مبارکباد دی اور لکھا ’صدر ڈونلڈ ٹرمپ کو مبارکباد۔ آپ کے اور میرے یقین، احترام اور عزائم کے ساتھ مزید امن اور خوشحالی کے لیے ایک ساتھ کام کرنے کے لیے تیار ہیں، جیسا کہ ہم چار سالوں سے کرتے آئے ہیں۔‘

انڈیا کے وزیراعظم نریندر مودی نے اپنی پوسٹ میں لکھا ’آپ کی تاریخی انتخابی جیت پر دل کی گہرائیوں سے مبارک ہو میرے دوست ڈونلڈ ٹرمپ۔ جیسا کہ آپ اپنی پچھلی مدت کی کامیابیوں کو آگے بڑھا رہے ہیں، میں انڈیا اور امریکہ کی جامع عالمی اور سٹریٹجک پارٹنرشپ کو مزید مضبوط بنانے کے لیے اپنے تعاون کی تجدید کا منتظر ہوں۔ آئیے مل کر اپنے لوگوں کی بہتری اور عالمی امن، استحکام اور خوشحالی کو فروغ دینے کے لیے کام کریں۔‘

اسرائیلی وزیراعظم بینجامن نیتن یاہو نے بھی ٹرمپ کو مبارکباد دی اور لکھا ’پیارے ڈونلڈ اور میلانیا ٹرمپ، تاریخ کی سب سے بڑی واپسی پر مبارکباد۔  وائٹ ہاؤس میں آپ کی تاریخی واپسی امریکہ کے لیے ایک نئی شروعات اور اسرائیل اور امریکہ کے درمیان عظیم اتحاد کے لیے ایک مضبوط عزم ظاہر کرتی ہے۔ یہ ایک بہت بڑی فتح ہے۔‘

خادم حرمین شریفین شاہ سلمان بن عبد العزیز اور ولی عہد شہزادہ محمد بن سلمان نے  ڈونلڈ ٹرمپ کو صدارتی انتخاب جیتنے پر مبارکباد پیش کی ہے۔
سعودی پریس ایجنسی کے مطابق سعودی قیادت نے نومنتخب امریکی صدر کو تہنیتی مکتوب روانہ کئے ہیں۔
سعودی قیادت نے نومنتخب امریکی صدر ڈونلڈ ٹرمپ کے لیے کامیابی کی امید ظاہر کی ہے۔
سعودی قیادت نے امریکی عوام کے لیے نیک جذبات کا اظہار کرتے ہوئے ملک کے لیے مزید ترقی کی امید کا اظہار کیا ہے۔
سعود قیادت نے اپنے پیغام میں سعودی عرب اور امریکہ کے درمیان تاریخی برادرانہ تعلقات کو سراہتے ہیں مختلف شعبوں میں اسے وسعت دینے کی خواہش کا اظہار کیا ہے۔

یوکرائنی صدر زیلنسکی نے انتخابات میں شاندار فتح پر صدر ڈونلڈ ٹرمپ کو مبارکبا د دیتے ہوئے کہا ہے کہ @realDonaldTrump کو ان کی شاندار انتخابی جیت پر مبارکباد! ستمبر میں صدر ٹرمپ کے ساتھ ہماری شاندار ملاقات یاد ہے، جب ہم نے یوکرین-امریکا پر تفصیل سے بات کی تھی۔ اسٹریٹجک شراکت داری، فتح کا منصوبہ، اور یوکرین کے خلاف روسی جارحیت کو ختم کرنے کے طریقے۔

انہوں نے مزید کہا، "میں عالمی معاملات میں "طاقت کے ذریعے امن" کے نقطہ نظر کے لیے صدر ٹرمپ کے عزم کی تعریف کرتا ہوں۔ یہ بالکل وہی اصول ہے جو عملی طور پر یوکرین میں امن کو قریب لا سکتا ہے۔ مجھے امید ہے کہ ہم مل کر اسے عملی جامہ پہنائیں گے۔‘‘
 اٹلی کی وزیراعظم جارجیا میلونی نے بھی صدر ڈونلڈ ٹرمپ کو اپنی مبارک بادی ٹویٹ میں کہا ہے کہ 

میری اور اطالوی حکومت کی طرف سے، امریکہ کے منتخب صدر ڈونلڈ ٹرمپ کو مخلصانہ مبارکباد۔ اٹلی اور امریکہ "بہن"  اقوام ہیں، جو ایک غیر متزلزل اتحاد، مشترکہ اقدار اور تاریخی دوستی سے جڑے ہوئے ہیں۔ جس کو مجھے یقین ہے کہ اب ہم مزید مضبوط کریں گے۔ 

برطانوی وزیر اعظم کیئر سٹارمر نے ٹرمپ کو ان کی "تاریخی انتخابی فتح" پر مبارکباد دی اور کہا کہ برطانیہ اور امریکہ کے خصوصی تعلقات "خوشحالی کی طرف گامزن" رہیں گے۔

"منتخب صدر ٹرمپ کو آپ کی تاریخی انتخابی کامیابی پر مبارکباد۔ میں آپ کے ساتھ آنے والے سالوں میں کام کرنے کا منتظر ہوں۔ اتحادیوں کے قریب ترین ہونے کے ناطے، ہم آزادی، جمہوریت اور انٹرپرائز کی اپنی مشترکہ اقدار کے دفاع میں کندھے سے کندھا ملا کر کھڑے ہیں۔

امریکی انتخابات میں مداخلت: روسی سفارتخانے نے الزامات کی تردید کردی

ویب ڈیسک: امریکا میں روس کے سفارت خانے نے امریکی صدارتی انتخابات میں ماسکو کی مداخلت کے الزامات کی تردید کی ہے جب  امریکی حکام  نے دعوی کیا ہے کہ پولنگ سٹیشنوں  پر بم کی افواہ  روس  سے جنریٹ کی گئی تھی۔

ایف بی آئی نے تصدیق کی ہے کہ کئی امریکی ریاستوں میں پولنگ  اسٹیشنز پر بم  کی افواہیں ممکنہ طور پر روسی ای میل ڈومینز سے  جنریٹ کی گئی ہیں ۔ ایف بی آئی  کے مطابق ان  دھمکیوں کے باعث پولنگ کے متعدد مقامات کو عارضی طور پر بند کرنے پر مجبور کیا۔

واشنگٹن میں روسی سفارت خانے نے کہا ہے کہ امریکی الزامات ’بے ہودہ اور بے بنیاد‘ ہیں۔

سفارت خانے نے سرکاری خبر رساں ایجنسی RIA نووستی کے ذریعے  رپورٹ کئے گئے ریمارکس میں کہا گیا ہے کہ  "روسی سازشوں کے بارے میں تمام تر تہمتیں بدنیتی پر مبنی بہتان ہیں، جو امریکہ کی  داخلی سیاسی جدوجہد  میں استعمال کرنے کے لئے ایجاد کی گئیں ۔

سفارت خانے نے کہا کہ اسے "امریکی حکام کے ساتھ اپنے رابطوں میں کوئی ثبوت نہیں ملا یا یہاں تک کہ پریس میں اس کہانی کو فروغ دینے کے حوالے سے کوئی درخواست بھی نہیں ملی۔

روس کے صدارتی پریس سیکرٹری دمتری پیسکوف نے بارہا ماسکو کی طرف سے کسی بھی انتخابی مداخلت کی تردید کرتے ہوئے کہا ہے کہ یہ الزامات "بالکل بے بنیاد" تھے۔

 دوسری طرف CNN  کا کہنا ہے  کہ کلیمسن یونیورسٹی کے میڈیا کے محققین کے ساتھ مشترکہ تحقیقات کے مطابق، روسی "ٹرول فیکٹری" کا ایک اسپن آف جس نے 2016 کے امریکی صدارتی انتخابات کو نشانہ بنایا تھا، امریکی  ووٹرزکو متاثر کرنے کی کوشش کرنے والی غلط معلومات کی مہم کا مرکز ہے۔

امریکی انتخابات:الہان عمر نےاسرائیل کی حامی ریپبلکن امیدوار کو شکست دیدی

ویب ڈیسک: امریکی کانگریس کی خاتون رکن الہان عمر نے انتخابات 2024 کے دوران اپنے حریف اسرائیل کی حامی ریپبلکن امیدوار کو باآسانی شکست دے دی۔

غیر ملکی خبر رساں ادارے مڈل ایسٹ آئی کی رپورٹ کے مطابق صومالی نژاد مسلم خاتون کی ایسے وقت میں خبر سامنے آئی ہے جب اسرائیل کے حامی گروپوں کی جانب سے گزشتہ اگست میں ہونے والے پرائمری انتخابات میں انہیں ہٹانے کی کوشش کی گئی تھی۔

مینیسوٹا کے پانچویں ضلع کی نمائندگی کرنے والی الہان عمر کی مد مقابل ریپبلکن امیدوار دالیہ العقیدی تھیں جو ایک عراقی نژاد تارک وطن ہیں جو خود کو سیکولر مسلمان کہتی ہیں اور اسرائیل کی حامی ہیں جب کہ ان کے برعکس الہان عمر فلسطینیوں کے حقوق کے لئے آواز اٹھانے والی شخصیت ہیں۔

ایسوسی ایٹڈ پریس کے مطابق 87 فیصد ووٹوں کی گنتی کے مطابق الہان عمر نے دالیہ العقیدی کے 23.6 فیصد کے مقابلے میں 76.4 فیصد ووٹ حاصل کئے۔میڈیا رپورٹ کے مطابق الہان عمر نے چوتھی بار رکن کانگریس بننے کا اعزاز حاصل کیا۔

دوسری جانب ڈیموکریٹک امیدوار راشدہ طلیب بھی مشی گن کی نشست پر کامیاب ہوگئیں، راشدہ طلیب بھی غزہ اسرائیل کی جارحیت کے خلاف کئی مرتبہ آواز اٹھا چکی ہیں۔

یاد رہے کہ گزشتہ برس امریکا کے ایوان نمائندگان میں ری پبلکنز نے برتری حاصل کرنے کے بعد ڈیموکریٹک رکن الہان عمر کو دو سال پہلے دیے گئے اسرائیل مخالف بیان پر خارجہ امور کمیٹی سے باہر کردیا تھا۔

پاکستانی نژاد علی شیخانی اور سلیمان لالانی بھی انتخابات میں کامیاب

ویب ڈیسک: امریکا میں کانسٹیبل کی نشست پر پاکستانی نژاد امیدوار علی شیخانی کامیاب ہوگئے جب کہ ٹیکساس کی ٹیرینٹ کاؤنٹی سے ڈیموکریٹ کے امیدوار پاکستانی نژاد سلمان بھوجانی کامیاب ہوئے ہیں۔اس کے علاوہ ٹیکساس سے ہی ڈیموکریٹس کے پاکستانی نژاد امریکی امیدوار سلیمان لالانی بھی کامیاب ہوگئے ہیں۔

تفصیلات کے مطابق امریکا کی فورٹ بینڈ کاؤنٹی سےکانسٹیبل کے نشست پر الیکشن لڑنے والے پاکستانی نژاد امیدوار علی شیخانی کامیاب ہوگئے ہیں۔

علی شیخانی نے فورٹ بینڈ کاؤنٹی سے کانسٹیبل کی نشست پر پاکستانی نژاد نیبل شائق کو شکست دی۔

علی شیخانی کون ہیں؟

علی شیخانی کے نام سے بنی آفیشل ویب سائٹ کے مطابق وہ کراچی میں پیدا ہوئے لیکن ان کی زیادہ تر زندگی امریکا میں گزری اور انہوں نے امریکی ریاست ٹیکساس میں بطور پولیس افسر بھی کام کیا اور بعد ازاں انہوں نے کاروبار شروع کیا۔

علی شیخانی نے محض 12 سال قبل یعنی 2012 میں شیخانی گروپ کے نام سے ادارہ بنایا، جس نے امریکی ریاست ٹیکساس سے ہی کاروبار کا آغاز کیا، جس کے بعد اس نے پاکستان میں بھی کاروبار شروع کیا۔

اس وقت تک شیخانی گروپ کے تحت 40 کمپنیاں امریکا اور پاکستان میں کاروبار کر رہی ہیں جب کہ اس گروپ کے پاس 250 ریٹیل دکانوں کے آؤٹ لیٹس بھی ہیں۔

علی شیخانی کی کمپنی میں 2 ہزار ملازمین کام کر رہے ہیں اور انہوں نے گیس اسٹیشنز، پیٹرول پمپس، سولر سمیت انرجی کے دیگر ذرائع میں بھی کاروبار کر رکھا ہے۔

شیخانی گروپ شاپنگ پلازہ بنانے سمیت دیگر ریئل اسٹیٹ کا کام بھی کرتا ہے جب کہ ان گروپ کے اثاثوں سے متعلق ویب سائٹ پر کوئی معلومات دستیاب نہیں۔

علی شیخانی پاکستانی منظر نامے میں اگرچہ ماضی میں بھی آتے رہے ہیں، تاہم گزشتہ چند ماہ کے دوران انہیں کراچی میں زیادہ متحرک دیکھا گیا، خصوصی طور پر وہ کراچی کی سیاست، کاروبار، فلاحی اور ترقیاتی کاموں پر بات کرتے رہے۔

دوسری جانب امریکا کی ریاست ٹیکساس کی اسمبلی کے انتخابات میں سلیمان لالانی بھی اپنی نشست کا دفاع کرنے میں کامیاب ہوگئے ہیں۔

ڈیموکریٹس کے امیدوار سلیمان لالانی کو32 ہزار 141 ووٹ ملے جوکہ 56 اعشاریہ1 فیصد ہیں، ان کے ری پبلکن حریف لی سیمنز کو 25 ہزار 197  ووٹ ملے جو کہ43 اعشاریہ 9 فیصد ہیں۔

ڈونلڈ ٹرمپ نے جوبائیڈن کا معمرترین امریکی صدر کا ریکارڈ توڑ دیا

ویب ڈیسک: ( علی زیدی ) ڈونلڈ ٹرمپ  نے  جو بائیڈن  کا معمر ترین امریکی صدر کا ریکارڈ توڑ دیا۔ 

یادرہے کہ 2020 میں، بائیڈن منتخب ہونے والے سب سے معمر صدارتی امیدوار تھے، جو 20 نومبر 2020 کو 78 سال کی عمر کو پہنچے۔

ٹرمپ اس وقت 78 سال کے ہیں، 14 جون 2025 کو 79 سال کے ہونے والے ہیں اور اس طرح وہ بائیڈن سے چند مہینوں میں بڑے ہوں گے۔

اس سے قبل یہ ریکارڈ رونالڈ ریگن کے پاس تھا جو 69 سال کی عمر میں صدر بنے تھے۔

یہ ایک ایسے شخص کی کامیابی  ہے جس کی عمر 78 برس ہے، یہ فوجداری کے چار مقدمے لڑ رہے ہیں (جن میں سے ایک میں ان پر جرم ثابت ہو چکا ہے اور انھیں تین ہفتوں میں سزا سنائی جائے گی)۔ اس کے علاوہ ان پر متعدد سول کیسز بھی بنے ہوئے ہیں اور گزشتہ آٹھ سالوں میں متعدد تنازعات کا شکار رہے۔

ٹرمپ  کی بطور صدر دوبارہ وائٹ ہاؤس واپسی ایک حیرت انگیز اور غیر معمولی  سیاسی کامیابی  قراردی جارہی ہے۔

ڈونلڈ ٹرمپ کی پہلی وکٹری اسپیچ، "سب سے پہلے امریکا" کا نعرہ لگا دیا

ویب ڈیسک: صدارتی انتخابات میں 270 کا میجک نمبر حاصل کرنے کے بعد دوسری مرتبہ امریکی صدر بننے والے ڈونلڈ ٹرمپ نے وکٹری اسپیچ دی ہے۔ اس موقع پر ان کے فیملی کے ارکان بھی اسٹیج پر موجود تھے۔ 

امریکی ریپبلکن پارٹی کے صدارتی امیدوار ڈونلڈ ٹرمپ نے اہم ریاستوں میں برتری حاصل کرنے کے بعد فلوریڈا کے ویسٹ پام بیچ میں کارکنان سے  پہلے خطاب میں کہا کہ ایک بار پھر منتخب کرنے پر عوام کا بے حد شکریہ ،  یہ بہت بڑی سیاسی جیت ہے۔ہم نے آج تاریخ رقم کی ہے۔ ملک کے زخم بھریں گے اور اسے مشکلات سے نکالیں گے۔ سرحدوں کو محفوظ بنائیں گے اور دیگر مسائل کو حل کریں گے۔
اپنی تقریر کے دوران ڈونلڈ ٹرمپ نے اپنی حریف کملا ہیرس کے حوالے سے ایک لفظ بھی نہیں کہا اور اپنی جیت کے بارے میں ہی گفتگو کرتے رہے۔
انہوں نے امریکی عوام کا شکریہ ادا کرتے ہوئے کہا کہ یہ شاندار فتح ہے امریکا میں سنہری دور کا آغاز ہونے جا رہا ہے۔
ڈونلڈ ٹرمپ نے دعویٰ کیا کہ وہ 315 الیکٹورل ووٹ حاصل کر لیں گے۔ لوگوں نے ہمیں فقید المثال اور انتہائی طاقتور مینڈیٹ دیا ہے۔ ہم نے سینیٹ واپس لے لیا ہے اور لگتا ہے کہ ایوانِ نمائندگان کا کنٹرول بھی ہمارے ہی پاس رہے گا۔
انہوں نے مزید کہا کہ ہم نے تمام رکاوٹوں کا مقابلہ کیا، ایسا اس ملک نے پہلے کبھی نہیں دیکھا۔ امریکہ اب نئی بلندیوں کو چھُوئے گا۔
ڈونلڈ ٹرمپ نے کہا کہ وہ کہتے ہیں کہ یہ جنگ شروع کرے گا لیکن میں جنگیں ختم کروں گا۔
انہوں نے اپنی غیر معمولی حمایت پر امریکی عوام اور شکریہ ادا کرتے ہوئے کہا ابھی بہت کام کرنا ہے 900 انتخابی ریلیاں نکالی ہیں  اب ریلی نکالنے سے زیادہ اہم کام ملک کی تعمیر ہے ۔
انہوں نے کہا ہم نے تاریخ رقم کی ہے  سیاسی فتح حاصل کرکےایسا کچھ کیا ہے جو ناممکن سمجھا جاتا تھا ۔ مجھے امریکا کا 47 واں صدر منتخب کرنے پر ’’شکریہ امریکا’’۔
 آپ کی خوشحالی کے لئے، آپ کی اولاد کی خوشحالی اور بہتری  کے لئے ،امریکی شہریوں کو دنیا کی بہترین جابز دینے کے لئے میری جنگ کا آغاز ہونے لگا ہے۔ 
انہوں نے سوئنگ اسٹیٹس کا بھی نام لے کر شکریہ ادا کیا۔ ’’ شکریہ پنسلوانیا’’ شکریہ جارجیا’’۔ اس موقع پر حاضرین نے ’’ یوایس اے ’’ یو ایس اے ’’ کے فلک شگاف نعرے لگائے۔
 انہو ں نے کہا کہ محبت کے اس مظاہرے کے لئے امریکیوں کا شکریہ ایک دن آپ کو میرے انتخاب کے فیصلے پر فخر ہوگا۔ انہوں نے سینٹ اورایوان نمائندگان میں اکثریت حاصل کرنے پر بھی قوم کو مبارک باد دیتے ہوئے اسے ’’ میگا موومنٹ ’’ قراردیا۔ انہوں نے کہا کہ نومنتخب سینٹرز کے ساتھ کام کرنے کے لئے پرجوش ہوں۔
 انہوں نے اپنے پہلے خطاب فتح میں اپنی اہلیہ خاتون اول میلانیا ٹرمپ اور اپنے خاندان کو خراج تحسین پیش کرتے ہوئے کہا کہ میں اپنے بچوں لارا ، ایوانکا، جیرڈ ، بیرن ٹرمپ کا شکر گذار ہوں انہوں نے بہت محنت کی ہے۔ انہوں نے اس موقع پر اپنے والد اور ساس کو بھی یاد کیا ۔

نائب صدر جے ڈی وینس:
 انہوں نے اپنے ساتھ نائب صدر منتخب ہونے والے جے ڈی وینس کو مبارک باد دی اور خطاب کرنے کے لئے کہا جس پر نائب صدر جےڈی وینس نے کہا کہ میں ٹرمپ کی قیادت میں نیا سیاسی سفر شروع کرنے کے لئے پرجوش ہوں امریکی عوام کے خوابوں کی تکمیل اور ان کی خوشحالی کے لئے ڈونلڈ ٹرمپ کی قیادت میں کا م کریں گے۔
 انہوں نے اپنی انتخابی مہم کی سربراہ سوزی اور انکے شوہر کرس کو بھی اسٹیج بر بلایا اور مبارک باد دی ۔

ایلون مسک کا خطاب میں ذکر:
 انہوں نے اپنی انتخابی مہم  کےسب سےاہم کردار دنیا کے امیرترین شخص اسپیس ایکس اور ٹیسلا کے مالک ایلون مسک کا بھی اپنے خطاب میں خصوصی ذکر کیا اور کہا کہ وہ نیا ستارہ ہے ایسے جینئیس دنیا میں بہت کم ہوں گے ہمیں اس کی قدر کرنی چاہیے۔ انہوں نے رابرٹ ایف کینڈی جونئیر کو بھی اپنے خطاب میں خراج تحسین پیش کیا ۔

کوئی نئی جنگ شروع نہ کرنے کا اعلان: 
انہوں نے اپنے خطاب میں کہا کہ ہمارے پاس سعودی عرب اور روس سے زیادہ تیل ہے امریکا میں کیانہیں ہے۔ سخت جان اور محنت کش امریکیوں سے مل کر ملک کے حالات بدلیں گے۔ انہوں نے بڑا اعلان کرتے ہوئے کہا کہ  پہلے بھی کوئی جنگ شروع نہیں کی تھی اب بھی کوئی نئی جنگ شروع نہیں کرنی۔
 انہوں نے کہا کہ بہت سے لوگوں کا خیال ہے کہ خدا نے قاتلانہ حملے میں میری جان کسی مقصد کے لئے بچائی تھی۔ اور یہ مقصد امریکا کی حفاظت ہے
ڈونلڈ ٹرمپ کا کہنا  تھا کہ ہم اپنے ملک کے زخم بھرنے جا رہے ہیں۔  انھوں نے سرحدوں کو ٹھیک کرنے کا عزم کیا اور مزید کہا کہ ان کی پارٹی نے کسی وجہ سے تاریخی فتح حاصل کی ہے۔
 ان کا کہنا ہے کہ امریکی شہریوں نے انھیں غیرمعمولی مینڈیٹ دیا ہے۔
چیلنجز سے نمٹنے کے لیے اقدامات کریں گے، امریکا کے تمام معاملات اب ٹھیک ہونے والے ہیں، اس وقت تک خاموش نہیں بیٹھوں گا جب تک آپ لوگوں کے خواب پورے نہ کروں۔

سرحدوں کو سیل کرنا پڑےگا:
ان کا کہنا تھا کہ سرحدوں کو سیل کرنا پڑے گا، ہم چاہتے ہیں کہ لوگ قانونی طریقے سے امریکا آئیں، امریکا کو محفوظ بنائیں گے۔
ڈونلڈ ٹرمپ نے کہا کہ ہم مضبوط اور طاقتور فوج چاہتے ہیں اور آئیڈل صورتحال ہے کہ ہمیں اسے استعمال کرنے کی ضرورت نہ پڑے، آپ جانتے ہیں کہ اپنے سابقہ 4 سال میں ہماری کوئی جنگ نہیں تھی، سوائے اس کے کہ ہم نے داعش کو شکست دی تھی، ہم نے داعش کو ریکارڈ مدت میں شکست دی، لیکن ہماری کوئی جنگ نہیں تھی۔ امریکی عوام سے کئے گئے سب وعدے پورے کروں گا ۔پہلے ملک میں تقسیم کو ختم کرنا ہے قوم کو متحد کرکے کامیاب بنانا ہے ۔
 انہوں نے نعرہ لگایا’’ سب سے پہلے امریکا’’ 
ان کا کہنا تھا کہ سب سے زیادہ محفوظ سب سے زیادہ خوش حال سب سے زیادہ عظیم ملک امریکا کو ہونا  ہے۔ 
 خطاب کے اختتام پر انہوں نے سب کا شکریہ ادا کرتے ہوئے رقص کے مخصوص اسٹیپس لئے اور اپنی اہلیہ کے ہمراہ روانہ ہوگئے ۔

یاد رہے کہ گزشتہ روز ڈونلڈ ٹرمپ نے اپنی انتخابی مہم کے اختتام پر ایک بیان میں ووٹرز کو مخاطب کرتے ہوئے کہا ہے کہ "یہ کرپٹ اسٹیبلشمنٹ کو ہرانے کا آخری موقع ہے۔ باہر نکلو اور ووٹ دو۔" 

ٹرمپ نے ایریزونا میں فوکس نیوز کے سابق میزبان ٹکر کارلسن کو انٹرویودیا اور نیواڈا میں ایک ریلی سے خطاب کیا۔

مجھے کوئی غرض نہیں کہ دنیا میں کیا ہو رہا ہے یا کیا ہو گا، میری پہلی ترجیح امریکا اور امریکی معیشت ہے۔ ہم اپنی خارجہ پالیسی کو بھی اسی نظر سے دیکھیں گے۔

ٹرمپ نے کہا ہے کہ وہ غیر قانونی طور پر آنے والے تارکین وطن کو روکنے کے لیے اس دیوار پر کام مکمل کرلیں گے جس پر ان کے 2017 سے2020 کے دور صدارت میں کام شروع ہوا تھا۔

ٹرمپ نے اس عزم کا اظہار کیا ہے کہ وہ اقتدار میں آنے کے بعد امریکا میں بغیر دستاویز کے رہنے والے تارکین وطن کو ڈی پورٹ کردیں گے۔

انہوں نے ہیرس پر الزام لگایا ہے کہ وہ میکسیکو کی سرحد سے آنے والے مہاجرین کے بہاؤ کو روکنے کے معاملے پر کمزور ثابت ہوئی ہیں۔

ٹرمپ کی حمایت کرنا بورس جانسن کو مہنگاپڑگیا

ویب ڈیسک : (جواد ملک ) سابق صدر ڈونلڈ ٹرمپ کی حمایت پر بورس جانسن کا لائیو شو میں  شرکا سےجھگڑا،  لائیوشوسے کٹ کردیاگیا۔

تفصیلات کے مطابق سابق برطانوی وزیراعظم بورس جانسن نے امریکی صدر کے لیے ڈونلڈ ٹرمپ کی حمایت کی ہے  تاہم خصوصی نشریات کے دوران چینل 4 کے  اینکرز سے  جھگڑ ھ پڑے تھے۔

برطانیہ کے سابق وزیر اعظم  کا پینلسٹ اور سابق پورن فلم سٹار سٹورمی ڈینیئلز کے ساتھ اس وقت جھگڑا ہوا جب اس نے  کہا کہ وہ اپنے بچوں کو ریپبلکن امیدوار کے ساتھ تنہا چھوڑنے میں راحت محسوس کریں گے۔

 بورس جانسن کا کہنا تھاکہ"ڈونلڈ ٹرمپ کے بارے میں میرا تجربہ یہ ہے کہ وہ شائستہ ہے، وہ شائستہ رہا ہے ۔ جس پر ایملی میٹلس  نے انہیں کٹ کردیا۔

انہوں نے کہا کہ اب آپ ڈونلڈ ٹرمپ کے بارے میں جو بھی کہیں گے وہ جمہوری طریقے سے یہ الیکشن لڑ رہے ہیں، ہر اس ووٹ کے لیے لڑ رہے ہیں جو وہ حاصل کر سکتے ہیں اور جب ہم آج رات بول رہے ہیں تو ہمیں نہیں معلوم کہ اس کا نتیجہ کیا نکلے گا۔

ٹرمپ کی کامیابی پر کملاہیرس کے کیمپ میں سوگ کا سماں

ویب ڈیسک: ڈونلڈ ٹرمپ کی وکٹری کے نتائج کے بعد کملا ہیرس کیمپ میں سوگ کا سماں ہے جبکہ  کملا ہیرس کے معاونین کا کہنا ہے کہ وہ آج رات بات نہیں کریں گی۔

تفصیلات کے مطابق کملا ہیرس کے حامی مایوس ہو کر واپس جانے لگے۔ واشنگٹن ڈی سی میں "ہیرس ہیڈکوارٹر" خالی ہو گیا، حامی واپس لوٹ گئے۔

ہیرس کے سینکڑوں حمایتی گراؤنڈ چھوڑ کر جا چکے ہیں اور ان میں سے اکثر میڈیا سے بات کرنے سے انکار کر رہے ہیں کیونکہ ہیرس کی فتح کے امکانات بظاہر محدود ہوتے دکھائی دے رہے ہیں۔

ہیرس اس تقریب سے آج خطاب نہیں کریں گی اور وہ یہ خطاب کل کریں گے۔

ادھر واشنگٹن ڈی سی میں کملا ہیرس کے ہیڈکوارٹرمیں موجود لنڈی لی جو فلاڈیلفیا سے تعلق رکھنے والی ڈیموکریٹ فنڈ ریزر ہیں نے بی بی سی کو بتایا کہ ’صورتحال خاصی مایوس کن ہے۔‘

انھوں نے کہا کہ ’لوگوں وقت کے ساتھ مزید مضطرب ہو رہے ہیں لیکن اب بھی ایک راستہ موجود ہے۔ میں اب بھی امید لگائے ہوئے ہوں لیکن یہ وہ رات نہیں ہے جو ہم چاہتے تھے۔‘

سوہاس سبرامنیم کانگریس انتخاب جیتنے والے پہلے بھارتی نژاد امریکی بن گئے

ویب ڈیسک: (علی زیدی)امریکا کی ریاست ورجینیا سے ایوانِ نمائندگان کے لیے ڈیموکریٹک امیدوار سوہاس سبرامنیم کامیاب ہو گئے ہیں۔

 سوہاس ورجینیا سے کانگریس کا انتخاب جیتنے والے پہلے بھارتی نژاد امریکی بن گئے ہیں۔ وہ ورجینیا کے 10ویں حلقے سے انتخابات جیتنے والے بھارتی پس منظر رکھنے والے جنوبی ایشیائی  امیدوار ہیں۔ یہ نشست سابق  ڈیموکریٹک رکن جینیفر ریٹکنسن کی ہے جو ذاتی وجوہ کی بنا پر کھڑی نہیں ہوئیں لیکن ان کی مکمل حمایت سوہاس سبرامنیم کو حاصل تھی۔

 یادرہے سوہاس سبرامنیم کے حلقے میں پاکستانیوں سمیت  جنوبی ایشیائی کمیونٹی کی اکثریت ہے جن کی انہیں حمایت حاصل تھی ۔

سوہاس اس سے قبل دو دفعہ ریاستی اسمبلی کے رکن رہ چکے ہیں ۔ 

صدارتی انتخابات 2024 میں الیکشن لڑنے والے  9 ارکان کانگرس کا بھارتی پس منظر ہے.

ڈونلڈ ٹرمپ 4سوئنگ اسٹیٹس میں کامیاب، 1 میں آگے

ویب ڈیسک:ڈونلڈ ٹرمپ نے ایک اور سوئنگ سٹیٹ مشی گن میں بھی سبقت حاصل کرلی۔ کملا ہیرس اب صرف ایک ہی سوئنگ سٹیٹ میں آگے ہیں جبکہ پانچ ریاستوں میں ڈونلڈ ٹرمپ کو برتری حاصل ہوگئی ہے۔

ٹرمپ اگلے امریکی صدر کنفرم، تیسری سوئنگ اسٹیٹ پینسلوانیا بھی ری پبلکنز کے نام ہوگئی۔ پنسلوانیا کے 19 الیکٹورل ووٹ ملنے کے بعد ٹرمپ کو مزید صرف 3 ووٹ درکار ہیں۔

اس سے قبل ٹرمپ نے دوسری سوئنگ اسٹیٹ بھی اپنے نام کرلی ہے۔ نیوکیرولائنا کے بعد جارجیا کا نتیجہ بھی ٹرمپ کے نام رہا ہے۔ 

تفصیلات کے مطابق امریکا کی 7 سوئنگ اسٹیٹس میں سے اب دوسری اسٹیٹ کا نتیجہ آگیا ہے جو کہ ٹرمپ کے نام رہا ہے۔ 

اس جیت کے بعد ٹرمپ کے دوسری مرتبہ امریکی صدر بننے کے امکانات روشن ہوگئے ہیں۔ 

رپورٹ کے مطابق ڈونلڈ ٹرمپ نے شمالی کیرولینا  کے بعد اہم سوئنگ اسٹیٹ  جارجیا  میں بھی فتح حاصل کرلی ہے۔
جبکہ مبصرین کا کہنا ہے کہ دیگر پانچ  سوئنگ اسٹیٹس  کے رزلٹ بھی 80 فیصد کے قریب آچکے ہیں اور ڈونلڈ ٹرمپ فتح کے لئے "پرامید" ہیں۔
 جارجیا میں فتح کی خبر کے بعد سابق صدر ڈونلڈ ٹرمپ  اپنے حامیوں سے خطاب کے لیے  مار اے لاگوپام بیچ  فلوریڈا جارہے ہیں۔
 ڈونلڈ ٹرمپ کی وکٹری کے نتائج کے بعد کملا ہیرس کیمپ میں سوگ کا سماں ہے جبکہ  کملا ہیرس کے معاونین کا کہنا ہے کہ وہ آج رات بات نہیں کریں گی۔

یاد رہے کہ گزشتہ انتخابات میں ڈونلڈ ٹرمپ جارجیا سے کامیابی حاصل نہیں کرسکے تھے۔

ری پبلکن پارٹی کو سینیٹ کے بعد ایوان نمائندگان میں بھی سبقت حاصل

ویب ڈیسک: امریکی صدارتی الیکشن کے نتائج کا سلسلہ جاری ہے۔ ری پبلکن پارٹی کو سینیٹ کے بعد ایوان نمائندگان میں بھی سبقت حاصل ہوگئی ہے۔

امریکی میڈیا کے مطابق 435 کے ایوان میں 182 ریپبلکن اور150 ڈیموکریٹس کامیاب ہوگئے۔ ایوان میں اکثریت کے لیے 218 ووٹ درکار ہیں۔

ریپبلکنز  نے سینیٹ کی 12نشستیں جیت لیں، ریپبلکنز کی سینیٹ میں مجموعی سیٹیں 51ہوگئیں، ریپبلکنز جماعت امریک سینیٹ میں اکثریتی جماعت بن گئی۔ ایوان کا کنٹرول حاصل کرنے کیلئے کسی بھی جماعت کو اکیاون سیٹیں درکار ہیں۔

دوسری جانب امریکی صدارتی الیکشن کے 35 ریاستوں کے نتائج آگئے، ڈونلڈ ٹرمپ کو اب تک  232 جبکہ کاملا ہیرس کو 198 الیکٹورل ووٹ مل چکے ہیں، ڈونلڈ ٹرمپ کو صدر بننے کیلئے مزید 38 الیکٹورل ووٹ درکار ہیں ۔ایوان نمائندگان میں ری پبلکن 170 اور ڈیموکریٹس 119 نشستوں پر کامیاب ہوچکے ہیں۔

صدارتی انتخابات: نیومیکسیکو سے کملاہیرس فاتح قرار

ویب ڈیسک: امریکا میں صدارتی انتخابات آخری مراحل میں ہیں۔ جہاں اب نتائج آنے کا سلسلہ جاری ہے۔ ویسے تو ڈونلڈ ٹرمپ نتائج میں برتری حاصل کیے ہوئے ہیں لیکن ڈیموکریٹس کی صدارت امیدوار کملاہیرس نے ایک اور تاریخ رقم کردی ہے۔

تفصیلات کے مطابق کملاہیرس نے نیومیکسیکو سے کامیابی حاصل کرلی ہے۔ ڈیموکریٹس 2008 کے بعد پہلی مرتبہ نیومیکسیکو سے کامیابی حاصل کرسکے ہیں۔ جسے کملا ہیرس کی تاریخی کامیابی قرار دیا جارہا ہے۔ 

یاد رہے کہ ری پبلکن صدارتی امیدوار ڈونلڈ ٹرمپ کو الیکٹورل ووٹوں میں برتری حاصل ہوگئی، ٹرمپ 248 الیکٹورل ووٹ حاصل کر کے آگے ہیں جبکہ کملاہیرس 213 الیکٹورل ووٹ حاصل کرسکیں، کسی بھی امیدوار کو جیت کیلئے 538 میں سے 270 الیکٹورل ووٹ درکار ہیں۔

صدارتی انتخابات: ایلون مسک کا گوگل پر کملا ہیرس کی حمایت کا الزام

ویب ڈیسک:امریکی صدر کے انتخاب کیلئے کئی ریاستوں میں پولنگ کا وقت ختم ہوگیا، جس کے بعد ووٹوں کی گنتی شروع ہوگئی جبکہ کئی ریاستوں میں ابھی بھی ووٹ ڈالے جارہےہیں۔اس دوران ڈونلڈ ٹرمپ کے حامی کھرب پتی ایلون مسک نے معروف سرچ انجن 'گوگل' پر کملا ہیرس کی حمایت کا الزام عائد کردیا ہے۔

تفصیلات کے مطابق ایلون مسک نے گوگل پر براہ راست الزام عائد نہیں کیا بلکہ انہوں نے ایک پوسٹ شیئر کی جس میں ویڈیو کے ذریعے دعویٰ کیا گیا کہ جب صارفین نے گوگل پر سرچ کیا کہ 'میں کملا ہیرس کو کہاں ووٹ دے سکتا ہوں' تو سرچ رزلٹس میں پولنگ کے مقامات ظاہر ہوئے جبکہ کملا کی جگہ ٹرمپ کا نام لکھ کر یہی سرچ کرنے پر پولنگ کے مقامات ظاہر نہیں ہوئے۔

ایلون مسک نے اپنے 'ایکس' اکاؤنٹ سے یہ ویڈیو ری پوسٹ کرتے ہوئے اس مسئلے کیجانب توجہ دلائی تو گوگل نے اس نقص کا اعتراف کرتے ہوئے وضاحت جاری کی۔

گوگل کیجانب سے جاری وضاحت میں کہا گیا کہ 'ووٹ کہاں کرنا ہے' کا پینل مخصوص سرچ کے مطابق کام کرتا ہے، کیونکہ 'ہیرس' ٹیکساس کی ایک کاؤنٹی کا بھی نام ہے اس لیے ایسا ہوا، آپ وینس لکھ کر سرچ کریں گے تب بھی ایسا ہی ہوگا کیونکہ یہ بھی ایک کاؤنٹی کا نام ہے، اس نقص کو ٹھیک کرنے پر کام ہورہا ہے، تاہم یہ واضح رہے کہ بہت کم لوگ اس طرح ووٹنگ کے مقامات تلاش کرتے ہیں۔

 گوگل کی وضاحت پر ایلون مسک نے ردعمل دیتے ہوئے لکھا کہ 'وضاحت کے لیے شکریہ'۔

واضح رہے کہ گوگل کے خلاف متعصبانہ رویے کے الزام کا یہ پہلا واقعہ نہیں ہے، اس سے قبل ڈونلڈ ٹرمپ بھی یہ دعویٰ کر چکے ہیں کہ گوگل کا سرچ انجن ڈیموکریٹک امیدوار کملا ہیرس کیجانب جھکاؤ رکھتا ہے۔

وائٹ ہاؤس کے سامنے ٹرمپ کے حامیوں کا جشن

ویب ڈیسک: امریکی صدر کے انتخاب کے لیے کئی ریاستوں میں پولنگ ختم ہو گئی جس کے بعد ووٹوں کی گنتی شروع ہو گئی اور نتائج آنے کا سلسلہ جاری ہے۔

امریکی صدارتی انتخاب میں اب تک 538 میں سے ڈونلڈ ٹرمپ نے 232 اور کملا ہیرس نے 198 الیکٹورل ووٹ حاصل کر لیے ہیں۔

وائٹ ہاؤس کے سامنے ریپبلکن امیدوار ڈونلڈ ٹرمپ کے حامیوں کی جانب سے جشن شروع ہو گیا ہے۔

ڈونلڈ ٹرمپ کے حامیوں نے وائٹ ہاوس کے سامنے نعرے لگائے۔

دوسری جانب امریکا میں صدارتی انتخابات اور تناؤ کے پیشِ نظر واشنگٹن میں سیکیورٹی سخت کر دی گئی ہے۔

واشنگٹن ڈی سی کی گلیوں میں پولیس اہلکار اور پولیس موبائلز موجود ہیں۔

وائٹ ہاؤس کے ارد گرد 8 فٹ اونچی لوہے کی باڑ لگا دی گئی ہے۔

کیپیٹل کی عمارت کے گرد بھی باڑ اور رکاوٹیں کھڑی کی گئی ہیں، حفاظتی اقدامات کے تحت کاروباری افراد نے اپنے کاروبار بند کر دیے ہیں۔

جارجیا: 5 پولنگ بوتھ پربم کی غیر مصدقہ دھمکیاں موصول

ویب ڈیسک: امریکی ریاست جارجیا میں 5 پولنگ بوتھز پر بم کی غیر مصدقہ دھمکیاں موصول ہوئیں۔

میڈیا رپورٹ کے مطابق دھمکیوں کے باعث دو مقامات سے ووٹرز کے انخلاء پر ووٹنگ کے عمل میں تاخیر ہوئی۔

مقامی میڈیا کے مطابق ٹوکوب کاؤنٹی میں تاخیر کے پیش نظر ووٹنگ کے وقت میں اضافہ کیا گیا۔

جارجیا کے وزیر خارجہ کا کہنا ہے کہ دھمکیوں کے تانے بانے روس سے ملتےہیں۔

امریکی حکام نے کہا ہے کہ وہ ان افواہوں کے حوالے سے تحقیقات کر رہے ہیں۔

واضح رہے کہ امریکی صدر کے انتخاب کے لیے کئی ریاستوں میں پولنگ ختم ہو گئی جس کے بعد ووٹوں کی گنتی شروع ہو گئی اور نتائج آنے کا سلسلہ جاری ہے۔

امریکی صدارتی انتخاب میں اب تک 538 میں سے ڈونلڈ ٹرمپ نے 232 اور کملا ہیرس نے 198 الیکٹورل ووٹ حاصل کر لیے ہیں، کسی بھی امیدوار کو جیت کے لیے کل 538 میں سے کم از کم 270 الیکٹورل ووٹ درکار ہوں گے۔

امریکا میں صدارتی انتخابات میں الیکشن کے دن کی ووٹنگ کا آغاز رات نیو ہیمپشائر میں ہوا اور پہلا ووٹ نیو ہیمپشائر کے ایک چھوٹے سے قصبے ڈکسوائل نوچ میں ڈالا گیا۔

سوئنگ اسٹیٹ کا پہلا نتیجہ آگیا، نارتھ کیرولائنا سے ٹرمپ کامیاب

ویب ڈیسک:(علی زیدی) امریکی صدارتی انتخابات میں سوئنگ اسٹیٹس کے نتائج پر سب کی نظریں ہیں کیونکہ مانا جاتا ہے کہ جو ان ریاستوں سے ووٹرز کا اعتماد حاصل کرلیتا ہے۔ اس کو وائٹ ہاؤس کا نیا مکین بننے کا ٹکٹ مل جاتا ہے۔

تفصیلات کے مطابق انہی سوئنگ اسٹیٹس میں سے ایک نارتھ کیرولائنا کے مکینوں نے اپنا فیصلہ ڈونلڈ ٹرمپ کے حق میں سنا دیا ہے۔ سابق امریکی صدر اس ریاست سے کامیاب ہوچکے ہیں۔ 

اس ریاست کے 16 الیکٹورل ووٹ ہیں۔ جو کہ جیت کی پہلی سیڑھی تصور کی جارہی ہے۔ یہ ریاستیں کسی بھی صدارتی امیدوار کی جیت میں اہم کردار ادا کریں گے۔ 

امریکی سینٹ میں ڈونلڈ ٹرمپ کی پارٹی نے اکثریت حاصل کرلی

ویب ڈیسک: امریکی سینٹ انتخابات میں ڈونلڈ ٹرمپ کی پارٹی ری پبلکنز نے اکثریت حاصل کرلی ہے۔ 

ایگزٹ پول کے مطابق سینیٹ الیکشن میں ری پبلیکن کی سینیٹ میں 51 اور ڈیموکریٹس کی 42 نشستیں ہیں۔ 

خیال رہے کہ امریکہ میں ووٹر پانچ نومبر کو نئے صدر کا انتخاب تو کریں گے ہی، لیکن اس دن ان کے ووٹ سے یہ فیصلہ بھی ہوجائے گا کہ کس پارٹی کو امریکی کانگریس میں برتری حاصل ہوگی۔ نئے صدر کے لیے بھی قانون سازی کے اپنے ایجنڈے پر عمل درآمد کا انحصار اس پارٹی پر ہوگا جو ایوانِ نمائندگان یا سینیٹ میں اکثریت حاصل کرے گی۔