اسلام آباد: قومی اسمبلی میں سابق وزیراعظم عمران خان کے خلاف قرارداد منظور کرلی گئی ہے۔ تفصیلات کے مطابق آج قومی اسمبلی کے ہونے والے اجلاس میں لیگی رہنما جاوید عباسی نے قرار داد پیش کی۔قرار داد میں کہا گیا کہ پاکستان تحریک انصاف کے چیئرمین عمران خان نے اپنے بیان میں تاریخی حقائق کو مسخ کرنے، مسلح افواج کو بدنام کرنے کی کوشش کی اور یہ تاثر دینے کی کوشش کی کہ مسلح افواج ملک کیخلاف سازش کر رہی تھی۔ قرارداد میں یہ بھی کہا گیا کہ پاکستان کی مسلح افواج ملکی سرحدوں کا بلا خوف و خطر تحفظ کررہی ہیں اور دہشت گردی کےخلاف بے شمار قربانیاں دی ہیں، سیاسی مقاصد کیلیے ادارے کو بدنام کرنے کی کوشش ملکی مفاد کیخلاف ہے۔ دوسری جانب سابق وفاقی وزیر اطلاعت فواد چوہدری نے سماجی رابطے کی ویب سائٹ ٹوئٹر پر ٹویٹ میں کہا کہ مقبوضہ اسمبلی سے قرارداد منظور ہونا ایسے ہی ہے جیسے شریف اور زرداری فیملی گھر میں بیٹھ کر فیصلے کر لیں اس اسمبلی میں اور ان کے گھر میں صرف بلڈنگ کا فرق ہے ایسی قراداد کو اسمبلی کی قراداد قرار دینا پارلیمان کی توہین ہے۔