کوئٹہ : بلوچستان کے علاقے خاران میں بلوچستان ہائیکورٹ کے سابق چیف جسٹس محمد نور مسکان زئی فائرنگ کے واقعے میں جاں بحق ہوگئے۔ تفصیلات کے مطابق ڈپٹی انسپکٹر جنرل پولیس (ڈی آئی جی) رخشان کا کہنا ہے کہ فائرنگ کا واقعہ خاران کے علاقے گزگی میں پیش آیا۔ انہوں نے بتایا کہ محمد نورمسکانزئی پر مسجد میں نماز کے دوران فائرنگ کی گئی، انہیں ابتدائی طبی امداد کے بعد کوئٹہ روانہ کیاجارہا تھا تاہم وہ جانبر نہ ہوسکے۔ واضح رہے کہ نورمسکان زئی دسمبر 2014 سے اگست 2018 تک چیف جسٹس بلوچستان ہائیکورٹ رہے ، اس کے علاوہ وہ فیڈرل شریعت کورٹ کے بھی سابق چیف جسٹس رہے۔