ویب ڈیسک: کینیڈا کے شہر وینکوور کے علاقے سن سیٹ میں 24 سالہ بھارتی طالب علم کو اس کی کار میں گولی مار کر ہلاک کر دیا گیا۔ وینکوور پولیس نے ایک بیان میں کہا کہ 24 سالہ چراغ انٹیل علاقے میں ایک گاڑی کے اندر مردہ پایا گیا۔
تفصیلات کے مطابق پولیس کی ترجمان تانیہ وزینٹن نے بتایا کہ گولیوں کی آوازیں سننے کے بعد محلے کے لوگوں نے ایمرجنسی سروسز کو کال کی۔
وینکوور پولیس نے بتایا، ’’لوگوں نے گولیوں کی آوازیں سننے کی اطلاع کے بعد افسران کو ایسٹ 55 ویں ایونیو اور مین اسٹریٹ پر بلایا۔ 24 سالہ چراغ انٹیل علاقے میں ایک گاڑی کے اندر مردہ پایا گیا۔‘‘ پولیس کا کہنا ہے کہ اس معاملے میں کوئی گرفتاری عمل میں نہیں آئی ہے اور تفتیش جاری ہے۔
دریں اثنا، کانگریس کی طلباء تنظیم این ایس یو آئی کے سربراہ ورون چودھری نےبھارتی وزارت خارجہ سے طالب علم کے اہلخانہ کی مدد کی درخواست کی ہے۔ انہوں نے پوسٹ کیا، ’’ کینیڈا کے وینکوور میں ایک ہندوستانی طالب علم چراغ انٹیل کے قتل کے حوالے سے فوری نوٹس لیں۔ ہم وزارت خارجہ سے مطالبہ کرتے ہیں کہ وہ تحقیقات کی پیشرفت پر گہری نظر رکھے تاکہ انصاف کی جلد فراہمی ہو۔‘‘
انہوں نے وزارت سے اس مشکل وقت میں متوفی کے اہلخانہ کو تمام ضروری مدد فراہم کرنے کی بھی درخواست کی۔ مقامی میڈیا رپورٹس کے مطابق چراغ کا خاندان اس کی لاش واپس لانے کے لیے کراؤڈ فنڈنگ کے ذریعے رقم اکٹھا کر رہا ہے۔
چراغ کے بھائی رومیت انٹیل، جن کا تعلق ہریانہ سے ہے، نے مقامی میڈیا کو بتایا کہ وہ ہر روز اپنے بھائی اور بہن سے بات کرتے تھے۔ رومیت نے بتایا کہ جس دن حادثہ ہوا اس دن بھی انہوں نے چراغ سے بات کی تھی۔ چراغ، جو ستمبر 2022 میں وینکوور چلا گیا تھا، نے یونیورسٹی کینیڈا ویسٹ سے ایم بی اے مکمل کیا تھا اور حال ہی میں اسے ورک پرمٹ حاصل ہوا تھا۔