لاہور: وزیر مملکت برائے پیٹرولیم مصدق ملک نے کہا ہے کہ غریب کیلئے پیٹرول کی قیمت کم کرنے کا فیصلہ کیا ہے، موٹرسائیکل سواروں کو فی لیٹر پیٹرول پر 50 نہیں بلکہ 100 روپےکا ریلیف ملےگا۔ وزیر مملکت برائے پیٹرولیم مصدق ملک نے لاہور میں پریس کانفرنس کرتے ہوئے کہا کہ وزیراعظم نے ہمیں اس پر عمل درآمد کے لیے صرف 6 ہفتے دیے ہیں، غریب کا پیٹرول سستا کریں گے، امیر کے پیسے غریب کی جیب میں ڈالیں گے۔ مصدق ملک نے کہا کہ موٹر سائیکل سوار کا احساس کرتے ہوئے ان کے لیے پیٹرول کی قیمت کم کر رہے ہیں۔ بڑی گاڑیوں والے پیٹرول کی زیادہ قیمت دیں گے، پیٹرول پر اب امیر 100 روپے زیادہ دےگا، غریب 100 روپے کم دےگا۔انہوں نے کہا کہ 22 کروڑ کی آبادی میں 21 کروڑ غریب ہیں، ہم غریب کے پاکستان کے ساتھ کھڑے ہیں۔ وزیر مملکت کا مزید کہنا تھا کہ گیس کا فیصلہ یکم جنوری سے نافذالعمل ہوچکا، ہم نے گیس کا ٹیرف الگ کردیا، غریب اور امیرکا بل الگ الگ کردیا ہے۔