ویب ڈیسک :عام آدمی پارٹی کی رہنما آتشی نے دہلی کی تیسری خاتون وزیر اعلی کے طور پر حلف اٹھا لیا۔
رپورٹ کے مطابق ان کے ساتھ پانچ وزراء نے بھی حلف اٹھایا ہے۔ حلف برداری کی یہ تقریب شام 4:30 بجے منعقد ہوئی۔ حلف برداری کی تقریب لیفٹیننٹ گورنر سکریٹریٹ میں منعقد ہوئی۔ ان سے لیفٹیننٹ گورنر وی کے سکسینہ نے حلف لیا۔
وزیر اعلیٰ کے علاوہ دہلی میں وزراء کے چھ عہدے ہیں۔ لیکن فی الحال دہلی حکومت کی کابینہ میں صرف پانچ اراکین اسمبلی نے ہی وزیر کے طور پر حلف لیا ہے
اروند کیجریوال کے ساتھ وزارتی ذمہ داریاں سنبھالنے والے وزراء کے علاوہ سلطان پور ماجرا کے رکن اسمبلی مکیش اہلاوت کو نئی کابینہ میں شامل کیا گیا ہے۔ مکیش اہلوت کا تعلق درج فہرست ذات سے ہے۔ ایس سی کوٹے کے ایم ایل اے شروع سے ہی دہلی حکومت کی کابینہ میں وزیر رہے ہیں۔
سال 2020 میں جب اروند کیجریوال کی قیادت میں تیسری بار حکومت بنی تھی تو سیما پوری کے رکن اسمبلی راجندر پال گوتم کو کابینہ وزیر بنایا گیا تھا۔ اس کے بعد پٹیل نگر کے ایم ایل اے راج کمار آنند کو کابینہ میں شامل کیا گیا۔
واضح رہے کہ منگل کو اروند کیجریوال نے اپنا اور اپنی کابینہ کا وزیر اعلیٰ کے عہدے سے استعفیٰ لیفٹیننٹ گورنر وی کے سکسینہ کو سونپ دیا تھا۔ کیجریوال کی طرف سے پیش کیا گیا استعفیٰ بدھ کو لیفٹیننٹ گورنر نے صدر دروپدی مرمو کو بھیجا تھا۔
آتشی کون ہیں ؟
آتشی کا تعلق پنجابی راجپوت خاندان سے ہے اور وہ آکسفورڈ یونیورسٹی سے گریجویٹ ہیں۔ آتشی 2020 کے اسمبلی انتخابات میں پہلی بار رکن اسمبلی منتخب ہوئیں اور 2023 میں پہلی بار کیجریوال حکومت میں وزیر بنیں۔ اس سے پہلے 2019 میں، انہوں نے مشرقی دہلی لوک سبھا سیٹ سے الیکشن لڑا تھا اور وہ بی جے پی امیدوار گوتم گمبھیر سے 4.77 لاکھ ووٹوں سے ہار گئی تھیں اور تیسرے نمبر پر رہی تھیں۔ آتشی کو کیجریوال کا قریبی ساتھی اور بااعتماد سمجھا جاتا ہے۔ وہ انا ہزارے کی تحریک کے وقت سے ہی تنظیم میں سرگرم ہیں۔
آتشی سال 2020 میں پہلی بار کالکاجی اسمبلی حلقہ سے رکن اسمبلی بنی تھیں ۔ انہوں نے بی جے پی امیدوار دھرم ویر سنگھ کو 11 ہزار 393 ووٹوں سے شکست دی تھی۔
آتشی کی پیدائش 8 جون 1981 کو دہلی میں ہوئی تھی۔ ان کے والد نم وجے سنگھ دہلی یونیورسٹی میں پروفیسر رہ چکے ہیں۔ آتشی نے اپنی اسکول کی تعلیم اسپرنگ ڈیل اسکول، نئی دہلی سے کی۔ انہوں نے سینٹ اسٹیفن کالج میں تاریخ کی تعلیم حاصل کی اور اسکالرشپ پر آکسفورڈ یونیورسٹی سے ماسٹر ڈگری حاصل کی۔
کچھ سال بعد، انہوں نے تعلیمی تحقیق میں روہڈز اسکالر کے طور پر آکسفورڈ سے اپنی دوسری ماسٹر ڈگری حاصل کی۔ آتشی نے سات سال مدھیہ پردیش کے ایک چھوٹے سے گاؤں میں گزارے، جہاں وہ نامیاتی کاشتکاری اور ترقی پسند تعلیمی نظام سے جڑیں ۔