اسرائیلی فوج کی جانب سے غزہ میں وحشیانہ حملے جاری ہیں، جس کے نتیجے میں مزید 400 فلطسینیوں شہید ہوگئے ہے۔ غیر ملکی میڈیا کا کہنا ہے کہ فلسطین کی وزارت صحت کا بتانا ہےکہ گذشتہ 48 گھنٹوں میں اسرائیلی حملوں میں تقریباً 400 فلسطینی شہید اور734 زخمی ہوئے ہیں جبکہ اقوام متحدہ کی سلامتی کونسل جنگ رکوانے میں ناکام نظر آرہی ہے۔ میڈیا رپورٹس میں بتایا گیا ہے کہ اسرائیلی فوج پناہ گزینوں کے کیمپ خان یونس، رفح اور نصیرت میں مسلسل بمباری کررہی ہے۔ دوسری جانب امریکی میڈیا کے مطابق اسرائیل نے غزہ کے جنوبی علاقے پر 2 ہزار پاؤنڈ وزنی بم گرائے اور اسرائیل نے فلسطینیوں کو غزہ کے جس علاقے سے بے دخل کیا وہاں بھی جان بوجھ کربم گرائے ہیں۔ اس کے علاوہ فلسطین کی مزاحمتی تنظیم حماس کی جانب سے بھی جوابی کارروائی جاری ہے اور جنگ میں اب تک 472 اسرائیلی فوجی ہلاک ہوگئے ہیں جن میں سے 139 اسرائیلی فوجی زمینی کارروائی میں مارے گئے۔ خیال رہے کہ 7 اکتوبر کے بعد سے اسرائیلی حملوں میں اب تک شہید فلسطینیوں کی تعداد 21 ہزار کے قریب پہنچ گئی ہے جب کہ 53 ہزار سے زائد لوگ زخمی ہوئے ہیں۔