لاہور : احتساب عدالت نے آشیانہ اقبال ہاؤسنگ کیس میں وزیراعظم شہباز شریف کی مستقل حاضری معافی کی درخواست کو منظور کر لیا ہے۔ تفصیلات کے مطابق احتساب عدالت لاہور نے آشیانہ اقبال ہاؤسنگ کیس کی سماعت کی، عدالت نے وزیراعظم کی جانب سے مستقل حاضری معافی کی درخواست منظور کر لی ۔ عدالت کی جانب سے یہ ہدایت کی گئی کہ جب بھی شہباز شریف کو طلب کیا جائے گا تو وہ پیش ہوں گے ۔ سماعت کے دوران نیب تفتیشی آفیسر نے عدالت کو بتایا کہ ندیم ضیاء اور کامران کیانی کے حوالے سے تحقیقات جاری ہیں جو جلد مکمل کر کے رپورٹ پیش کر دی جائے گئی، جس پر عدالت نے تفتیشی آفیسر کو تحقیقات مکمل کر کے جلد رپورٹ پیش کرنے کا حکم دے دیا۔ ریفرنس میں شریک ملزم بلال قدوائی نے بریت کی درخواست دائر کی، عدالت نے بریت درخواست پر نیب کو نوٹس جاری کر دئیے جبکہ ملزم کامران کیانی اور ندیم ضیاء کی عبوری ضمانت میں 7اکتوبر تک توسیع کر دی گئی۔ واضح رہے کہ شہباز شریف نے وزارت عظمیٰ کی مصروفیات کی وجہ سے آشیانہ ریفرنس میں حاضری سے استثنیٰ کی درخواست دائر کی تھی۔