اسماعیل ہانیہ کی شہادت پرترکیہ، روس،قطراور چین کی شدیدالفاظ میں مذمت

حماس نمائندے نے اسماعیل ہنیہ کی شہادت کا آنکھوں دیکھا حال بتا دیا

ویب ڈیسک: مقبوضہ فلسطین کی مزاحمتی تنظیم حماس کے سربراہ اسماعیل ہنیہ کی شہادت سے متعلق نئی تفصیلات سامنے آگئیں۔

ایران اور پاکستان میں حماس کے نمائندے ڈاکٹر خالد القدومی نے شہید اسماعیل ہنیہ پر حملے کی رات سے متعلق نئے انکشافات کیے ہیں،خالد قدومی اسی عمارت میں مقیم تھے جہاں اسماعیل ہنیہ کو حملہ کرکے شہید کیا گیا۔

ایرانی خبر رساں سرکاری ایجنسی ارنا کے مطابق اپنے انٹرویو میں ڈاکٹر خالد القدومی نے نیویارک ٹائمز کی رپورٹ کو مسترد کردیا،انہوں نے بتایاکہ رات کے ایک بجکر 37 منٹ پرپوری عمارت لرز اٹھی اور عمارت اس طرح لرزی تھی کہ پہلے میں سمجھا زلزلہ آگیا یا بجلی کی گرج اور چمک ہے لیکن کھڑکی کھول کے باہر دیکھا تو بارش کے کوئی آثار نہیں تھے اور ہوا گرم تھی۔

فوراً اپنے کمرے سے نکلا تو دھواں دیکھا اورجہاں شہید اسماعیل ہنیہ کا کمرہ تھا اس چوتھی منزل پر گیا اور دیکھا  دیوار اور چھت گرگئی ہے، کمرے اور شہید اسماعیل ہنیہ کی لاش کی حالت بتارہی تھی کہ یہ فضا سے گرائی جانے والی کسی چیز یا میزائل حملے کا نتیجہ ہے۔

ڈاکٹر خالد القدومی نے امریکی اور اسرائیلی میڈیا کی ان خبروں (جن میں کہا گیا ہے اسماعیل ہنیہ کے بیڈ کے نیچے بم رکھا گیا تھا) گمراہ کن قرار دیا اور کہا کہ زمینی حقائ‍ق نیویارک ٹائمز اور اسرائیلی فوج کے ترجمان کی کہانیوں کے برعکس ہیں.

خالد قدومی نے بتایاکہ حملے سے پہلے ہم سب بیٹھ کر اسماعیل ہنیہ سے گفتگو کررہے تھے ، انہوں نے بتایا کہ آج پندرہ وزرائےاعظم اور وزرائے خارجہ سےملاقات ہوئی۔

یاد رہے کہ اسماعیل ہنیہ کو 31 جولائی کو تہران میں اس وقت شہید کیا گیا جب وہ ایرانی صدر مسعود پزشکیان کی تقریب حلف میں شرکت کیلئے ایران کے دارالحکومت میں موجود تھے۔

وکٹری کا نشان، اسماعیل ہنیہ کی شہادت سے قبل آخری ویڈیو

ویب ڈیسک: حماس سربراہ اسماعیل ہنیہ کی ایران میں شہادت سے قبل آخری ویڈیو اور تصویر سامنے آئی ہے جس میں انہوں نے وکٹری کا نشان بھی بنایا۔

تفصیلات کے مطابق دو روز قبل تہران میں مبینہ میزائل حملے میں شہید کیے جانے والے حماس کے سربراہ اسماعیل ہنیہ کی شہادت سے قبل کی ویڈیو اور تصویر سوشل میڈیا پر تیزی سے وائرل ہو رہی ہے جس کو ان کی زندگی کی آخری ویڈیو اور تصویر کہا جا رہا ہے۔

ایران کے نیم سرکاری خبر رساں ادارے کی ایک ویڈیو اس وقت سوشل میڈیا پر بڑی تعداد میں شیئر کی جا رہی ہے جس کو کئی دیگر بین الاقوامی میڈیا نے بھی نشر کرنا شروع کیا ہے۔

اس ویڈیو میں اسماعیل ہنیہ کو نومنتخب ایرانی صدر مسعود پیز شکیان سے ہنستے مسکراتے گلے ملتے اور گفتگو کرتے دیکھا جاسکتا ہے جب کہ اس موقع پر دونوں رہنماؤں کے ساتھ بڑی تعداد میں دیگر لوگ بھی موجود ہیں۔

ویڈیو میں اسماعیل ہنیہ ہاتھوں سے وکٹری کا نشان بھی بنایا،جس وقت یہ ویڈیو بنائی جا رہی تھی تو وہاں موجود کسی کے بھی وہم وگمان میں نہ ہوگا کہ وہ اسماعیل ہنیہ کو آخری بار دیکھ رہے ہیں،ویڈیو وائرل ہونے کے بعد اس پر صارفین کے تبصرے بھی جاری ہیں اور اکثر نے اسے تاریخی ویڈیو قرار دے دیا ہے۔

واضح رہے کہ حماس سربراہ اسماعیل ہنیہ جو ایرانی صدر مسعود پیز شکیان کی تقریب حلف برداری میں شرکت کے لیے ایران گئے تھے،انہیں تقریب کے بعد بدھ کی علی الصباح تہران میں اس گیسٹ ہاؤس میں جہاں وہ مقیم تھے مبینہ میزائل حملے میں محافظ سمیت شہید کر دیا گیا تھا۔

اسماعیل ہنیہ کی شہادت سے متعلق امریکی اخبار کا بڑا دعویٰ

ویب ڈیسک: فلسطین کی مزاحمتی تنظیم حماس کے سیاسی ونگ کے سربراہ  اسماعیل ہنیہ کی تہران میں شہادت سے متعلق  امریکی اخبار  نے دعویٰ کیا ہےکہ ان کی شہادت بم پھٹنے سے ہوئی ہے۔

امریکی اخبار  نیویارک ٹائمز نے دعویٰ کیا ہےکہ ایرانی دارالحکومت تہران میں جس کمرے میں اسماعیل ہنیہ موجود تھے وہاں  بم پہلے سے نصب کیا گیا تھا اور  ریموٹ کنٹرول  سے دھماکا کیا گیا,اسماعیل ہنیہ جس گیسٹ ہاؤس میں ٹھہرے ہوئے تھے وہ ایران کے پاسداران انقلاب فورس کی زیر نگرانی ایک وسیع کمپاؤنڈ میں واقع ہے اور وہاں پر 2 ماہ قبل ہی بم پہنچا دیا گیا تھا,ایران نے اب تک اسماعیل ہنیہ کی شہادت کی سرکاری تفصیل جاری نہیں کی ہے۔

امریکی اخبار کے مطابق دھماکا اتنا شدید تھا کہ عمارت ہل کر رہ گئی اور کچھ کھڑکیاں ٹوٹ گئیں اور عمارت کی ایک بیرونی دیوار بھی جزوی طور پر گرگئی۔

اخبار کے مطابق اسماعیل ہنیہ اس سے قبل بھی تہران آمد پر مذکورہ گیسٹ ہاؤس میں قیام کرچکے تھے,ایران اور حماس نے واقعےکا ذمہ دار اسرائیل کو قرار دیا ہے جب کہ بعض امریکی حکام نے بھی نام نہ بتانے کی شرط پر خیال ظاہر کیا ہے کہ اس میں اسرائیل ہی ملوث ہے۔

اسرائیل نے عوامی سطح پر اب تک  واقعےکی ذمہ داری قبول نہیں کی ہے تاہم اخبار کا دعویٰ ہےکہ  اسرائیل نےکارروائی سے قبل امریکا اور دیگر مغربی حکومتوں کو آگاہ کردیا تھا۔

امریکی اخبار کے مطابق یہ واقعہ ایرانی انٹیلی جنس اور سکیورٹی کی بہت بڑی ناکامی اور پاسداران انقلاب کے لیے باعث شرمندگی ہے۔

یہ واضح نہیں ہوسکا کہ گیسٹ ہاؤس میں بم کس طرح چھپایا گیا تاہم ذرائع نے امریکی اخبار کو بتایا کہ اس قتل کی منصوبہ بندی میں مہینوں لگے۔

دوسری جانب اسرائیلی مبصرین نے دعویٰ کیا ہے کہ اسماعیل ہنیہ کو گائیڈڈ میزائل سے نشانہ بنایا گیا,مبصرین کے مطابق  یہ میزائل اسپائک این ایل اوایس تھا جو کہ  جدید ترین اسرائیلی گائیڈڈ میزائل ہے۔

 نیویارک ٹائمز کے مطابق اسماعیل ہنیہ کے قتل نے غزہ جنگ کے خاتمے کے لیے جاری مذاکرات کو شدید دھچکا پہنچایا ہے,کیونکہ حماس کے سیاسی ونگ کے سربراہ کی حیثیت سے اسماعیل ہنیہ جنگ بندی مذاکرات کے اہم رکن تھے۔
 
 

اسماعیل ہنیہ کی شہادت کے بعد حماس کا نیا سربراہ کون؟

ویب ڈیسک: فلسطینی مزاحمتی تحریک حماس کے سربراہ اسماعیل ہنیہ کی ایرانی دارالحکومت تہران میں ہونے والے حملے میں شہادت کے بعد یہ سوال پیدا ہوگیا ہے کہ اسماعیل ہنیہ کا جانشین کون ہوگا۔

غیر ملکی میڈیا کے مطابق حماس کی شوریٰ کونسل ہر 4 سال بعد حماس کے سیاسی دفتر کے سربراہ کے لیے الیکشن کرواتی ہے، 2021 میں کروائے گئے انتخابات میں اسماعیل ہنیہ حماس کے سیاسی دفتر کے سربراہ منتخب ہوئے تھے۔

حماس کی شوریٰ کونسل میں غزہ، مغربی کنارے، بیرون ملک مقیم اراکین اور اسرائیلی قید میں موجود اسیران شامل ہوتے ہیں، انتخابات کے ذریعے ہی ان چاروں ونگز کے سربراہان کا انتخاب بھی ہوتا ہے۔

اس وقت یحییٰ سنوار غزہ میں، زہیر جبارین مغربی کنارے میں، خالد مشعل بیرون ملک اور  سلامہ کتاوی جیل میں حماس کے رہنما ہیں، حماس کا سیاسی دفتر ان تمام ونگز کی نگرانی کرتا ہے اور  اسماعیل ہنیہ اس دفتر کے سربراہ تھے۔

موجودہ حالات میں اس بات کا امکان ہے کہ نئے انتخابات منعقد نہ کروائے جائیں کیونکہ شوریٰ کونسل کے غزہ میں موجود کئی افراد شہید ہوچکے ہیں جبکہ مغربی کنارے کے بہت سے اراکین گرفتار ہیں۔

 غیر ملکی میڈیا کے مطابق ان حالات میں خالد مشعل حماس کے سیاسی دفتر کی سربراہی کے مضبوط امیدوار ہوسکتے ہیں جو ماضی میں بھی 21 سال تک حماس کے سربراہ رہے ہیں۔

خالد مشعل ایک بااثر  شخصیت سمجھے جاتے ہیں اور اس بات کا اظہار اس وقت بھی ہوا جب اسماعیل ہنیہ کی شہادت کے بعد فلسطینی اتھارٹی کے صدر محمود عباس نے خالد مشعل کو فون کرکے تعزیت کا اظہار کیا۔

اسماعیل ہنیہ کے نائب موسیٰ ابو مرزوق بھی حماس کے سیاسی دفتر کی سربراہی کے امیدوار ہوسکتے ہیں، موسیٰ ابو مرزوق نے اسرائیل اور حماس کے درمیان مذاکرات میں بھی اہم کردار ادا گیا ہے۔

اسماعیل ہنیہ کے قتل کا جواب ’خصوصی آپریشنز‘ ہونگے،  ایران

(ویب ڈیسک ) اقوام متحدہ میں ایران کے مستقل مشن  کا کہنا ہے کہ  حماس کے سربراہ اسماعیل ہنیہ کے قتل کا جواب ’خصوصی آپریشنز‘ ہونگے۔

اقوام متحدہ میں ایران کے مستقل مشن  کی جانب سے  ایکس پر ایک پیغام میں کہا گیا ہے کہ   قتل کا جواب درحقیقت خصوصی آپریشنز ہوں گے ، مجرم کے دل میں ندامت پیدا کرنے کے لیے۔

یہ پیغام واضح طور پر تہران میں حماس کے سربراہ اسماعیل ہنیہ کے قتل کے حوالے سے آیا ہے، جو نئے  ایرانی صدر کو انتخابات میں کامیابی پر مبارکباد دینے کے لیے تہران تشریف لائے تھے۔

ایران کے صدر مسعود پزشکیان نے وعدہ کیا ہے کہ  اسرائیل کو "اپنی بزدلانہ کارروائی پر پچھتاوا" کرے گا۔ایران کے سپریم لیڈر آیت اللہ علی خامنہ ای  نے بھی کہا  ہے کہ  اسماعیل ہنیہ کے قتل کا بدلہ لینا تہران کا فرض ہے۔

ایران میں اسماعیل ہنیہ کی شہادت، قم   میں انتقام کی علامت 'سرخ پرچم ' لہرادیا گیا

(ویب ڈیسک ) ایرانی دارالحکومت تہران میں حماس کے سربراہ اسمایل ہنیہ کی شہادت کے بعد قم  میں انتقام کی علامت سرخ پرچم لہرادیا گیا ۔

خیال رہے کہ  حماس کے سربراہ اسماعیل ہنیہ آج ایرانی دارالحکومت تہران میں اسرائیلی حملے میں شہید ہوگئے ہیں ، وہ وہاں نو منتخب ایرانی صدر محمود پزشکیان کی تقریب حلف برداری  میں شرکت کیلئے  گئے تھے۔

ایرانی سپریم لیڈر آیت اللہ خامنہ ای نے اسماعیل ہنیہ کی شہادت پر ردعمل دیتے ہوئے کہا کہ ہنیہ کے قتل کا بدلہ لینا تہران کا فرض ہے۔ پاسداران انقلاب  نے کہا کہ اسماعیل ہنیہ کے قتل کا سخت اور دردناک جواب دیا جائے گا۔

ادھر  ایران کے شہر قم کی مسجد جُمکران میں ایرانی روایات کے مطابق انتقام کی علامت سرخ پرچم بھی لہرادیا گیاہے۔

یاد رہے کہ اس سے قبل  2020 میں عراق میں ایرانی قدس فورس کے کمانڈر جنرل قاسم سلیمانی کے امریکی حملے میں قتل کے بعد سرخ پرچم لہرایا گیا تھا۔

اسماعیل ہنیہ کی شہادت پر ایران میدان میں آگیا

ویب ڈیسک: ایرانی سپریم لیڈر  آیت اللہ خامنہ ای نے اسماعیل ہنیہ کی شہادت پر ردعمل دیتے ہوئے کہا کہ ہنیہ کے قتل کا بدلہ لینا تہران کا فرض ہے۔ 

عرب میڈیا کے مطابق آیت اللہ خامنہ ای نے اپنے بیان میں کہا کہ اسرائیل نے اپنے لیے سخت سزا کی بنیاد فراہم کی ہے اور ایران اپنے ملک کے اندر ہونے والے  اسماعیل ہنیہ کے قتل کا بدلہ لینا اپنا فرض سمجھتا ہے۔ 

ایرانی سپریم لیڈر  نے کہا کہ مجرم اور دہشتگرد صیہونی حکومت نے ہمارے گھر میں ہمارے مہمان کو شہید کیا اور ہمیں سوگوار کیا۔ 

آیت اللہ خامنہ ای کا کہنا تھا کہ اسماعیل ہنیہ نے ایک قابل عزت راہ میں سالوں تک جان داؤ پر لگا کر جدوجہد کی اور شہادت کے لیے ہمیشہ تیار رہے جب کہ انہوں نے اپنے لوگ اور بچے بھی اس راہ پر قربان کیے۔ 

اسماعیل ہنیہ کے قتل میں امریکا ملوث نہیں ، امریکی وزیر خارجہ

(ویب ڈیسک ) امریکی وزیر خارجہ انٹونی بلنکن نے کہا ہے کہ حماس رہنما کے قتل میں امریکا ملوث نہیں ہے۔

امریکی وزیر خارجہ انٹونی بلنکن نے بدھ کے روز کہا کہ حماس کے رہنما اسماعیل ہنیہ کے قتل میں امریکا ملوث نہیں ہے، اور غزہ میں جنگ بندی  سب سے اہم ہے۔

انٹونی بلنکن نے سنگاپور کے دورے کے دوران چینل نیوز ایشیا کے ساتھ ایک انٹرویو میں کہا کہ  "یہ وہ چیز ہے جس کے بارے میں ہمیں علم نہیں تھا یا ہم اس میں ملوث نہیں تھے۔ اس کا اندازہ لگانا بہت مشکل ہے۔"

اسماعیل ہانیہ کےبیٹے اور بہوکا جذباتی پیغام

ویب ڈیسک: اسماعیل ہانیہ کے بیٹے نے والد کی شہادت پر پیغام دیتے ہوئے کہا ہے کہ میرے والد 4 قاتلانہ حملوں میں بچے،آج اللہ نے انہیں وہ شہادت کا رتبہ عطا کیا جبکہ  اسماعیل ہانیہ کی بہو کاکہناتھا کہ آج میرے سسر شہدا میں شامل ہو گئے۔

تفصیلات کے مطابق عبدالسلام ہانیہ نے کہا ہے کہ والد کے قتل سے اسرائیل کے خلاف فلسطینیوں کی مذاحمت ختم نہیں ہوگی،والد کی شہادت اس مزاحمت کو نہیں روکے گی جو آزادی کے حصول تک لڑی جائے گی۔

عبدالسلام ہانیہ نے مزید کہا ہے کہ میرے والد قومی اتحاد قائم کرنے اور تمام فلسطینی دھڑوں کے اتحاد کے لیے کوشاں تھے،میرے والد چار قاتلانہ حملوں میں بچے، آج اللہ نے انہیں وہ شہادت کا رتبہ عطا کیا۔

دوسری جانب اسماعیل ہانیہ کی بہو کاکہناتھا کہ آج میرے سسر شہدا میں شامل ہو گئے،خداہماری قسمت بدلے گا، غم بہت بڑا ہے، آنکھیں اشک بار، دل غمزدہ ہے،خدا ہمیں بہترحالات عطا کرے گا۔

یادر ہے کہ  ایرانی سکیورٹی حکام اور حماس نے اسماعیل ہانیہ کی شہادت کی تصدیق کردی ہے، اسماعیل ہانیہ کو یہودی ایجنٹوں نے نشانہ بنایا ہے۔

ایرانی خبر ایجنسی کے مطابق اسماعیل ہانیہ ایرانی صدر کی تقریب حلف برداری میں شرکت کیلئے تہران گئے تھے۔

ایرانی حکام کا کہنا ہے کہ اسماعیل ہانیہ کو تہران میں ان کی رہائش گاہ پر بدھ کی صبح نشانہ بنایا گیا، حملے میں اسماعیل ہانیہ کا سکیورٹی گارڈ بھی شہید ہوا ہے۔

ایران کا کہنا ہے کہ قاتلانہ حملے کی تحقیقات کے نتائج جلد سامنے لائے جائیں گے۔

یاد رہے کہ اس سے قبل غزہ جنگ کے دوران اسماعیل ہانیہ کے خاندان کے بھی درجنوں افراد شہید ہو چکے ہیں۔

اسماعیل ہانیہ کےقتل کا ضرور جواب دیا جائےگا،حماس کےسینیئر رہنما

ویب ڈیسک: فلسطینی عسکریت پسند تنظیم حماس کے ایک سینیئر عہدیدار نے کہا ہے کہ تنظیم کے سیاسی سربراہ اسماعیل ہنیہ کی ہلاکت کا بدلہ لیا جائے گا۔

تفصیلا ت کے مطابق حماس رہنما موسیٰ ابو مرزوق نے کہا کہ اسماعیل ہانیہ کا قتل ایک بزدلانہ فعل ہے جس کی سزا دی جائے گی،فلسطینی مزاحمتی تنظیم حماس نے اپنے سربراہ اسماعیل ہانیہ کی شہادت پر بیان جاری کردیا۔

اسماعیل ہنیہ کی شہادت پر حماس کی جانب سے جاری بیان میں کہا گیا ہےکہ ہانیہ کی شہادت پر فلسطینی عوام سے تعزیت کا اظہار کرتے ہیں،شہادت پر عرب عوام، امت مسلمہ اور دنیا بھر کے انصاف پسند عوام سے اظہار تعزیت کرتے ہیں،ہانیہ کے قتل سے اسرائیل کو اس کے مقاصد حاصل نہیں ہوں گے۔

حماس کے زیرِ انتظام الاقصیٰ ٹیلی ویژن چینل کے مطابق موسیٰ ابو مرزوق نے اس حملے کو ’بزدلانہ کارروائی‘ قرار دیتے ہوئے کہا ہے کہ اس کا بدلہ لیا جائے گا۔

ایرانی صدر کا اسماعیل ہانیہ کی شہادت کا بدلہ لینے کا اعلان

ویب ڈیسک: ایران کے نومنتخب صدر مسعود پزشکیان نے حماس رہنما اسماعیل ہانیہ کی شہادت کابدلہ لینے کا اعلان کردیا۔

 تفصیلات کے مطابق ایرانی صدر نے کہاہے کہ اسماعیل ہنیہ پر حملہ کا بدلہ لیں گے،بزدلانہ حملے کا حساب دینا پڑے گا۔

قبل ازیں ایرانی وزارت خارجہ نے تہران میں حماس کے سربراہ اسماعیل ہانیہ کی شہادت پر رد عمل دیتے ہوئے کہا ہے کہ ہانیہ کی شہادت تہران فلسطین تعلق کو مزید مضبوط کرے گی۔

تہران میں حماس کے رہنما کی شہادت کے بعد ایرانی وزارت خارجہ کے ترجمان ناصر کنانی نے بتایا کہ اسماعیل ہانیہ کا خون کبھی رائیگاں نہیں جائے گا، تہران میں اسماعیل ہانیہ کی شہادت تہران، فلسطین اور مزاحمت کے درمیان گہرے اور اٹوٹ بندھن کو مضبوط کرے گی۔

یاد رہے کہ آج فلسطین کے سابق وزیراعظم اور حماس کے سربراہ اسماعیل ہنیہ کو ایران میں قاتلانہ حملے میں شہید کردیا گیا، حماس نے ان کی موت کی تصدیق کرتے ہوئے دعویٰ کیا کہ اسماعیل ہانیہ کو یہودی ایجنٹوں نے نشانہ بنایا جس کا بدلہ لیا جائے گا۔

اسماعیل ہانیہ کی شہادت پر ترجمان وائٹ ہاؤس کاتبصرےسےگریز

ویب ڈیسک: حماس کے سربراہ اسماعیل ہانیہ کی شہادت پر ترجمان وائٹ ہاؤس نے تبصرے سے گریزکیا ہے۔

 امریکی میڈیا کے مطابق تہران میں حماس سربراہ اسماعیل ہانیہ کی شہادت پر وائٹ ہاؤس کے ترجمان نے فوری کسی قسم کا کوئی بیان جاری نہیں کیا۔

حماس نے تصدیق  کرتے ہوئےکہا کہ تہران میں اسرائیلی حملے میں حماس رہنما اسماعیل ہنیہ شہید ہو گئے، خبر ایجنسی کے مطابق حملے میں اسماعیل ہنیہ کا ایک محافظ بھی شہید ہوا۔

اسماعیل ہانیہ ایرانی صدر کی تقریب حلف برداری میں شرکت کیلئے ایران میں تھے۔

اسرائیلی میڈیا کے مطابق اسرائیلی وقت کے مطابق تقریباً2بجے تہران کے قلب ایک میزائل فائر کیا گیا،اسماعیل ہانیہ اور ان کے محافظ کو تہران میں ان کی رہائشگاہ پر نشانہ بنایاگیا،ا سماعیل ہانیہ غزہ جنگ بندی مذاکرات میں بطور مذاکرات کار شریک تھے۔حماس رہنما اسماعیل ہنیہ فلسطینی گروپ کی بین الاقوامی سفارت کاری کا چہرہ تھے، انہیں 2017میں حماس کا سربراہ مقرر کیا گیا تھا۔

امریکی وزیر دفاع

امریکی وزیر دفاع لائیڈ آسٹن کا کہنا ہے کہ اسرائیل پر حملہ ہوا تو امریکا یقینی طور پر اسرائیل کے دفاع میں مدد کرےگا،امریکا کی ترجیح خطے میں کشیدگی کو کم کرنا ہے،میں نہیں سمجھتاکہ مشرق وسطیٰ میں ایک وسیع جنگ ناگزیر ہے۔

لائیڈ آسٹن  نے کہا ہے کہ امریکا خطے میں بڑھتی کشیدگی کو ٹھنڈا کرنے کی کوشش کر رہا ہے،ہرممکن کوشش کررہے ہیں کہ خطے میں وسیع تر تنازعہ میں تبدیل ہونے سے بچائیں۔

شہیداسماعیل ہانیہ کا ساراخاندان فلسطین پر قربان

ویب ڈیسک: ایران کے دارالحکومت تہران میں ایک حملے میں شہید ہونے والے فلسطینی مزاحمتی تنظیم حماس کے سربراہ اسماعیل ہانیہ کے پورے خاندان نے فلسطین کاز کے لیے قربانی دی ہے۔ عیدالفطر کے موقع پر ایک حملے میں اسماعیل ہانیہ کے تین بیٹوں اور پوتے سمیت اُن کے خاندان کے 10 افراد شہید ہوگئے تھے۔ غزہ میں اسماعیل ہانیہ کے گھر پر کیے جانے والے حملے میں اُن کی ایک بہن بھی شہید ہوئی تھی۔

تفصیلات کے مطابق الجزیرہ کو انٹرویو میں اسماعیل ہانیہ نے بتایا تھا کہ اسرائیلی فوج کے حملے میں ان کے بیٹے ہازم، عامر اور محمد اور ان کے پوتے شہید ہوئے۔ ایک اسرائیلی اخبار نے اسماعیل ہانیہ کے خاندان کے 14 افراد کی شہادت کا دعوٰی کیا تھا۔

اسماعیل ہانیہ کا شمار حماس کے انتہائی اولوالعزم رہنماؤں میں ہوتا تھا۔ انہوں نے زندگی بھر فلسطین پر اسرائیلی قبضے کے خلاف جدوجہد کی اور کسی بھی مرحلے پر اُن کے قدم نہیں ڈگمگائے۔ اسرائیلی قیادت اور فوج دونوں ہی اسماعیل ہانیہ کی سرگرمیوں کی خبر رکھتی تھیں اور ان کی نقل و حرکت کو باقاعدگی سے مانیٹر کیا جاتا تھا۔

چند ہفتوں کے دوران غزہ میں اسرائیلی جارحیت بھی بڑھ گئی تھی اور اسرائیلی فوج پر حملوں میں بھی شدت آگئی تھی۔ حماس کے علاوہ اب یمن کی حوثی ملیشیا اور لبنان کی حزب اللہ ملیشیا بھی میدان میں ہیں۔ ان سب نے باری باری اسرائیل کی حدود میں متعدد مقامات کو نشانہ بنایا ہے۔ اس کے نتیجے میں اسرائیل میں خوف بڑھا ہے اور اسرائیلی قیادت کی بدحواسی میں بھی اضافہ ہوا ہے۔

اسماعیل ہانیہ نے کسی بھی اپنی جدوجہد کے کسی بھی موڑ پر سمجھوتے یا اصولوں پر سودے بازی کی بات نہیں کی۔ اُن کی زندگی اس اصولی موقف کے گرد گزری کہ فلسطین کی آزادی پر کسی حال میں سمجھوتا نہیں کیا جاسکتا۔ یہی سبب ہے کہ اسرائیلی حکومت اور فوج دونوں ہی اُنہیں شہید کرنے کے درپے رہتی تھیں اور بالآخر اُنہوں نے اپنا یہ مقصد حاصل کرہی لیا۔

اسماعیل ہانیہ کی قیادت میں حماس نے اپنے آپ کو اسرائیلی جارحیت کے خلاف ثابت قدم رہنے کے لیے اچھی طرح تیار کیا۔ حماس کے کارکنوں کے لیے اسماعیل ہانیہ کا حوصلہ مشعلِ راہ کے مانند تھا۔ وہ اپنی تقریروں میں انتہائی جوش و خروش کے ساتھ اس نکتے پر زور دیتے تھے کہ کامیابی یا ناکامی کے بارے میں زیادہ سوچے بغیر ہمیں اپنے کاز پر دھیان دینا چاہیے۔

خیال کیا جارہا تھا کہ اپنے بیٹوں، بہن اور پوتے کی شہادت سے اسماعیل ہانیہ کے پائے استقامت میں لغزش پیدا ہوگی اور وہ اب اپنے موقف میں کسی حد تک نرمی پیدا کرنے پر مائل ہوں گے مگر ایسا نہ ہوا۔ اسماعیل ہانیہ کا یہ موقف مرتے دم تک برقرار رہا کہ اسرائیل سے فلسطینی مقبوضہ علاقے خالی کرانے تک سُکون سے نہیں بیٹھا جاسکتا اور فلسطینی شہدا کے خون سے کسی طور غداری نہیں کی جائے گی۔

اسماعیل ہانیہ کون تھے؟

اسماعیل ہانیہ غزہ شہر کے قریب ایک پناہ گزین کیمپ میں پیدا ہوئے۔ انہوں نے 1980 کی دہائی کے آخر میں حماس میں شمولیت اختیار کی اور تیزی سے حماس کے بانی اور روحانی پیشوا شیخ احمد یاسین کے قریبی ساتھی بن گئے۔

1980 اور 1990 کی دہائیوں میں اسماعیل ہانیہ نے اسرائیلی جیلوں میں کئی سزائیں کاٹیں۔ 2006 کے قانون ساز انتخابات میں حماس کی جیت کے بعد وہ فلسطینی اتھارٹی کی حکومت کے وزیر اعظم بن گئے۔ تاہم یہ قلیل مدتی رہا کیونکہ اگلے سال انہیں 2007 میں صدر محمود عباس نے ان کے عہدے سے برطرف کر دیا تھا۔

10 برس بعد 2017 میں انہیں حماس کے سیاسی شعبے کا سربراہ منتخب کیا گیا۔ اسی سال، اسماعیل ہانیہ کو امریکا نے ”خصوصی طور پر نامزد عالمی دہشت گرد“ قرار دیا تھا۔

ایران میں حملہ، حماس کے سربراہ اسماعیل ہانیہ شہید

ویب ڈیسک: فلسطین کی مزاحمتی تنظیم حماس کے سیاسی ونگ کے سربراہ اسماعیل ہانیہ کو ان کی رہائش گاہ پر حملہ کر کے شہید کردیا، اسماعیل ہانیہ کو تہران میں گولی ماری گئی۔

تفصیلات کے مطابق ایرانی سکیورٹی حکام اور حماس نے اسماعیل ہانیہ کی شہادت کی تصدیق کردی، اسماعیل ہانیہ کو یہودی ایجنٹوں نے نشانہ بنایا۔

ایرانی خبر ایجنسی کے مطابق اسماعیل ہانیہ ایرانی صدر کی تقریب حلف برداری میں شرکت کیلئے تہران گئے تھے۔

ایرانی حکام کا کہنا ہے کہ اسماعیل ہانیہ کو تہران میں ان کی رہائش گاہ پر بدھ کی صبح نشانہ بنایا گیا، حملے میں اسماعیل ہانیہ کا سکیورٹی گارڈ بھی شہید ہوا ہے۔

ایران کا کہنا ہے کہ قاتلانہ حملے کی تحقیقات کے نتائج جلد سامنے لائے جائیں گے۔

یاد رہے کہ اس سے قبل غزہ جنگ کے دوران اسماعیل ہانیہ کے خاندان کے بھی درجنوں افراد شہید ہو چکے ہیں۔

اسماعیل ہانیہ کی زندگی پر ایک نظر

اسماعیل ہانیہ 1962 میں غزہ کے شہر کے مغرب میں شطی پناہ گزین کیمپ میں پیدا ہوئے، انہوں نے 16 سال کی عمر میں اپنی کزن امل ہانیہ سے شادی کی جن سے ان کے 13 بچے ہوئے جن میں 8 بیٹے اور 5 بیٹیاں شامل ہیں۔

انہوں نے غزہ کی اسلامی یونیورسٹی سے 1987 میں عربی ادب میں ڈگری حاصل کی پھر 2009 میں اسلامی یونیورسٹی سے ڈاکٹریٹ کی اعزازی ڈگری حاصل کی۔

اسماعیل ہانیہ فلسطین کے سابق وزیراعظم، حماس کے سیاسی سربراہ اور حماس کے پولیٹیکل بیورو کے چیئرمین تھے، 2017 میں انہیں خالد مشعال کی جگہ حماس کا سیاسی سربراہ مقرر کیا گیا، وہ 2023 سے قطر میں قیام پذیر تھے۔

اسماعیل ہانیہ 1988 میں حماس کے قیام کے وقت ایک نوجوان بانی رکن کی حیثیت سے شامل تھے، 1997 میں وہ حماس کے روحانی رہنما شیخ احمد یاسین کے پرسنل سیکرٹری بن گئے، 1988 میں پہلے انتفادہ میں شرکت کرنے پر اسماعیل ہانیہ کو اسرائیل نے 6 ماہ قید میں رکھا۔

1989 میں دوبارہ گرفتاری کے بعد 1992 میں اسماعیل ہانیہ کو لبنان ڈی پورٹ کیا گیا جس کے اگلے سال اوسلو معاہدے کے بعد اسماعیل ہانیہ کی غزہ واپسی ہوئی۔

2006 میں فلسطین کے الیکشن میں حماس کی اکثریت کے بعد اسماعیل ہانیہ کو فلسطینی اتھارٹی کا وزیراعظم مقرر کیا گیا، حماس فتح اختلافات کے باعث یہ حکومت زیادہ دیر نہ چل سکی لیکن غزہ میں حماس کی حکمرانی برقرار رہی اور اسماعیل ہانیہ ہی اس کے سربراہ تھے۔