لاہور:گھریلو ملازمہ رضوانہ پر بہیمانہ تشدد کے معاملے پر نگران وزیراعلیٰ پنجاب نے وزیراعظم شہبازشریف سے ٹیلی فونک رابطہ کیا ہے ، محسن نقوی نے کیس کے حوالے سے وزیراعظم سے تبادلہ خیال کیا ہے۔ وزیراعلیٰ محسن نقوی نے کیس کے حوالے سے وزیراعظم محمد شہبازشریف سے گفتگو کی اور کہا کہ بچی کے والدین نے ملاقات میں انصاف اور مدد کی اپیل کی ، انہوں نے بچی کے والدین کی استدعا وزیراعظم محمد شہبازشریف تک پہنچائی ہے۔ وزیراعلیٰ محسن نقوی نے بچی کی صحت اورعلاج معالجے کے بارے میں بھی وزیراعظم محمد شہبازشریف کو آگاہ کیا ہے۔ وزیر اعظم محمد شہباز شریف کی جانب سے مظلوم خاندان کی ہر ممکن مدد اور فوری انصاف کی فراہمی کی یقین دہانی کی گئی ہے۔