اسلام آباد: وفاقی دارلحکومت اسلام آباد کے راول ڈیم میں زہریلے کیمیکل سے ہزاروں مچھلیاں مار دی گئیں ہیں ۔ محکمہ فشریز کے مطابق مچھلیوں کے شکا ر کے لیے کیمیکل پھینکنے سے پانی زہریلا ہوگیا۔ زہر آلود پانی پینے سے ہزاروں مچھلیاں اور پرندے تڑپ تڑپ کر مر گئے۔ پولیس کی جانب سے راول ڈیم کے قریب کارروائی کرتے ہوئے دو مشتبہ افراد کو گرفتار کر لیا گیا۔ پولیس کا کہنا ہے کہ مردہ مچھلیاں مارکیٹ میں فروخت کی جانی تھیں، مرنے والی آبی حیات کے نمونے لیبارٹری کو ارسال کر دیئے گئے ہیں جبکہ واقعے کا مقدمہ تھانہ سیکریٹریٹ میں درج کر لیا گیاہے۔ خیال رہے کہ راول ڈیم میں کرنٹ اور گرنیڈ کے ذریعے مچھلیوں کو مارنے کے واقعات پہلے بھی ہو چکے ہیں۔ راولپنڈی کے 40 لاکھ سے زائد شہریوں کو پینے کا پانی بھی راول ڈیم سے فراہم کیا جاتا ہے۔