ویب ڈیسک: ورلڈ بینک نے پاکستان سے بجلی اور گیس کے نرخوں میں اضافے کی مسلسل سفارشات کے ساتھ ساتھ پنشن اصلاحات کا بھی مطالبہ کیا ہے۔
ورلڈ بینک نے پاکستان ڈیولپمنٹ اپڈیٹ میں پنشن اصلاحات پر وفاقی اور صوبائی پبلک سیکٹر کی پنشن سے پیدا ہونے والے مالی بوجھ کو کم کرنے کے لئے فوری طور پر اصلاحات متعارف کروانے کا مطالبہ کیا ہے۔
ورلڈ بینک کے مطابق پنشن اصلاحات کے منصوبے کو تیار کرنا اور اسے لاگو کرنے کے لئے ابتدائی اقدامات کئے جائیں تاکہ طویل المدتی طور پر مالی استطاعت کو یقینی بنایا جا سکے۔ پبلک سیکٹر کے معاوضے کو معقول بنانے کے لئے اصلاحاتی منصوبے کے تحت ابتدائی اقدامات کئے جائیں۔
عالمی بینک نے بجلی گیس سیکٹر میں نرخوں کے حوالے سے اصلاحات کو رسدی لاگت کے ساتھ منسلک رکھنے کا بھی مطالبہ کیا ہے تاکہ بجلی اور گیس کے شعبے میں بڑھتے ہوئے گردشی قرضے کو محدود کیاجاسکے اور غریبوں کی سوشل پروٹیکشن کو بڑھا کر تحفظ دیاجائے۔
پرسنل انکم ٹیکس (پی آئی ٹی) کی ریونیو اصلاحات پر، عالمی بینک نے تنخواہ دار اور غیر تنخواہ دار ملازمین کیلئے اسکیموں کو ترتیب دے کر پیچیدگی کو کم کرنے کے لئے ذاتی انکم ٹیکس کے نظام میں اصلاحات کا بھی مطالبہ کیا ہے۔
ورلڈ بینک کے مطابق مراعات یافتہ طبقے کو ختم کرکے ایکویٹی بڑھانے کے لئے مخصوص آمدنی کے ذرائع کا علاج اور قابل ٹیکس آمدنی کے ذرائع میں شرح کے ڈھانچے کو ہم آہنگ کرکے ذاتی انکم ٹیکس کے نظام الاوقات میں اصلاحات کی جائیں۔
اپنی رپورٹ میں ورلڈ بینک نے سماجی طور پر نقصاندہ اشیا پر ٹیکس بڑھانے کی تجویز دیتے ہوئے کہا ہے کہ بشمول تمباکو، دیگر غیر صحت بخش مصنوعات اور ماحول کو نقصان پہنچانے والی اشیا پر ٹیکس میں اضافہ کیا جائے۔
اس کے علاوہ ورلڈ بینک نے توانائی کی مصنوعات، ٹیلی کمیونیکیشن، مالیاتی خدمات اور دیگر کی کھپت پر ذاتی انکم ٹیکس "ودہولڈنگ" چارجز کو ختم کرنے کا مطالبہ کیا ہے تاکہ غریب اور کمزور گھرانوں میں ٹیکس کے کل بوجھ کو کم کیا جا سکے۔
دوسری جانب عالمی بینک نے توانائی کے شعبے میں خطرے کی گھنٹی بجادی۔ توانائی اصلاحات نہ ہوئیں تو بجلی مزید مہنگی کرناپڑے گی۔ بجلی کے بڑھتے ریٹ سے غریب طبقے کو بچانا ہوگا۔
عالمی بینک نے پاکستان کے توانائی شعبے کے حوالے سے جاری کردہ رپورٹ میں کہا ہے کہ توانائی شعبے کے نقصانات معیشت کے لیے خطرہ ہیں۔ جنوری تک گردشی قرضہ 2635 ارب روپے تک پہنچ چکا ہے۔ بجلی کا قرضہ جی ڈی پی کا 2.4 فیصد تک پہنچ چکا ہے۔
رپورٹ میں بتایا گیا ہے کہ گیس شعبے میں سرکلر ڈیٹ 2866 ارب روپے تک پہنچ چکا ہے۔ گیس شعبے کا قرضہ معیشت کا 2.7 فیصد پہنچ چکا ہے۔ ڈسکوز کے نقصانات معیشت کے 0.5 فیصد تک پہنچ گئے ہیں۔
رپورٹ میں انکشاف ہوا ہے کہ مالی سال 2021 میں بجلی کے نقصانات معیشت کا 0.2 فیصد تھے۔ توانائی شعبے میں ترسیلی نقصانات کم کرنے کےلیے عالمی بینک معاون ہے۔ توانائی شعبے کی بروقت وصولیاں حکومت کوبہتر کرنا ہوں گی۔ توانائی، انفراسٹرکچر اور مواصلات میں نقصانات مسلسل بڑھ رہے ہیں۔
رپورٹ میں کہا گیا ہے کہ بجلی شعبے میں نقصانات چوری، ترسیل اور تقسیم کی وجہ سے ہیں۔ پرانے انفراسٹرکچر کی وجہ سے بھی نقصانات میں اضافہ ہوا۔ صارفین کے ٹیرف پر نظرثانی کرنے میں تاخیر سے بھی نقصان ہوا۔ بجلی کی قیمت اضافے سے نقصانات کو محدود کرنے میں مدد ملی۔