راولپنڈی : بلوچستان میں دہشت گردوں نے ژوب گیریژن پر حملہ کردیا ، فائرنگ کےتبادلہ میں3 دہشتگردہلاک جبکہ 4جوان شہید ہوگئے ہیں۔ پاک فوج کے شعبہ تعلقات عامہ (آئی ایس پی آر ) کی جانب سے جاری بیان کے مطابق دہشتگردوں نے ژوب گیریژن میں گھسنے کی کوشش کی جہاں ڈیوٹی پر موجود فوجیوں نے دہشتگردوں کی اس کوشش کو روکا۔ ترجمان پاک فوج کا کہنا ہے کہ فورسز اور دہشتگردوں کے درمیان شدید فائرنگ کے تبادلے میں 4 فوجی جوان شہید ہوگئے اور 3 دہشتگرد مارے گئے۔ ڈی جی آئی ایس پی آر کے مطابق دہشتگردوں سے فائرنگ کے تبادلے میں 5 سکیورٹی اہلکار زخمی بھی ہوئے ہیں جب کہ دیگر 2 دہشتگردوں کو پکڑنے کے لیے علاقے میں کلیئرنس آپریشن جاری ہے۔ پاک فوج کے ترجمان نے کہا ہے کہ سکیورٹی فورسز بلوچستان کا امن تباہ کرنے کی ہر گھناؤنی کوشش ناکام بنانے کے لیے پرعزم ہیں۔