وزیراعظم شہباز شریف نے سکھر حیدرآباد موٹروے کا سنگِ بنیاد رکھ دیا۔ تفصیلات کے مطابق وزیراعظم شہباز شریف موٹروے ایم 6 کا سنگ بنیاد رکھنے کے لئے سکھر پہنچے جہاں وفاقی وزیر مواصلات مولانا اسعد محمود، وفاقی وزیر اطلاعات مریم اورنگزیب وزیر منصوبہ بندی احسن اقبال، وزیر آئی ٹی امین الحق، قمر زمان کائرہ اور وزیراعلیٰ سندھ بھی ان کے ہمراہ تھے۔ وزیراعظم شہباز شریف نے وفاقی وزرا اور وزیراعلیٰ سندھ کے ہمراہ منصوبے کا سنگ بنیاد رکھا۔ وفاقی وزیراطلاعات مریم اورنگزیب کا کہنا ہے کہ وزیراعظم نے ایم 6 منصوبے کو 30 ماہ کی قلیل مدت میں مکمل کرنے کی ہدایت کی ہے. ترجمان این ایچ اے کا کہنا ہے کہ منصوبے پر 307 ارب روپے سے زائد لاگت آئے گی، ایم 6 کو پبلک پرائیویٹ پارٹنرشپ کی بنیاد پر تعمیر کیا جائے گا۔