راولپنڈی : آئی ایس پی آر کے مطابق آرمی چیف جنرل سید عاصم منیر کا دو روزہ ایران کا دورہ مکمل ہوگیا۔ پاک فوج کے شعبہ تعلقات عامہ (آئی ایس پی آر ) کی جانب سے جاری بیان کے مطابق آرمی چیف نے ا یران کی عسکری قیادت سے ملاقات کی، دونوں ممالک کی عسکری قیادت نے دہشتگردی کے خاتمے کے عزم کا اعیادہ کیا۔ ترجمان پاک فوج کا کہنا ہے کہ آرمی چیف نے ایران کے چیف آف جنرل اسٹاف میجر جنرل محمد باقری سے ملاقات کی، ملاقات میں دہشت گردی کو خطہ اور دونوں ممالک کے لیے مشترکہ خطرہ قرار دیا گیا، اطلاعات کے تبادلے اور مشترکہ کاروائیوں سے دہشت گردی کے خاتمہ کے عزم کا اظہار کیا گیا۔ ڈی جی آئی ایس پی آر کے مطابق آرمی چیف نے ایران کے صدر ابراہیم رئیسی اور ایرانی وزیر خارجہ امیر عبداللہیان سے بھی ملاقات کی، ملاقات میں پاک ایران تعلقات، علاقائی امن و سلامتی کے امور پر بات چیت کی گئی۔ ترجمان پاک فوج کا کہنا ہے کہ آرمی چیف کو ملٹری ہیڈ کوارٹر میں ایرانی مسلح افواج کی جانب سے گارڈ آف آنر بھی پیش کیا گیا۔