اسلام آباد: سابق وزیراعظم اور پاکستان تحریک انصاف ( پی ٹی آئی ) کے چیئرمین عمران خان نے الیکشن کمیشن کے دفتر کے باہر احتجاج پر مقدمے سے دہشتگردی کی دفعات نکالنے لے لئے درخواست دائر کر دی ہے ۔ پاکستان تحریک انصاف کے چیئرمین عمران خان نے مقدمے سے دہشتگردی کی دفعات حذف کرنے کے لئے پراسیکیوٹر جنرل سے درخواست کی ہے ۔ سابق وزیراعظم عمران خان کی جانب سے انسداد دہشتگردی عدالت میں دائر درخواست میں یہ موقف اختیار کیا گیا ہے کہ مقدمے میں سے دہشتگردی کی دفعات ختم کر دی جائیں، واقعات کو سامنے رکھتے ہوئے دہشتگردی کی دفعات مضحکہ خیز ہیں ، مقدمے میں دہشتگردی کی دفعات سپریم کورٹ کے 7 رکنی بنچ کے فیصلے کی بھی توہین ہے ۔ درخواست میں مزید بتایا گیا ہے کہ دہشتگردی کے قانون کا استعمال سیاسی مخالفین کو دبانے اور سیاسی مفادات کے لئے ہو رہا ہے جو کہ تباہ کن ہے ، ان حربوں سے حکومت کی دہشتگردی معاملے میں غیر سنجیدگی کا اظہار بھی ہوتا ہے ، اس لئے مقدمے سے دہشتگردی کی دفعات حذف کی جائیں ۔