اسلام آباد: (ویب ڈیسک) وفاقی وزیر صحت عبدالقادر پٹیل نے اپنا عہدہ اٹھاتے ہی بڑا اعلان کر دیا۔ انہوں نے کہا کہ زندگی بچانے والی ادویات کی قیمتوں میں کمی اولین ترجیح ہے۔ عبدالقادر پٹیل نے کہا ہے کہ ادویات کی قیمتوں میں اضافےکی تفصیلات منگوا لی ہیں۔ ادویات کی قیمتوں میں کمی کے حوالے سے کابینہ اور وزیراعظم سے رہنمائی لی جائے گی۔ وفاقی وزیر کا کہنا تھا کہ صحت ایسا شعبہ ہے جس پر ٹیکس کم سے کم ہونا چاہیے۔ صحت کے شعبے میں ٹیکس میں کمی بارے وزارت خزانہ کا تعاون بھی درکار ہوگا۔ ان کا کہنا تھا کہ حکومت کی کوشش ہوگی کہ غریب کو سستا اور معیاری علاج مہیا کیا جا سکے۔ وعدہ ہے زندگی بچانے والی سستی ادویات جلد عوام کی پہنچ میں ہونگی۔