بیجنگ: روس یوکرین تنازع کے درمیان چین نے امریکا کو براہ راست وارننگ دے دی۔ چین نے امریکہ سے کہا ہے کہ اس کے ساتھ سخت مقابلے کی وجہ سے مکمل تصادم کی صورتحال پیدا ہو سکتی ہے۔ چینی کمیونسٹ حکومت نے پہلے کہا تھا کہ اگر امریکہ تائیوان کو ہتھیار فروخت کرتا ہے تو وہ ضرور کوئی قدم اٹھائے گی۔ اس نے امریکی کمپنیوں لاک ہیڈ مارٹن اور ریتھیون ٹیکنالوجیز پر بھی پابندیاں عائد کر دی ہیں۔
چین تائیوان اور یوکرین کے تنازع میں امریکی سرگرمی سے سخت ناراض ہے۔ خاص طور پر تائیوان کے معاملے پر امریکہ کے بیانات نے اسے بنیادی طور پر ناراض کردیا ہے۔ بیجنگ کا کہنا ہے کہ تائیوان کے ساتھ ہتھیاروں کا معاہدہ ملک کے سلامتی کے مفادات اور دو طرفہ تعلقات کو نقصان پہنچاتا ہے۔ دونوں کمپنیوں نے 7 فروری کو تائیوان کو 100 ملین ڈالر مالیت کے ہتھیاروں کی فروخت کا اعلان کیا۔ اس لیے چین نے جوابی کارروائی کے طور پر پابندیوں کا قدم اٹھایا ہے۔
یہ تیسرا موقع ہے جب چین نے لاک ہیڈ مارٹن اور ریتھیون ٹیکنالوجیز کے خلاف تائیوان کو ہتھیار فروخت کرنے پر سخت اقدامات کیے ہیں۔ اس سے قبل 620 ملین ڈالر کے میزائل اپ گریڈ پیکج کے حوالے سے بھی پابندی کا اعلان کیا گیا تھا۔ جولائی 2020 میں اس معاملے پر تائیوان اور امریکہ کے درمیان ایک معاہدہ طے پایا تھا۔ چین کا کہنا ہے کہ تائیوان کو چینی خودمختاری قبول کرنی چاہیے۔ چین کئی بار تائیوان کو اپنا حصہ بنانے کے لیے فوج کے استعمال کی بات بھی کر چکا ہے۔
دوسری جانب یوکرین کے تنازع کے حوالے سے امریکا نے انتہائی سخت موقف اپنایا ہے۔ امریکہ، یورپی یونین، نیٹو، برطانیہ سمیت کئی ممالک نے روس پر پابندیوں کا اعلان کیا ہے۔ وائٹ ہاؤس کی پریس سیکریٹری جین ساکی کے مطابق صدر جو بائیڈن جلد ہی یوکرین کے ڈی پی آر (ڈونیٹسک) اور ایل پی آر (لوگانسک) علاقوں میں نئی سرمایہ کاری، تجارت اور فنانسنگ پر پابندی کا ایک ایگزیکٹو آرڈر جاری کریں گے۔ یہ قدم روس کی جانب سے ان خطوں کو علیحدہ ملک تسلیم کیے جانے کے بعد اٹھایا جا رہا ہے۔