اسلام آباد: وزارت داخلہ نے وفاقی وزیر اطلاعات مریم اونگزیب کی حراسگی میں ملوث 14 پاکستانیوں کا ڈیٹا حاصل کر لیا ہے۔ ذرائع کے مطابق وزارت داخلہ ملوث افراد کے خلاف کارروائی کے لیے متحرک ہوگئی ہے، وزارت داخلہ نے حراسگی میں ملوث 14 پاکستانیوں کا ڈیٹا حاصل کر لیا جن میں چار خواتین اور دس مرد شامل ہیں۔ ذرائع نے بتایا ہے کہ حراساں کرنے والوں کی شہریت کے حوالے سے بھی تمام تفصیلات حاصل کرلی گئیں، ان افراد کےپاکستان سے جاری تمام کریکٹرسرٹیفکیٹ منسوخ کرنے کا فیصلہ کیا گیا ہے، کریکٹر سرٹیفکیٹ وزارت داخلہ اور مختلف پولیس افسران کی جانب سے جاری کیے گئے۔ ذرائع کے مطابق ان افراد کے نائیکوپ اور پاسپورٹ منسوخ کرنے پر بھی غور کیا جا رہا ہے،وزارت داخلہ تمام معلومات کابینہ میں پیش کرے گی۔