جوسمجھتے ہیں چوتھی باروزیراعظم بن رہےہیں سخت غلط فہمی میں ہیں،بلاول بھٹو

ویب ڈیسک: چیئرمین پیپلزپارٹی بلاول بھٹو زرداری نے کہا ہے کہ جوسمجھتے ہیں کہ وہ چوتھی بار وزیراعظم بن رہے ہیں وہ سخت غلط فہمی میں ہیں، کوئی ہمارے آئین کو نہ مانے تو اس کو منہ توڑ جواب دینگے، سابق چیئرمین پی ٹی آئی وزیراعظم نہیں بن سکتے۔

راولپنڈی کے لیاقت باغ میں جلسے سے خطاب میں بلاول بھٹو زرداری نے کہا کہ ایک جماعت نے وہی پرانی سیاست اپنائی ہے، وہ سمجھتے ہیں کہ وہ شاید چوتھی بار وزیراعظم بن سکتے ہیں، یہ انکی غلط فہمی ہے طاقت کا سر چشمہ عوام ہے۔

بلاول نے کہا کہ آپ نے 8 فروری کوووٹ دینا ہے تیر کومہرلگانا ہے، وہ آپ کو تقسیم اور گمراہ کرنا چاہتے ہیں، ووٹ کے صحیح استعمال سےآپ چوتھی بار کی سازش ناکام بناسکتے ہیں۔

ان کا کہنا تھا کہ میں اس شہر میں موجود ہوں جہاں ذوالفقاربھٹو کوشہید کیا گیا، میں اس جگہ کھڑا ہوں جہاں بےنظیر بھٹو نے اپنی آخر سانسیں لی تھیں، میں آج یہاں موجود ہوں کیونکہ پاکستان خطرے میں ہے۔

انھوں نے کہا کہ ایک طرف معاشی بحران تو دوسری طرف جمہوری بحران ہے، جن دہشتگردوں کو ہم نےشکست دی تھی وہ ایک بار پھرسراٹھا رہے ہیں، اس ملک کو صرف پاکستان پیپلزپارٹی ہی بچا سکتی ہے۔ 

ایک سیاسی جماعت نے وہی پرانی سیاست اپنائی ہوئی ہے ، ووٹ کو عزت دو کا اپنا ہی نعرہ بھول گئے ، بلاول بھٹو#PublicNews #PublicUpdate #PublicVideo #BreakingNews #BilawalBhuttoZardari pic.twitter.com/dJnUCCXlfU

— Public News (@PublicNews_Com) January 28, 2024

ان کا کہنا تھا کہ قائد عوام نے ہمیں روٹی کپڑا کا نعرہ دیا، ہم نے عوامی معاشی معاہدہ پیش کیا ہے، ہمارا دس نکاتی عوامی معاشی معاہدہ بےروزگاری کو کم کرےگا۔ 

بلاول نے کہا کہ ایک بار پھر یہ دھرتی مجھے اور آپ کو پکار رہی ہے، ہماری جماعت سب کو ساتھ لے کر چل سکتی ہے، پیپلزپارٹی نفرت اور تقسیم کی سیاست کو ہمیشہ کےلیےختم کرنا چاہتی ہے۔

ملک کی سکیورٹی کی بات کرتے ہوئے چیئرمین پیپلزپارٹی نے کہا کہ پاکستان میں کوئی گڈ یا بیڈ طالبان نہیں ہوں گے، اگرکوئی ملک کےخلاف ہتھیار اٹھائے گا تو منہ توڑ جواب دیں گے۔