سمندری طوفان بائپر جوائے کے پیش نظر ایمرجنسی سروسز، ریسکیو 1122 کا ہائی الرٹ جاری کر دیا گیا ہے ۔ تفصیلات کے مطابق سمندری طوفان بائپرجوئے کے پیش نظر کراچی میں طوفانی بارشوں کا امکان ہے۔ ایمرجنسی سروسز، ریسکیو 1122 نے ہائی الرٹ جاری کرکے ممکنہ ہنگامی صورتحال سے نمٹنے کے لیے کراچی میں ٹیمیں تعینات کردی ہیں۔ ممکنہ ہنگامی صورتحال سے نمٹنے کے لیے کراچی میں تین ٹیمیں تعینات کی گئی ہیں، تینوں ٹیموں کو ضلعی سطح پر الرٹ کیا گیا ہے۔ ساحل سمندر پر ریسکیو کیلئے ٹیم کی سی ویو پر پیٹرولنگ اور ضلع شرقی کیلئے ٹیم گلشن اقبال ہیڈ کوارٹر پرالرٹ جاری کر دیا گیا ہے۔ ضلع وسطی میں آپریشن کیلئے ٹیم کے آئی ایچ ڈی پر کیمپ آفس قائم کیا گیا ہے، تعیناتی میں واٹر ریسکیو وہیکلز، غوطہ خور، اسکوبا سیٹ، کشتیاں اور آوٹ بورڈ موٹرز شامل ہیں ۔