پاکستان اپنا بجٹ معاہدے کے مطابق ڈھالے: آئی ایم ایف

پاکستان اپنا بجٹ معاہدے کے مطابق ڈھالے: آئی ایم ایف
بین الاقوامی مالیاتی فنڈ ( آئی ایم ایف) نے پاکستانی بجٹ پر تحفظات کا اظہار کرتے ہوئے کہا ہے کہ شرائط اور معاہدے کے درمیان مطابقت کے لئے ابھی مزید اقدامات کرنا ہوں گے۔ آئی ایم ایف کی طرف سے بتایا گیا کہ پاکستانی حکام کے ساتھ کچھ محصولات اور اخراجات کے بارے میں مزید وضاحت کے لیے بات چیت جاری ہے تاکہ ایک مکمل جائزہ لیا جا سکے۔ آئی ایم ایف کے ابتدائی جائزے کے مطابق بجٹ کو مستحکم بنانے اور اسے آئی ایم ایف پروگرام کے بنیادی مقاصد کے پورے کرنے کے لیے پاکستان کو اضافی اقدامات کی ضرورت ہوگی اور مالیاتی ادارے کے حکام اس سلسلے میں پاکستان کی کوششوں اور عمومی طور پر میکرو اکنامک استحکام کو فروغ دینے کی پالیسیوں کے نفاذ میں تعاون جاری رکھنے پر تیار ہیں۔ پاکستان میں آئی ایم ایف کی نمائندہ ایستھر پریز رئز نے بھی اسی طرح کے خیالات کا اظہار کیا ہے اور کہا ہے کہ آئی ایم ایف کے انتہائی اہم بیل آؤٹ فنڈز کے اجرا کے لیے ضروری ہے کہ پاکستان کی حکومت ادارے کی شرائط کا خیال رکھے۔ ایستھر پریز روئز نے بتایا کہ ہمارے ابتدائی جائزے میں یہ نتیجہ اخذ کیا گیا ہے کہ بجٹ کو مستحکم بنانے کے لیے مزید اقدامات درکار ہوں گےتا کہ اسے آئی ایم ایف کے پروگرام کے مقاصد کے مطابق ڈھالا جا سکے۔ وزیر خزانہ مفتاح اسماعیل نے تصدیق کی ہے کہ آئی ایم ایف نے بجٹ کے اعدادوشمار پر تحفظات کا اظہار کیا ہےجس میں تیل پر سبسڈی، بڑھتا ہوا کرنٹ اکاونٹ خسارہ اور مزید براہ راست ٹیکس لگانے جیسے معاملات شامل ہیں۔ تاہم انہوں نے کہا کہ ان کی حکومت پر اعتماد ہے کہ وہ آئی ایم ایف کو آن بورڈ لانے کے لیے بجٹ میں ایڈجسٹمنٹ کرے گی۔ انہوں نے اس امید کا بھی اظہار کیا کہ وہ اس ماہ ایک کامیاب ریویو لے سکیں گے۔ خیال رہے کہ پاکستان کی حکومت نے مالی سال 2022-2023 کے لیے 9.5 ٹرلین روپے کا بجٹ گزشتہ جمعے کو پیش کیا تھا۔ پاکستان میں عالمی مالیاتی ادارے کے نمائندے مسٹر روئز نے کہا کہ ایک مکمل تجزیے کے لیے پاکستان کے حکام کے ساتھ مخصوص محصولات اور اخراجات کے بارے میں اعدادوشمار حاصل کرنے کے لیے گفتگو جاری ہے۔ انہوں نے کہا کہ آئی ایم ایف ملک کے اندر مائیکرو اکنامک کے استحکام کے فروغ کے لیے پالیسیوں پر عمل درآمد کی حکومتی کوششوں کی مدد جاری رکھنے پر تیار ہے۔ وائس آف امریکہ کے مطابق پاکستان نے عالمی مالیاتی ادارے سے 39 مہینوں کے لیے جو چھ ارب ڈالر کا پروگرام لیا تھا، ابھی وہ نصف حد تک مکمل ہوا ہے اور گزشتہ سال فنڈ دینے والے ادارے کی جانب سے پاکستان میں بعض عوامل کے سٹیٹس سے متعلق خدشات کے باعث رک گیا تھا۔ پاکستان کو ایک کامیاب ریویو کی صورت میں جو آئندہ قسط ملے گی اس میں 900 ملین ڈالر کی رقم شامل ہے اور دیگر عالمی فنڈنگ کے امکانات بھی اسی کامیاب ریویو کے ساتھ وابستہ ہیں۔ اسلام آباد کو ایسے میں فنڈز کی اشد ضرورت ہے جب اس کے زرمبادلہ کے ذخائر میں تیزی سے کمی آ رہی ہے جن میں اب 9.2 ارب ڈالر باقی ہیں۔ یہ رقم 45 دن سے بھی کم کی درآمدات کے لیے کافی ہے۔
ایڈیٹر

احمد علی کیف نے یونیورسٹی آف لاہور سے ایم فل کی ڈگری حاصل کر رکھی ہے۔ پبلک نیوز کا حصہ بننے سے قبل 24 نیوز اور سٹی 42 کا بطور ویب کانٹینٹ ٹیم لیڈ حصہ رہ چکے ہیں۔