ویب ڈیسک: ارفع کریم فاؤنڈیشن کے تعاون سے پنجاب یونیورسٹی ڈیپارٹمنٹ آف سوشل ورک، صغرا بیگم سنٹر فار ایجوکیشن پالیسی اینڈ ڈویلپمنٹ نے الرازی ہال میں ایک سیمینار بعنوان ’’تعلیم، سماجی جدت اور سماجی ترقی: ارفع کریم کا خواب‘‘ کا انعقاد کیا۔
تفصیلات کے مطابق سیمینار کے دوران ارفع کریم فیلو شپ پروگرام کی نقاب کشائی کی گئی جس کا مقصد 50 مستحق طلباء کو وظائف دیناہے،اس اقدام کا مقصد ارفع کریم کی میراث کو عزت دینا اور نوجوان افراد کی تعلیمی امنگوں کی حمایت کرنا ہے، تقریب کے مقررین نے سکول سے باہر بچوں کی تعلیم میں آئی ٹی سیکٹر کی تبدیلی کی صلاحیت پر زور دیا۔
انہوں نے اس بات پر روشنی ڈالی کہ ٹیکنالوجی میں ترقی کس طرح تعلیمی تفاوت کو دور کرنے اور سماجی ترقی کو فروغ دینے میں اہم کردار ادا کر سکتی ہے۔
سیمینار میں صغرا بیگم سنٹر فار ایجوکیشن پالیسی اینڈ ڈویلپمنٹ کی ڈائریکٹر ڈاکٹر سونیا عمر شامل تھیں۔ ڈاکٹر عظمیٰ عاشق، چیئرپرسن ڈیپارٹمنٹ آف سوشل ورک؛ ارفع کریم فاؤنڈیشن کی چیئرپرسن ثمینہ کریم، تابندہ اسلام، چیف ایگزیکٹو آفیسر ڈاکٹر روبینہ ذاکر کے علاوہ اساتذہ اور طلباء نے شرکت کی۔