اگر گاڑی کے بریک فیل ہو جائیں تو کیا کرنا چاہیے؟

لاہور: (ویب ڈیسک) چلتی گاڑی میں بریک فیل ہونا آپ کی زندگی کے لئے سب سے زیادہ جان لیوا ثابت ہو سکتا ہے لیکن سمجھداری کا مظاہرہ کرکے آپ اس مصیبت میں اپنی جان بچا سکتے ہیں۔ تفصیل کے مطابق گاڑی چلانے والے شخص کے لئے سب سے بری صورت حال تب ہوتی ہے جب اسے معلوم ہوتا ہے کہ بریک کام نہیں کر رہی ہیں۔ عام طور پر ایسی صورتحال میں ڈرائیور بہت گھبرا جاتا ہے اور کوئی ایسی غلطی کر بیٹھتا ہے جس کی وجہ سے گاڑی بے قابو ہو کر حادثے کا شکار ہو جاتی ہے۔ تاہم اگر کام ہوشیاری سے کیا جائے تو گاڑی کے بریک فیل ہونے کی صورت میں بھی اسے کنٹرولڈ طریقے سے روکا جا سکتا ہے۔ آج ہم آپ کو ایسی ترکیبیں بتائیں گے، جن کے بعد آپ کسی بھی وقت بریک فیل ہونے کی صورت میں گاڑی کو آسانی سے کنٹرول کر سکیں گے۔ جب گاڑی کی بریکیں فیل ہوتی ہیں تو اس سے پہلے ہمیں کچھ نشانیاں ملنا شروع ہو جاتی ہیں یعنی بریک لگانے پر بریک پیڈ شور کرنے لگتے ہیں۔ بعض اوقات بریک کیلیپر جام ہونے لگتے ہیں۔ اچانک بریک کی تار ٹوٹ جاتی ہے یا ماسٹر سلنڈر لیک ہونا شروع ہو جاتا ہے اور بریکوں کو مطلوبہ پریشر نہیں ملتا۔ بریک ایندھن کا رسنا بھی بریک فیل ہونے کی نشاندہی کرتا ہے۔ بریک فیل ہونے پر گاڑی کو اس طرح کنٹرول کریں سب سے پہلے گاڑی کی رفتار کو کم کرکے کنٹرول کریں اور بریک پیڈل کو مسلسل دباتے رہیں۔ کئی بار ایسا کرنے سے بریکوں پر صحیح پریشر آتا ہے اور بریک دوبارہ کام کرنے لگتے ہیں۔ اگر آپ کی گاڑی ٹاپ گیئر میں چل رہی ہے تو اسے لوئر گیئر میں لے آئیں۔ اسے پہلے گیئر میں لانے کی کوشش کرنی چاہیے۔ یہاں پر غور کرنے والی بات یہ ہے کہ گھبراہٹ میں اسے پانچویں سے پہلے براہ راست پہلے گیئر میں نہ لائیں۔ اس کے علاوہ اس دوران اسے نیوٹرل میں لانے کی کوشش نہ کریں، اس کی وجہ سے گاڑی قابو سے باہر ہو سکتی ہے۔ کبھی بھی ریورس گیئر استعمال نہ کریں بریک فیل ہونے کی صورت میں غلطی سے بھی گاڑی کو ریورس گیئر میں نہ لگائیں کیونکہ اس سے پیچھے آنے والی گاڑی سے حادثہ ہونے کا خدشہ ہے۔ ایکسلریٹر بالکل استعمال نہ کریں، صرف کلچ استعمال کریں۔ ماہرین کے مطابق ایسی صورت حال میں گاڑی کی ایئر کنڈیشن آن کریں۔ اس سے انجن پر دباؤ بڑھے گا اور رفتار قدرے کم ہو جائے گی۔ ایمرجنسی لائٹس اور ہارن استعمال کریں ماہرین کا یہ بھی مشورہ ہے کہ ہیڈ لائٹس، ہیزرڈ لائٹس روشن کرنے سے بیٹری کی پاور سپلائی کم ہو جائے گی اور گاڑی کی رفتار کم ہو جائے گی۔ ہارن، ہیزرڈ لائٹس، انڈیکیٹرز اور ہیڈ لیمپ ڈپرز سے دوسروں کی نشاندہی کریں۔ اس سے خطرہ کم ہو جائے گا۔ اگر آس پاس ریت یا کیچڑ ہے تو اسٹیئرنگ وہیل کو کنٹرول کریں اور گاڑی کو ریت یا بجری پر چلائیں۔ اس سے کار کی رفتار میں نمایاں کمی آئے گی۔ ہینڈ بریک کا صحیح استعمال کریں۔ دستی ہینڈ بریک کے ساتھ کار میں گیئرز تبدیل کرتے وقت ہلکے ہینڈ بریک کا استعمال کریں۔ تیز رفتاری میں بریک کو زیادہ جلدی نہ لگائیں جب کار پہلے گیئر میں ہو، جب رفتار تقریباً 40 کلومیٹر فی گھنٹہ ہو، تو آپ ہینڈ بریک کو براہ راست کھینچ کر رفتار کو کنٹرول کر سکتے ہیں۔ ہینڈ بریک کو اچانک تیز رفتاری سے نہ لگائیں کیونکہ اچانک ہینڈ بریک لگانے سے پچھلے پہیے لاک ہو جاتے ہیں اور گاڑی کے الٹنے کا خطرہ بڑھ جاتا ہے۔ وقت پر گاڑی کی سروس کروائیں آپ کی گاڑی کے ساتھ ایسا کوئی مسئلہ نہ پیش آئے، اس کیلئے ضروری ہے کہ آپ گاڑی کی بروقت سروس کروائیں اور ہر پرزے کی جانچ پڑتال اور مرمت کروائیں۔