ویب ڈیسک: کھیلوں کی دنیا میں ایک نئی تاریخ رقم ہونے جارہی ہے۔ جہاں پہلی مرتبہ پاکستان فٹ بال لیگ PFL کا4 جون سے آغاز ہوگا۔ جس کے لیے لیجنڈ انگلش فٹ بالر مائیکل اوون کو خصوصی سفیر مقرر کردیا گیا ہے۔
لاہور میں پی ایف ایل کے آغاز میں 25 سے زائد غیر ملکی وفد کی شرکت دیکھنے کو ملے گی جن میں مائیک فرنان، سی ای او ریڈ اسٹرائیک، ایس ایل بینفیکا کے ڈیوڈ گومز، ایس ایل بینفیکا کے لوئس میگوئل ڈی سوسا سانٹوس ریئس اور اسکائی نیوز کے فٹبال پنڈت ایلیسن بینڈر شامل ہیں۔
لانچ ایونٹ پی ایف ایل یو کے ہولڈنگز، برطانیہ میں مقیم ایک گروپ کی طرف سے منعقد کیا جا رہا ہے۔ جس کا کہنا ہے کہ وہ پی ایف ایل کے لیے پوری طرح پرعزم ہے، انشا اللہ دسیوں ملین ڈالرز کی سرمایہ کاری ہوگی۔
PFL UK Holdings کو فرحان احمد جونیجو نے اس کے چیئرمین، احمر کنور اس کے صدر اور چیف ایگزیکٹو آفیسر (CEO) اور برطانیہ (UK) اور متحدہ عرب امارات (UAE) کے دیگر سرکردہ سرمایہ کاروں کے طور پر قائم کیا ہے۔
فرحان جونیجو کا کہنا تھا کہ"یہ گروپ پاکستان کے لیے پاکستان میں فٹ بال کی ترقی کے لیے اپنے بین الاقوامی تعلقات کو بروئے کار لائے گا۔
منتظمین کا کہنا ہے کہ پی ایف ایل پاکستان بھر سے فٹبال کے بہترین ٹیلنٹ کو اکٹھا کرے گا، جو کھلاڑیوں کو اپنی صلاحیتیں دکھانے، اعلیٰ سطح پر مقابلہ کرنے اور ان کے خوابوں کو پورا کرنے کے لیے ایک پلیٹ فارم فراہم کرے گا۔
جونیجو نے کہا کہ کھیلوں کی صنعت میں ایک بلین پاؤنڈ کی سرمایہ کاری کا منصوبہ ہے اور خلیجی ممالک کی جانب سے بھی کھیلوں کے میدان میں دلچسپی بڑھ رہی ہے۔
انہوں نے کہا کہ ہم فٹ بال سٹیڈیمز، فٹ بال ٹریننگ سینٹرز میں سرمایہ کاری کی منصوبہ بندی کر رہے ہیں اور بین الاقوامی کلبوں میں فٹ بال کھلاڑیوں کی تربیت بہت آسان ہو گی۔
جونیجو نے کہا کہ بینفیکا پہلے ہی پاکستان سے ہر سال 100 بچوں اور کھلاڑیوں کو پرتگال کے شہر لزبن میں اپنی معروف عالمی معیار کی ٹریننگ اکیڈمی میں لے جانے پر رضامند ہو چکی ہے۔