اسلام آباد ( پبلک نیوز) پاکستان سے بیرون ملک جانے اور آنے والوں کے لیے جزوی ویکسی نیشن سرٹیفکیٹ کے اجرا کی منظوری دے دی گئی ہے۔
تفصیلات کے مطابق نیشنل کمانڈ اینڈ آپریشن سینٹر ( این سی او سی) نے جزوی ویکسی نیشن سرٹیفکیٹ کے اجرا کی منظوری دے دی۔ جس کے بعد بیرون ملک سفر کرنے والے جزوی ویکسی نیشن سرٹیفکیٹ حاصل کرپائیں گے۔
این سی او سی کے مطابق جزوی ویکسی نیشن سرٹیفکیٹ ایک ڈوز لگوا کر بیرون ملک جانے والوں کو ملے گا۔ سرٹیفکیٹ کا اجرا نادرا کے آن لائن سسٹم سے ہو گا۔ وزارت قومی صحت حسب ضرورت سرٹیفکیٹ میں تبدیلی کی مجاز ہو گی۔
این سی او سی کے مطابق ایسے شہری جنہوں نے بیرون ملک ویکسین کی پہلی خوراک لی اور پھر پاکستان میں دوسری ڈوز لگوائی تو ان کے لیے بھی جزوی سرٹیفکیٹ جاری ہوگا۔ جزوی ویکسینیشن سرٹیفکیٹ کا اجرا این آئی ایم ایس سے ہو گا۔