خواتین کی ہاکی ٹیم کا مینیجر بنائے جانے پر شہلا رضا تنقید کی زد میں

پاکستان کی خواتین کی ہاکی ٹیم آٹھ سے 15 اگست کے دوران تھائی لینڈ کے شہر بینکاک میں ہونے والے انڈور ایشیا کپ میں حصہ لے گی۔ مگر پاکستان میں سوشل میڈیا پر اس ٹورنامنٹ سے زیادہ یہ بات زیادہ زیرِ بحث ہے کہ ٹیم کے ساتھ پیپلز پارٹی کی رہنما شہلا رضا بطور ’مینیجر‘ کیوں جا رہی ہیں؟ پاکستان پیپلز پارٹی کی رہنما شہلا رضا نے اپنے خلاف منفی پروپیگنڈا کرنے والوں کوویڈیو پیغام کے ذریعے جواب دیا ہے۔ شہلا رضا پر پاکستان ویمن ہاکی ٹیم کی بطور مینیجر ٹیم کے ساتھ تھائی لینڈ روانگی پر تنقید کی جارہی تھی اور اس حوالے سے سابق گورنر سندھ عمران اسماعیل نے ایک ٹوئٹ کرتے ہوئے اس خبر پر انا للہ وانا الیہ راجعون بھی پڑھا تھا۔

شہلا رضا پاکستان ومن ہاکی ٹیم کی مینیجر بن کر ٹیم کے ساتھ تھائلینڈ جائنگی۔ pic.twitter.com/ZYLc237XhZ

— Imran Ismail (@ImranIsmailPTI) August 3, 2022

اب اس حوالے سے شہلا رضا نے ایک ویڈیو پیغام شیئر کیا جس میں ہاکی ٹیم سے برسوں پرانی وابستگی سے متعلق بات کی۔ شہلا رضا کا کہنا تھا کہ کچھ لوگ اپنی حیثیت کا بہت غلط فائدہ اٹھاتے ہیں ان کے لیے عرض ہے کہ میں پچھلے 4 سال سے کراچی ہاکی ایسوسی ایشن سے وابستہ ہوں اور کراچی کی بوائز ٹیم کی چیئرپرسن ہوں، اس کے ساتھ ساتھ مجھے پاکستان ہاکی فیڈریشن نے سندھ کی گرلز ہاکی ٹیم کا GM بنایا ہوا ہے۔ ان کا کہنا تھا کہ ’اس سے پہلے بھی کئی سیاسی شخصیات، جو کہ مجھے نہیں معلوم جنھوں نے اتنا کام کیا ہو گا جتنا میں نے کیا ہے، وہ مینیجر وغیرہ رہ چکی ہیں۔ یہ ایسی کوئی انہونی بات نہیں۔‘

عجب گھبراھٹ کے غضب ٹو یئٹ کا جواب۔۔ pic.twitter.com/MyOipT7luu

— Syeda Shehla Raza (@SyedaShehlaRaza) August 3, 2022

معاملے پر ہاکی فیڈریشن کا کہنا ہے کہ شہلا رضا پاکستان ہاکی فیڈریشن کی کانگریس ممبر ہیں اور اس کھیل کے لیے ان کی خدمات موجود ہیں۔