گلین فلپس ’ اسپائیڈر مین ‘ بن گئے، ایک اور ناقابل یقین کیچ

چیمپئنزٹرافی فائنل:انڈرورلڈمتحرک،5ہزارکروڑ کا سٹہ لگ گیا

ویب ڈیسک: آئی سی سی چیمپئنز ٹرافی 2025 کے فائنل میں بھارت اور نیوزی لینڈ کی ٹیمیں دبئی میں مدِمقابل ہیں، اور اس بڑے مقابلے پر 5,000 کروڑ روپے تک کی سٹے بازی کی جا چکی ہے۔

بھارتی خبر رساں ادارے کی رپورٹ کے مطابق، بین الاقوامی بیٹنگ مارکیٹ میں بھارت کو فیورٹ قرار دیا جا رہا ہے، جبکہ سٹے بازی میں ملوث کئی بڑے بک میکرز کا تعلق انڈرورلڈ سے بتایا جا رہا ہے۔

انڈرورلڈ بھی سرگرم؟

رپورٹ میں دعویٰ کیا گیا ہے کہ بدنامِ زمانہ ”ڈی کمپنی“ کا بھی دبئی میں ہونے والے بڑے کرکٹ میچز کی سٹے بازی میں عمل دخل ہے۔ اطلاعات کے مطابق، کئی نامور بک میکرز دبئی میں موجود ہیں، جہاں بھارت کے تمام اہم میچز منعقد کیے گئے۔

چیمپئنز ٹرافی کے دوران دہلی پولیس کی کرائم برانچ نے کم از کم پانچ بڑے بک میکرز کو گرفتار کیا ہے۔ تحقیقات کے دوران سٹے بازی میں دبئی کے کردار کا انکشاف ہوا، جبکہ پولیس نے کئی الیکٹرانک ڈیوائسز اور بیٹنگ میں استعمال ہونے والے آلات بھی برآمد کیے۔

بھارت اور نیوزی لینڈ کے درمیان فائنل مقابلہ

روہت شرما کی قیادت میں بھارتی ٹیم اتوار کو نیوزی لینڈ کے خلاف فائنل کھیل رہی ہے۔ یہ میچ دبئی میں منعقد ہو رہا ہے کیونکہ بی سی سی آئی نے بھارت کی ٹیم کو میزبان ملک پاکستان بھیجنے سے انکار کر دیا تھا۔

پورے ٹورنامنٹ میں بھارت نے اپنے تمام میچز دبئی انٹرنیشنل اسٹیڈیم میں کھیلے، جن میں گروپ اسٹیج میں نیوزی لینڈ کے خلاف ایک میچ بھی شامل تھا۔ اس مقابلے میں بھارت نے کم اسکور کے باوجود کامیابی حاصل کی تھی۔

بھارتی ٹیم ناقابلِ شکست

اب تک بھارت نے اپنے گروپ میچز میں بنگلہ دیش، میزبان پاکستان اور نیوزی لینڈ کو شکست دی، جبکہ سیمی فائنل میں عالمی چیمپئن آسٹریلیا کو بھی ہرایا۔ دوسری جانب نیوزی لینڈ نے سیمی فائنل میں جنوبی افریقہ کو شکست دے کر فائنل میں جگہ بنائی۔

بھارت کی چیمپئنز ٹرافی کی تاریخ

بھارت نے آخری مرتبہ 2013 میں انگلینڈ میں چیمپئنز ٹرافی جیتی تھی، جبکہ 2017 کے فائنل میں پاکستان کے ہاتھوں شکست کا سامنا کرنا پڑا تھا۔ یہ مسلسل تیسری بار ہے کہ بھارت نے چیمپئنز ٹرافی کے فائنل میں جگہ بنائی ہے۔

چیمپئنزٹرافی:روہت شرما کو ٹاس ہارجانا چاہیے،ایشون کا بیان

ویب ڈیسک: بھارت کے سابق اسپنر روی چندر ایشون نے اپنی خواہش کا اظہار کرتے ہوئے کہا کہ چیمپئنز ٹرافی کے فائنل میں بھارتی ٹیم کے کپتان روہت شرما کو ٹاس ہار جانا چاہیے۔

ایشون نے ان خیالات کا اظہار یوٹیوب شو کے دوران کیا جس میں ان کا کہنا تھا کہ چونکہ بھارتی ٹیم کامیابی کے ساتھ ٹوٹل کا دفاع کرتی آئی ہے اور بغیر کسی دباؤ کے ہدف کا تعاقب کیا ہے، اس لیے ٹاس ایک بڑا عنصر نہیں ہونا چاہیے اور روہت کو اس ٹینشن سے فری ہونا چاہیے کہ ٹاس جیت کر پہلے بولنگ کی جائے یا بیٹنگ۔

ایشون نے کہا دیکھا جائے تو بھارتی ٹیم اس وقت اپنی بہترین پوزیشن میں ہے، وہ ہر ٹوٹل کا دفاع کرتی نظر آئی ہے، بھارت کو ٹاس نہیں جیتنا چاہیے، نیوزی لینڈ کو جیت کر یہ فیصلہ کرنے دینا چاہیے کہ وہ پہلے کیا کرتے ہیں۔

سابق اسپنر کا کہنا تھا کہ بھارت پہلے بھی اسی ٹورنامنٹ میں نیوزی لینڈ کے خلاف کامیاب دفاع کرچکا ہے اور کیویز کو   44 رنز سے شکست دی ہے۔ 

انہوں نے کہا بھارتی ٹیم دوسری اننگز میں کامیابی سے بیٹنگ بھی کررہی ہے،اسی لیے ٹیم انڈیا کو اس چیز کا پریشر نہیں لینا چاہیے۔

سابق اسپنر ایشون کا مزید کہنا تھا کہ اس ٹورنامنٹ میں بھارتی ٹیم صرف بنگلادیش کے خلاف ذرا غیر آرام دہ نظر آئی، ورنہ وہ اس ٹورنامنٹ کی مضبوط ترین ٹیم رہی ہے۔

واضح رہے کہ آج بھارت اور نیوزی لینڈ کے درمیان چیمپئنز ٹرافی کا فائنل دوپہر 2 بجے دبئی انٹرنیشنل کرکٹ اسٹیڈیم میں شروع ہوگا۔

چیمپئنزٹرافی:روہت شرما نے نئی تاریخ رقم کردی

ویب ڈیسک: چیمپئنزٹرافی کے فائنل میں بھارتی ٹیم کے کپتان روہت شرما نے نئی تاریخ رقم کردی۔

روہت شرما آئی سی سی کے تمام ایونٹس کے فائنل میں ٹیم کی قیادت کرنے والے پہلے کپتان بن جائیں گے۔ روہت شرما نے ٹیسٹ چیمپئن شپ فائنل، کرکٹ ورلڈکپ 2023 اور ٹی ٹوئنٹی ورلڈکپ 2024 میں بھارت کی قیادت کی۔

دوسری جانب بھارتی کرکٹ ٹیم کے کپتان کل آئی سی سی ایونٹ کے بعد ٹی 20 کے بعد ون ڈے کرکٹ سے بھی ریٹائر ہوجائیں گے، اس حوالے سے بھارتی میڈیا میں بحث زور پکڑ گئی ہے کہ آئی سی سی چیمپئنز ٹرافی کے فائنل کے بعد ان کے مستقبل کا فیصلہ ہوگا۔

بھارتی میڈیا کا دعوٰی ہے کہ روہت شرما کی کپتانی اور بطور کھلاڑی مستقبل چیمپئنز ٹرافی کے بعد واضح ہوجائے گا اگر بھارت ان کی کپتانی میں چیمپئنز ٹرافی جیتنے میں کامیاب رہا تو ممکنہ طور پر وہ کپتانی تو جاری نہ رکھیں تاہم بطور کھلاڑی کچھ عرصہ مزید کھیل سکتے ہیں۔

بھارتی میڈیا کا یہ بھی دعوٰی ہے کہ روہت شرما پر کپتانی چھوڑنے یا ریٹائرمنٹ لینے کا کوئی دباؤ نہیں ڈالا جارہا، شکست یا فتح دونوں صورتوں میں مستقبل کا فیصلہ بھارتی کپتان خود کریں گے۔

بھارتی میڈیا کا یہ بھی دعویٰ ہے کہ بھارتی کرکٹ بورڈ ایسے کھلاڑی کو کپتان بنانا چاہتا ہے جو دو سال قیادت کرسکے اور اس کے لیے ہارڈک پانڈیا اور شُبمن گِل کا نام زیر غور ہے۔

چیمپئنزٹرافی: فائنل سے قبل دبئی پولیس کا اہم بیان آگیا

ویب ڈیسک: دبئی پولیس نے سٹیڈیم میں کھیل کے قوانین کی خلاف ورزی پر سخت کارروائی کی وارننگ جاری کردی۔

یہ وارننگ حالیہ واقعات کے تناظر میں جاری کی گئی ہے، دبئی کرکٹ سٹیڈیم میں بھارت اور آسٹریلیا کے سیمی فائنل میں فتح کے بعد کرکٹ مداح میدان میں داخل ہوگیا تھا۔

اس کے علاوہ دبئی پولیس نے مختلف فٹبال میچز کے دوران غیر قانونی مواد (میرین ڈسٹریس سگنلز) استعمال کرنے والے شائقین کو گرفتار کیا ہے جو ان کھیلوں کے دوران موجود ہر فرد کے لیے سنگین خطرہ تھے۔

دبئی پولیس نے مداحوں کو متنبہ کیا ہے کہ سٹیڈیمز میں خطرناک مواد اور آتش بازی کے استعمال پر جرمانے اور قید کی سزا ہوسکتی ہے، میچز کے دوران سٹیڈیم میں زبردستی داخل ہونے پر بھی سخت سزا دی جائے گی۔دبئی پولیس نے واضح کردیا ہے کہ قوانین کی خلاف ورزی پر ایک سے 3 ماہ قید کی سزا ہوگی یا پھر 5 ہزار سے 30 ہزار درہم جرمانہ عائد کیا جائے گا جو پاکستانی روپوں میں 3 لاکھ 80 ہزار پاکستانی روپے سے لے کر 22 لاکھ 85 ہزار روپے بنتے ہیں۔

دبئی پولیس نے شائقین کو خبردار کیا ہے کہ سٹیڈیم میں تشدد، نسل پرستی یا سیاسی سرگرمیوں پر سخت کارروائی کی جائے گی اس لیے کسی بھی غیر قانونی سرگرمی سے باز رہا جائے۔

کسی دوسرے شائق یا پھر کھلاڑی پر کوئی مواد یا مائع پھینکنے پر 10 ہزار سے 30 ہزار درہم (لگ بھگ سات لاکھ سے 22 لاکھ پاکستانی روپے) جرمانہ عائد کیا جائے گا۔

دبئی پولیس نے مداحوں سے سپورٹس مین شپ کا مظاہرہ کرنے کا مطالبہ کیا ہے،  پولیس نے مداحوں کو سپورٹس ایونٹس کی سکیورٹی سے متعلق 2014 میں جاری ہونے والے اماراتی قانون نمبر 8 کے تحت وارننگ جاری کی ہیں جس کا مقصد کھلاڑیوں اور مداحوں کے حقوق کا تحفظ یقینی بنانا ہے۔

بھارت تیسری مرتبہ آئی سی سی چیمپئنز ٹرافی کا فاتح بن گیا

ویب ڈیسک: آئی سی سی چیمپئنز ٹرافی کے فائنل میچ میں نیوزی لینڈ نے بھارت کے جیت کیلے 252 رنز کا ہدف دیا تھا، بھارت نے فائنل میں نیوزی لینڈ کو 4 وکٹوں سے شکست دے دی۔

دبئی انٹرنیشنل کرکٹ اسٹیڈیم میں ہونے والے اس میچ میں نیوزی لینڈ کے کپتان مچیل سینٹنر نے ٹاس جیت کر بیٹنگ کا فیصلہ کیا اور  نیوزی لینڈ کی ٹیم نے مقررہ 50 اوورز میں 7 وکٹوں کے نقصان پر 251 رنز اسکور کیے،بھارت نے 49 اوور میں 6 وکٹوں کے نقصان پر حاصل کرلیا۔

یاد رہے کہ یہ بھارت کا پانچواں جبکہ نیوزی لینڈ کا تیسرا چیمپئنز ٹرافی کا فائنل تھا۔

نیوزی لینڈ نے2000 میں چیمپئنز ٹرافی میں بھارت کو شکست دی تھی، 2002 میں ہونیوالی چیمپئنز ٹرافی میں بھارت اور سری لنکا کو مشترکہ چیمپئن قرار دیا گیا تھا جس کے بعد بھارت نے 2013 میں انگلینڈ کو شکست دے کریہ ٹائٹل اپنے نام کیا تھا جبکہ 2017 میں بھارت کو پاکستان کے ہاتھوں 180 رنز سے شکست کا منہ دیکھنا پڑا تھا۔

چیمپئنزٹرافی: فائنل سے قبل دبئی حکومت کی شہریوں سے اہم اپیل

ویب ڈیسک: چیمپئنز ٹرافی فائنل کے دوران دبئی میں ٹریفک جام کے خدشےکے پیش نظر انتظامیہ نے عوام سے  پبلک ٹرانسپورٹ کے استعمال کی اپیل کی ہے۔ 

تفصیلات کے مطابق   آئی سی سی چیمپئنز ٹرافی کے فائنل کے دوران دبئی کی اہم شاہراہوں پر ٹریفک کے خلل کا خدشہ ظاہر کیا گیا ہے۔

دبئی میں ٹریفک کے منتظم ادارے روڈ اینڈ ٹرانسپورٹ نے کہا ہے کہ دبئی اسپورٹس سٹی کے اطراف ٹریفک جام ہونے کا امکان ہے لہذا کرکٹ کے شائقین کو پبلک ٹرانسپورٹ استعمال کرنے کی ہدایت کی گئی ہے۔ 

واضح رہے چمپئینز ٹرافی کا فائنل اتوار کی دوپہر انڈیا اور نیو زی لینڈ کی ٹیموں کے درمیان ہونا ہے جس کی وجہ سے دبئی کی اہم شاہراہ شیخ محمد بن زاید روڈ اور حصہ اسٹریٹ پر ٹریفک کی سست روی کا امکان ہے۔

دبئی کے حکام کا کہنا ہے کہ ٹریفک خلل صبح 11 بجے سے دوپہر 2 بجے تک اور رات 8 بجے سے 11 بجے تک متوقع ہے۔

حکام نے شائقین کرکٹ کو اسپورٹس سٹی کا سفر کرنے کیلئے  پیشگی منصوبہ بندی کی ہدایت کی ہے۔

دبئی حکام نے اعلان کیا ہے کہ شائقین کرکٹ کو اسٹیڈیم تک پہنچانے کیلئے دبئی میٹرو اور مفت بس سروسز کے ذریعے متبادل سفری سہولتیں دستیاب رہیں گی۔

حکام نے بتایا کہ جمیرا گالف اسٹیٹس میٹرو اسٹیشن سے کرکٹ فینز کو  بسیں مفت میں دبئی کرکٹ اسٹیڈیم پہنچائیں گی ۔ 

دبئی اسپورٹس سٹی کے اطراف شائقین کرکٹ اور دیگر شہریوں کیلئے ٹریفک روانی برقرار رکھنے کے لیے ٹیمیں بھی تعینات کی گئیں ہیں جو عوام کی رہنمائی کریں گی۔

دبئی حکام نے عوام سے اپیل کی ہے کہ آج دبئی اسپورٹس سٹی کے اطراف کا غیر ضروری سفر سے گریز کیا جائے۔