لاہور: پاکستان کرکٹ بورڈ نے لاہور کے تاریخی قذافی اسٹیڈیم کا نام تبدیل کرنے کا فیصلہ کرلیا ہے۔ پاکستان کرکٹ بورڈ (پی سی بی ) کے چیئرمین رمیز راجا نے غیر ملکی ویب سائٹ انٹریو میں بتایا ہے کہ لاہور کے قذافی اسٹیڈیم کے نام بدلنے کی کوششوں کا آغاز کردیا گیا ہے۔انہوں نے کہا کہ پی سی بی متعدد اسپانسرز سے بات چیت کر رہا ہے، بہتر اسپانسرز ملنے کے بعد کراچی کے نیشنل اسٹیڈیم سمیت دیگر اسٹیڈیمز کے نام بھی جلد ہی تبدیل کردیے جائیں گے۔ رمیز راجہ کا کہنا تھا کہ ہم نے عالمی ادارے ’یوگوو‘ کی خدمات حاصل کی ہیں جو ہمارے اسٹیڈیمز اور اسپانسرشپ کی مالیت کا تخمینہ پیش کرے گا۔ خیال رہے کہ سال 2013 میں بھی قذافی اسٹیڈیم کے نام کو تبدیل کرنے کی متعدد کوششیں کی گئیں تھیں لیکن سیاسی وجوہات کی وجہ ایسا ممکن نہیں ہوسکا تھا۔