لاہور: (ویب ڈیسک) آپ میں سے اکثر افراد کو لیموں پانی کے معجزاتی فوائد کے بارے میں علم نہیں ہوگا۔ اس میں موجود طبی خواص کئی بیماریوں سے لڑنے میں کارآمد ہیں۔ لیموں کا پانی ایک ایسا مشروب ہے جو دنیا بھر میں مقبول ہے۔ پاکستان میں گرمیوں کا موسم شروع ہونے والا ہے۔ اس میں لیموں پانی کا استعمال بے حد ضروری ہے۔ جو لوگ اس کو پینے کی عادت بنا لیتے ہیں، وہ مختلف بیماریوں سے محفوظ رہتے ہیں۔ روزانہ صبح لیموں پانی پینے سے ناصرف آپ کا موٹاپا کم ہوگا بلکہ آپ کئی بیماریوں سے بھی دور رہیں گے، کیونکہ جسم پر پڑنے والے منفی اثرات کو دور کرنے کے لئے لیموں پانی بہت فائدہ مند ہے۔ یہ پروٹین، کاربوہائیڈریٹس، وٹامنز اور منرلز سے بھرپور ہوتے ہیں اور آپ کی شکل وصورت کو بھی نکھار دیتے ہیں۔ آئیے جانتے ہیں کہ لیموں پانی آپ کی صحت پر کیا مثبت اثرات مرتب کر سکتا ہے۔ موٹاپے کا علاج اگر آپ بھی اپنے موٹاپے کو کم کرنا چاہتے ہیں تو یہ آپ کے لئے سب سے آسان طریقہ ہے۔ روزانہ صبح ایک گلاس نیم گرم پانی میں لیموں کا رس شامل کریں اور اسے دن میں کم از کم دو بار اور ہر گھنٹے بعد ایک گلاس پانی پی لیں۔ یہ آپ کو بھوک محسوس کئے بغیر کم کھانے میں مدد کرتا ہے۔ کیونکہ آپ کے جسم کو توازن میں رکھنے کے ساتھ ساتھ پانی آپ کے نظام ہاضمہ کو بھی متوازن رکھتا ہے۔ ذیابیطس کا علاج لیمونیڈ کو زیادہ چینی والے جوس اور مشروبات کا بہتر متبادل سمجھا جاتا ہے۔ خاص طور پر ان لوگوں کے لئے جو شوگر کے مریض ہیں۔ بلڈ شوگر لیول کو کنٹرول کرکے یہ جسم کو ری ہائیڈریٹ اور توانائی بخشتا ہے۔ سانس کو تازہ بنائیں روزانہ برش کرنے کے کچھ دیر بعد منہ سے بدبو آنے لگتی ہے۔ ایسی حالت میں خالی پیٹ لیموں پانی پینے سے آپ کو اس پریشانی سے نجات مل جائے گی۔ کیونکہ اس میں موجود وٹامن سی سانس کو تروتازہ رکھتا ہے اور منہ میں موجود بیکٹیریا کو ختم کرتا ہے۔ معدے کو صحت مند رکھیں روزانہ صبح لیموں پانی پینے سے آپ کی قوت ہضم میں اضافہ ہوتا ہے۔ یہ پیٹ کے امراض کے لئے بھی فائدہ مند ہے، کیونکہ اس میں فلیوونائڈز پائے جاتے ہیں۔ جو نظام ہاضمہ کو ٹھیک رکھنے کے ساتھ ساتھ تیزابیت میں بھی آرام دیتا ہے۔ اسی وجہ سے جب بھی پیٹ میں خرابی ہوتی ہے تو لیموں کا پانی پلایا جاتا ہے۔ گردے کی پتھری لیموں پانی کا سب سے اہم صحت کا فائدہ یہ ہے کہ یہ گردے کی پتھری سے نجات دلاتا ہے کیونکہ پتھری پیشاب کو روکتی ہے جس سے بہت زیادہ درد ہوتا ہے، ایسی حالت میں لیموں پانی پینے سے جسم کو ری ہائیڈریٹ کرنے میں مدد ملتی ہے اور گردے سے پتھری نکل جاتی ہے۔