اسلام آباد (پبلک نیوز) پاکستان میں مقامی طور ایک اور وینٹی لیٹر کامیابی سے تیار، ڈریپ نے پاکستان میں تیارشدہ دوسرے وینٹی لیٹر کی منظوری دے دی۔ وزارت صحت کے مطابق وینٹی لیٹر نیشنل انجینئرنگ سائنٹفک کمیشن پاکستان نے تیار کیا ہے۔ مقامی طور تیارکردہ وینٹی لیٹر کا نام پاک وینٹ ون ہے۔ سربراہ ڈریپ ڈاکٹر عاصم رؤف کی جانب سے پاک وینٹ ون رجسٹریشن کی تصدیق کر دی گئی۔سی ای او ڈریپ کے مطابق پاکستان کے لیے یہ ایک نئی صبح کا آغاز ہے۔ پاک وینٹ ون رجسٹریشن کے بعد تیار، استعمال ہو سکے گا۔ پاک وینٹ ون کی رجسٹریشن پانچ سال کے لیے کی گئی ہے۔ پاک وینٹ ون وینٹی لیٹر کی سروس لائف 10 سال ہے۔ڈاکٹر عاصم رؤف کا کہنا ہے کہ پاکستان میں میڈیکل ڈیوائسز کی تیاری کا آغاز خوش آئند ہے۔ ڈریپ نے پہلا مقامی وینٹی لیٹر آئی لیو گزشتہ ہفتے رجسٹر کیا تھا۔