اسلام آباد: وزیر اعظم شہباز شریف نے کہا ہے کہ تمباکونوشی سے پاک پاکستان حکومت کی اولین ترجیحات میں شامل ہے۔ وزیر اعظم شہباز شریف نے کہا ہے کہ تمباکونوشی سے پاک پاکستان حکومت کی اولین ترجیحات میں شامل ہے، ہم اپنی آئندہ نسلوں کو تمباکو نوشی جیسی مضرِ صحت عادت سے بچانے کیلئے کوشاں ہیں۔ وزیرِ اعظم محمد شہباز شریف سے سی-ای-او کرومیٹک (Chromatic) شارق خان نے ملاقات کی، ملاقات میں معاونینِ خصوصی طارق فاطمی اور طارق پاشا اور متعلقہ اعلی حکام نے بھی شرکت کی۔ شارق خان نے وزیرِ اعظم کو کرومیٹک کی پاکستان سے تمباکونوشی کے خاتمے کے حوالے سے مہم، ٹوبیکو کنٹرول الائینس فار پاکستان ( Tobaco Control Alliance for Pakistan TCAP) کے حوالے سے آگاہ کیا۔ انہوں نے بتایا کہ بلومبرگ فلنتھراپیز کے اشتراک سے اس مہم کا مقصد پاکستان سے تمباکو نوشی کے خاتمے میں حکومت کی معاونت کرنا ہے۔ وزیرِ اعظم شہباز شریف نے کرومیٹک کی پاکستان سے تمباکونوشی کے خاتمے کیلئے مہم کی پزیرائی کی۔