بابراعظم آپ جعلی کنگ ہیں: احمد شہزاد

(ویب ڈیسک)ٹی 20 ورلڈکپ 2024 میں پاکستانی ٹیم کی مایوس کن کارکردگی نے سابق کرکٹرز کو بولنے کا موقع دے دیا ہے، بابراعظم سمیت دیگر کھلاڑیوں پر سخت تنقید کررہے ہیں، پاکستانی کرکٹر احمد شہزاد نے قومی ٹیم کے کپتان بابر اعظم کی کارکردگی کے ساتھ اپنے  موازنے پر  انہیں جعلی کنگ قرار دیدیا۔

تفصیلات کے مطابق قومی ٹیم ٹی ٹوئنٹی ورلڈکپ میں امریکا اور پھر بھارت سے شکست کے بعد کینیڈا کے خلاف اپنی پہلی فتح حاصل کرچکی ہے، ٹیم کا آئرلینڈ کے خلاف میچ ابھی باقی ہے اگر قومی ٹیم آئرلینڈ کے خلاف بھی فتح حاصل کرلے تب بھی سپر ایٹ میں کوالیفائی کیلئے امریکا کے بقیہ میچز میں شکست پر انحصار کرے گی۔

ٹی ٹوئنٹی ورلڈکپ کے پہلے دو میچز میں بدترین شکست پر کپتان بابر اعظم سمیت قومی کھلاڑی، سینئرز سمیت شائقین کرکٹ کی بھی کڑی تنقید کی زد میں ہیں۔نجی نیوز چینل کےپروگرام میں احمد شہزاد نے کہا کہ سوشل میڈیا پر میرے 8سال پرانے stats سے بابراعظم کا موازنہ کیا جارہا ہے جب کہ اس وقت صورتحال مکمل تبدیل تھی۔

ہمیں ڈھائی سے 3 لاکھ روپے ملاکرتے تھے جب کہ  اب  50 لاکھ ماہانہ ملتے ہیں، بابر کو کپتان ہونے کا ہر اختیار حاصل ہے لیکن  اس کے باوجود وہ  ماڈرن کرکٹ میں دنیا سے پیچھے رہ گئے،پاکستان میں مضبوط سے مضبوط کپتان کا 2 سے 3 سیریز بعد احتساب ہوا لیکن بابر کا احتساب کسی نے نہیں کیا، بابر کی جتنی سپورٹ میں نے اپنے پورے کیرئیر میں کسی کپتان کو ملتی ہوئی نہیں دیکھی لیکن اس کے باوجود بھی کپتانی کے 5 سال میں بابر  ملک کو ایک ٹرافی نہیں جتواسکے

قومی کرکٹر کا کہنا تھا کہ بابر نے اپنے  دوستوں کو ایڈجسٹ کروانے کے لئے ڈومیسٹک کرکٹر کو نظر انداز کیا اور ڈومیسٹک کرکٹ کا نظام درہم برہم کردیا،میں مانتا ہوں  میرے stats میں امپروو کرسکتا تھا لیکن بابر کے stats مجھ سے بھی گھٹیا ہیں لیکن آ پ کنگ ہیں تو  آپ جعلی کنگ ہیں۔

احمد شہزاد نے مزید کہا کہ  آپ نے سوشل میڈیا پر لوگوں کو پاگل بنایا ہوا ہے، اب آپ کو چاہیے کہ آپ ہاتھ کھڑا کرتے ہوئے تسلیم کرلیں کہ  میں ذمہ دار ہوں اب میں ڈومیسٹک کھیلوں گا۔