پرزن وینز پر نامعلوم افراد کا حملہ،   تمام فرار قیدی گرفتار، آئی جی اسلام آباد

(ویب ڈیسک ) دہشگردی مقدمات میں ملوث پی ٹی آئی ملزمان کی قیدی وینز پر نامعلوم افراد نے  حملہ کردیا ۔اس حوالے سے آئی جی اسلام آباد کا کہنا ہے کہ فرار ہونے والے تمام قیدی  گرفتار کرلیے گئے ہیں۔

آئی جی اسلام آباد علی ناصر رضوی کا کہنا ہے کہ 3قیدی وینز میں 82 ملزمان موجود تھے جنہیں پیشی کے بعد اٹک جیل منتقل کیا جارہا تھا، سنگجانی ٹول پلازہ کے پاس نامعلوم ملزمان قیدی وین پر حملہ آور ہوئے، حملے کے بعد کچھ قیدی وین سے فرار ہوگئے تھے۔

علی ناصر رضوی نے کہا کہ  فرار ہونے والے قیدیوں کو دوبارہ گرفتار کرلیا گیا، پولیس نے قیدیوں کو فرار کروانے کی کوشش ناکام بنادی۔

اس سے قبل  پولیس ذرائع کا کہنا  تھا کہ   نامعلوم افراد متعدد قیدیوں کو چھڑوا کر لے گئے ہیں ،نامعلوم افراد نے پولیس قیدی وینوں پر فائرنگ کی جس سے گاڑی کی شیشے بھی ٹوٹ گئے۔

پولیس ذرائع نے بتایا ہے کہ  حملے کے بعد وینز  میں سوار متعدد قیدی بھی فرار ہوگئے ہیں،وینز میں اٹک جیل سے پیشی کیلئے لائے جانے والے قیدی سوار تھے۔

جس کے بعد تھانہ ترنول اور تھانہ سنگجانی پولیس کی نفری موقع پر پہنچی اور   فرار ملزمان کی تلاش کیلئے علاقے میں سرچ آپریشن شروع کردیا گیا ہے،جنہیں بعد میں گرفتار کرلیا گیا ۔

پولیس نے حملے میں ملوث چار افراد کو گرفتار کرلیا۔ صوبائی وزیر بہبود آبادی کا بیٹا بھی پولیس نے حراست میں لے لیا۔