اسلام آباد: الیکشن کمیشن نے چودھری شجاعت حسین کی برطرفی کو پارٹی آئین سے متصادم قرار دے دیا۔ تفصیلات کے مطابق چیف الیکشن کمشنر کی سربراہی میں تین رکنی کمیشن نے چودھری شجاعت حسین کو پارٹی صدارت سے ہٹانے سے متعلق کیس کا محفوظ شدہ فیصلہ سنا دیا۔ الیکشن کمیشن نے چودھری شجاعت حسین کی برطرفی کو پارٹی آئین سے متصادم قرار دے دیا۔ فیصلے میں کہا گیا ہے کہ سینٹرل ورکنگ کمیٹی کی کارروائی غیر قانونی ہے۔ الیکشن کمیشن نے اپنے فیصلے میں ق لیگ کی سینٹرل ورکنگ کمیٹی کا جاری کردہ پارٹی الیکشن شیڈول بھی کالعدم قرار دے دیا۔ الیکشن کمیشن آف پاکستان نے مسلم لیگ ق چودھری شجاعت حسین کی درخواست منظور کرتے ہوئے انہیں پارٹی صدر برقرار رکھا ہے۔ خیال رہے کہ الیکشن کمیشن نے گزشتہ سال اگست میں فیصلہ محفوظ کیا تھا، چودھری شجاعت نے پارٹی صدارت سے ہٹانے کے خلاف الیکشن کمیشن کو درخواست دی تھی، الیکشن کمیشن نے حکم امتناع پر چودھری شجاعت حسین کو بحال کیا تھا۔ یاد رہے کہ چند روز قبل مسلم لیگ ہاؤس ڈیوس روڈ میں ق لیگ کے مشاورتی اجلاس کے دوران چودھری شجاعت حسین کی جگہ ان کے بھائی چودھری وجاہت حسین کو ق لیگ کا صدر مقرر کیا گیا تھا، اس کے علاوہ طارق بشیر چیمہ کو ہٹاکر کامل علی آغا کو پارٹی کا مرکزی سیکرٹری جنرل بنایا گیا تھا۔