قومی اقتصادی کونسل اجلاس: وفاقی ترقیاتی بجٹ 1500 ارب روپے کردیا گیا

بجٹ 2024-25: پراپرٹی پر 5 فیصد فیڈرل ایکسائز ڈیوٹی عائد

ویب ڈیسک: آئندہ مالی سال کیلئے وفاقی بجٹ پیش کردیا گیا ہے۔ بجٹ وزیرخزانہ محمد اورنگزیب نے پیش کیا۔ جس میں نئے پلاٹوں، رہائشی اور کمرشل پراپرٹی پر پانچ فیصد فیڈرل ایکسائز ڈیوٹی عائد کردی گئی ہے۔ 

تفصیلات کے مطابق آئندہ مالی سال میں پراپرٹی پر کیپٹل گین پر ٹیکس میں اضافہ کردیا گیا ہے۔ فائلرز اور نان فائلرز پر ٹیکس کی شرح میں اضافہ کیا گیا ہے۔ فائلرز کیلئے شرح 15 فیصد اور نان فائلرز کیلئے 45 فیصد ٹیکس کی تجویز ہے۔ 

اس کے علاوہ سگریٹ کے فلٹر میں استعمال ہونے والے ایسٹیٹ ٹو پر 44 ہزار روپے فی کلو ایف ای ڈی عائد کرنے کی تجویز ہے۔ ایف ای ڈی کے نفاذ سے سمگل اور جعلی سگریٹ کا سدباب ممکن ہوگا۔ 

اسی طرح سیمنٹ پر ایف ای ڈی 2 روپے فی کلو سے بڑھا کر 3 روپے کرنے کی تجویز ہے۔ نئے پلاٹوں، کمرشل و رہائشی پراپرٹی پر پانچ فیصد ایف ای ڈی عائد کردی گئی ہے۔ 

ملازمین کیلئے بری خبر: آئی ایم ایف کے دباؤ پر حکومت کا نیا پنشن نظام لانے کا فیصلہ

ویب ڈیسک: (علی زیدی) بجٹ 2024-25 میں  آئی  ایم ایف کے دباؤ پر حکومت  نے  نیا پنشن نظام لانے کا فیصلہ کرلیا۔

رپورٹ کے مطابق وفاقی وزیر خزانہ محمد اورنگ زیب نے اعلان کیا ہے کہ پنشن اخراجات اب غیر حقیقی طور پر بڑھ چکے ہیں لہذا اس شعبے کی اصلاح کے لئے سہ جہتی حکمت عملی متعارف کرادی گئی ہے۔

موجودہ پنشن اسکیم میں اصلاحات کے لئے عالمی مروجہ طریقہ کار پر عمل کیا جائے گا جس کے نتیجے میں حکومت پر اگلے 30 سال تک پنشن کا بوجھ کافی حد تک کم ہوجائے گا۔

ان کا کہنا تھا کہ آئندہ بھرتی ہونے والے ملازمین کیلئے کنٹری بیوٹری پنشن اسکیم متعارف کرائی جائے گی جس کےتحت حکومت اپنا مقررہ حصہ ہر ماہ ادا کردے گی۔  ان ملازمین کی پنشن ان کی ملازمت کے آغازسے ہی جمع ہونی شروع ہوجائے گی۔

کنٹری بیوٹری پنشن فنڈ کیا ہے؟

اس مقصد کے لئے فنڈ میں حکومت ملازم کی جانب سے جمع کرائی گئی رقم کا دوگنا حصہ ماہانہ جمع کرائے گی جسے بعد میں پنشن فنڈ میں انویسٹ کردیا جائے گا اور حاصل ہونے والی رقم ملازمین کی فلاح وبہبود اور ادائیگیوں کے لئے استعمال کی جائے گی۔

اس وقت ملک بھر میں 43 پنشن فنڈز قائم کیے جا رہے ہیں جن میں تقریباً 61 ارب روپے کی سرمایہ کاری کی گئی ہے۔ ذرائع نے مزید بتایا کہ خیبرپختونخوا حکومت نے دو سال قبل پنشن فنڈز میں سرمایہ کاری کرنے کی پہل کی تھی، اس کے ملازمین کے لیے 21 پنشن فنڈز شامل تھے۔

 اب نئی بھرتیاں رضاکارانہ پنشن اسکیم کے تحت ہوں گی

رضاکارانہ پنشن سکیم کے آغاز کا مقصد بھاری سرکاری پنشن کے بوجھ کو کم کرنا اور پنشن کے نظام کو ہموار کرنا ہے۔ کسی بھی نئے انسانی وسائل کو رضاکارانہ پنشن سکیم کے تحت بھرتی کیا جائے گا۔

وی وی آئی پی کی سیکیورٹی: بلٹ پروف پول کا قیام، ٹرانسپورٹ ونگ نے 30 کروڑ مانگ لیے

ویب ڈیسک: (حیدرمنیر) وی وی آئی پی کی سیکیورٹی کیلئے پنجاب حکومت سے ٹرانسپورٹ ونگ نے 300 ملین (30 کروڑ) روپے اضافی مانگ لیے ہیں۔ 

ذرائع کے  مطابق پنجاب کے آئندہ  بجٹ میں وی وی پی آئی سیکیورٹی کے لیے بلٹ پروف پول بنانے کا فیصلہ کیا گیا ہے۔ ٹرانسپورٹ ونگ نے اعلی افسران کے لئے نئی گاڑیاں خریدنے کے لئے  30 کروڑ روپے الگ مانگ لئے ہیں۔ 

محکمہ داخلہ، آئی جی آفس اور ٹرانسپورٹ ونگ بلٹ پروف پول کی تیاریوں میں مصروف ہے۔ بتایا گیا ہے کہ بلٹ پروف پول میں کوسٹر بھی شامل ہو گی۔

800 ارب سے زائد لاگت کی اسکیموں کو بجٹ کا حصہ بنانے کی سفارشارت وزارت خزانہ کو ارسال

ویب ڈیسک: (دانش منیر) پنجاب کا ترقیاتی بجٹ محکمہ خزانہ کو ارسال کردیا گیا ہے۔ محکمہ پلاننگ اینڈ ڈیویلپمنٹ نے 8 سو ارب سے زائد لاگت کی سکیموں کو بجٹ کا حصہ بنانے کی سفارشات خزانہ کو بھجوا دی ہیں۔ وزیر اعلی کسان کارڈ، وزیر اعلی انڈر گریجوایٹ صحت، تعلیم، کھیل سمیت متعدد محکموں کے ترقیاتی بجٹ کی سفارشات بھیج دیں۔ 

تفصیلات کے مطابق پنجاب کا ترقیاتی بجٹ محکمہ خزانہ کو ارسال کردیا گیا ہے۔ سکول ایجوکیشن کے لیے 42 ارب 50 کروڑ مختص کرنے کی تجویز دی ہے۔ چیف منسٹر پنجاب سکول میل پروگرام کے لیے 50 کروڑ، ہائر ایجوکیشن کی 17 ارب لاگت کی سکیموں کو بجٹ میں شامل کیا گیا ہے۔

وزیر اعلی انڈر گریجوایٹ سکالر شپ پروگرام کے لیے اڑھائی ارب، سپیشل ایجوکیشن کیلئے دو ارب، لٹریسی اینڈ نان فارمل ایجوکیشن کے لیے چار ارب مختص کرنیکی سفارش کی گئی ہے۔ سپورٹس اینڈ یوتھ افیئرز کی سکیموں کے لیے سات ارب ساٹھ کروڑ، سپیشلائزڈ ہیلتھ کیئر 86 ارب، پرائمری ہیلتھ کیئر کے لیے 42 ارب 60 کروڑ، پاپولیشن ویلفیئر کیلئے تین ارب 80 کروڑ، واٹر سپلائی اینڈ سینیٹیشن کے لیے آٹھ ارب مختص کرنیکی تجویز دی گئی ہے۔ 

سوشل ویلفیئر کے لیے چار ارب، معذوروں کے لیے دو ارب کی لاگت سے سی ایم ہمت کارڈ، نگہبان کارڈ کے لیے ایک ارب، وومن ڈیویلپمنٹ کیلئے ایک ارب چالیس کروڑ، لوکل گورنمنٹ کیلئے 61 ارب 75 کروڑ مختص کرنیکی کی سفارش کردی گئی ہے۔

روڈ سیکٹر کے لیے 143 ارب، آبپاشی 25 ارب 80 کروڑ، توانائی کے لیے ساڑھے سات ارب مختص کرنیکی کی تجویز دی گئی ہے۔ سی ایم روشن گھرانہ پروگرام کے لیے چار ارب، پبلک بلڈنگ 30 ارب،اربن ڈیویلپمنٹ چالیس ارب 50 کروڑ،زراعت کے لیے64 ارب 60 کروڑ مختص کرنیکی تجویز دی گئی ہے۔ 

وزیراعلی کسان کارڈ کے لیے 10 ارب، ٹیوب ویلز سولرائزیشن کے لیے اڑھائی ارب، سی ایم گرین ٹریکٹر پروگرام کیلئے 30 ارب، محکمہ جنگلات چار ارب، وائلڈ لائف چھ ارب چالیس کروڑ، فشریز کے لیے 5 ارب تین کروڑ، لائیو سٹاک نو ارب، انڈسٹریز دس ارب ستر کروڑ، سیاحت کیلئے چھ ارب 50 کروڑ مختص کرنیکی کی سفارش کردی۔

آئی ٹی 20 ارب 70 کروڑ، ٹرانسپورٹ18 ارب 50 کروڑ، ایمرجنسی سروس ایک ارب 40 کروڑ، محکمہ ماحولیات دس ارب، اوقاف کی سکیموں کے لیے چار ارب اور محکمہ پی اینڈ ڈی کی سکیموں کے کیے 46 ارب مختص کرنیکی کی تجویز کی گئی ہے۔

بجٹ 2024-25: پرانی درآمد شدہ گاڑیوں کی 3 سال تک فروخت پر پابندی کی تجویز

ویب ڈیسک: وفاقی حکومت آئندہ مالی سال کے بجٹ میں پرانی درآمد شدہ گاڑیوں کی تین سال تک پاکستان میں فروخت پر پابندی عائد کرنے پر غور کر رہی ہے۔

فیڈرل بورڈ آف ریونیو (ایف بی آر) کے ایک اعلیٰ عہدیدار کے مطابق موجودہ امپورٹ پالیسی میں ترمیم متعارف کروائی جا رہی ہے جس کے تحت استعمال شدہ گاڑیوں کی درآمد کے بعد تین سال تک اُنہیں فروخت نہیں کیا جا سکے گا۔

خیال رہے مالی سال 2024-25 کا بجٹ آج قومی اسمبلی میں پیش کیا جائے گا۔

پرانی درآمد شدہ گاڑیوں کی مقامی مارکیٹ میں فروخت پر پابندی کے ابتدائی فیصلے کی مقامی آٹو انڈسٹری حمایت کر رہی ہے تو دوسری جانب آل پاکستان کار ڈیلرز اینڈ امپورٹرز ایسوسی ایشن نے وزیر اعظم کو خط لکھ کر اپنے تحفظات کا اظہار کیا ہے۔

پرانی درآمد شدہ گاڑیوں کی فروخت پر پابندی لگانے کی وجوہات

پرانی درآمد شدہ گاڑیوں کی فروخت پر پابندی کی وجوہات کے متعلق ایف بی آر کے عہدیدار نے کہا کہ حکومت کے اس اقدام سے مقامی آٹو سیکٹر کو فروغ ملے گا۔

مزید یہ کہ حکومت کو ٹیکس کی مد میں اربوں روپے کا ریونیو حاصل ہو گا۔ ایک اندازے کے مطابق اس اقدام سے حکومت 52 ارب روپے کا اضافی ٹیکس حاصل کرسکتی ہے۔

’حکومت اس بات کو یقینی بنائے گی کہ درآمد کنندگان سمندر پار پاکستانیوں کے پاسپورٹ کا غلط استعمال نہ کر سکیں۔ کیونکہ ایسی گاڑیاں بیگج سکیم کے تحت بیرون ملک مقیم پاکستانیوں کے نام پر درآمد کی جاتی ہیں اور پھر کمرشل مارکیٹوں میں فروخت کر دی جاتی ہیں۔‘

ایف بی آر کےعہدیدار کا مزید کہنا تھا کہ وزیراعظم شہباز شریف نے ایک حالیہ اجلاس میں ادارے کو پرسنل بیگیج سکیم، ٹرانسفر آف ریزیڈنس سکیم اور گفٹ سکیم کے بڑے پیمانے پر غلط استعمال کو روکنے کے لیے اقدامات اٹھانے کی ہدایت کی ہے۔

ان کا کہنا تھا کہ ایسی سکیموں کے تحت بیرون ممالک سے پرانی گاڑیاں درآمد ہوتی ہیں اور پاکستان میں فروخت کی جاتی ہیں جبکہ حکومت کو ٹیکس کی مد میں اربوں روپے کا نقصان اٹھانا پڑتا ہے۔

'اس کے علاوہ ایسی سکیموں کے غلط استعمال کو روکنے کے لیے حکومت نے ابھی ابتدائی فیصلہ کیا ہے کہ ان سکیموں کے تحت پاکستان لائی جانے والی استعمال شدہ کاروں کو تین سال تک فروخت نہیں کیا جا سکے گا۔‘

انڈس موٹر پاکستان کے چیف ایگزیکٹو علی اصغر جمالی نے جاری بیان میں حکومت کی اس تجویز کی حمایت کی ہے۔

علی اصغر جمالی کی جانب سے جاری بیان میں کہا گیا ہے کہ اس وقت کی پرانی درآمد شدہ گاڑیوں کی درآمدی پالیسی سے حکومت اور مقامی انڈسٹری دونوں کو بھاری نقصان ہو رہا ہے جس میں ترامیم کی ضرورت ہے تاکہ مقامی انڈسٹری کو بھی فائدہ ہو اور حکومت کا ٹیکس بھی اکھٹا ہو۔

انہوں نے حکومتی تجویز پر بات کرتے ہوئے کہا کہ پرانی گاڑیوں کی درآمد پر پابندی سے حکومت کو 52 ارب روپے کا اضافی ٹیکس ملے گا جو موجودہ معاشی حالات میں حکومت کی اہم ضرورت ہے جبکہ پابندی سے مقامی سطح پر گاڑیوں کی صنعت کو فروغ ملے گا اور لوگوں کو روزگار کے نئے مواقع بھی ملیں گے۔

’مقامی صنعت کے فروغ سے ہنر مند افراد کی فہرست میں اضافہ ہو گا جو نہ صرف مقامی سطح پر فائدہ مند ہے بلکہ ایسے افراد بیرون ممالک جا کر ملک میں ترسیلات زر بھی بھیج سکتے ہیں۔‘

انہوں نے بتایا کہ انڈس موٹرز کمپنی کے تربیت یافتہ 150 کے قریب افراد کو ٹویاٹا جاپان بھیجا گیا ہے جبکہ مقامی سطح پر تیار گاڑیوں کے 50 یونٹ افریقی ممالک کو ایکسپورٹ بھی کیے جائیں گے۔

آل پاکستان کار ڈیلرز اینڈ امپورٹرز ایسوسی ایشن کے چیئرمین میاں شعیب احمد کا کہنا ہے کہ حکومت استعمال شدہ گاڑیوں کی درآمد کے لیے کوئی متبادل پالسی لائے بغیر اگر امپورٹ پالیسی میں ترامیم کرتی ہے تو یہ یک طرفہ فیصلہ ہو گا۔

آل پاکستان کار ڈیلرز اینڈ امپورٹرز ایسوسی ایشن کا وزیراعظم کو خط

آل پاکستان کار ڈیلرز اینڈ امپورٹرز ایسوسی ایشن (اپڈا) نے وزیر اعظم کو ایک خط بھی لکھا ہے جس میں اپنے تحفظات کا اظہار کیا ہے۔

ایسوسی ایشن کے چیئرمین میاں شعیب احمد نے کہا ’ہم اس بات کی نفی نہیں کرتے کہ پرانی درآمد شدہ گاڑیوں کی مارکیٹ میں فروخت ہوتی ہے۔ لیکن اس وقت امپورٹ پالیسی میں ترامیم کرنا مقامی کار مافیا کو مزید مضبوط بنانے کے مترادف ہو گا۔ حکموت ہمارے لیے کوئی متبادل امپورٹ پالیسی لائے تاکہ بینکنگ چینل کے ذریعے ہی ایسی گاڑیوں کی درآمد کی جا سکے۔‘

سمندر پار پاکستانیوں کی حق تلفی

اپڈا کے چیئرمین میاں محمد شعیب کا کہنا ہے کہ سمندر پار پاکستانی موجودہ امپورٹ پالیسی کے ذریعے ہی استعمال شدہ گاڑیوں کو پاکستان درآمد کرتے ہیں۔ اگر حکومت کوئی ایسا قدم اٹھاتی ہے تو اس سے سمندر پار پاکستانی متاثر ہوں گے مزید برآں استعمال شدہ گاڑیاں کی مقامی مارکیٹ میں فروخت مقامی کار اسمبلرز کی اجارہ داری کو کم کرتی ہے۔

مالی سال 2024-25: اہم وزارتوں کا ترقیاتی بجٹ کتنا ہوگا؟ دستاویز پبلک نیوز نے حاصل کرلی

ویب ڈیسک: آئندہ مالی سال کیلئے ترقیاتی بجٹ کی اہم دستاویز پبلک نیوز نے حاصل کر لی ہے۔ 

بجٹ دستاویز کے  مطابق پی ایس ڈی پی کا مجموعی حجم 14 سو ارب مختص ہے۔ وفاقی وزارتوں کا مجموعی بجٹ 1041 ارب روپے مختص کیا گیا ہے۔

دستاویز میں بتایا گیا ہے کہ وزارت آبی وسائل کیلئے 259 ارب اور سپارکو کیلئے 35 ارب روپے مختص کیے گئے ہیں۔ اسی طرح ریونیو ڈویژن کیلئے 17 ارب روپے اورریلوے ڈویژن کیلئے 43 ارب روپے مختص ہیں۔ 

بجٹ دستاویز کے  مطابق تخفیف غربت کیلئے آئندہ مالی سال ترقی کا بجٹ مختص نہیں کیا گیا۔ پیٹرولیم ڈویژن کیلئے 3 ارب 22 کروڑ کا ترقیاتی بجٹ مختص ہے۔ داخلہ ڈویژن کیلئے 9 ارب 7 کروڑ روپے اور آئی ٹی و ٹیلی کمیونیکیشن کیلئے 28 ارب 92 کروڑ کا بجٹ مختص ہے۔

اسی طرح آئندہ بجٹ میں انفراسٹکچر کیلئے 827 ارب روپے کا ترقیاتی بجٹ مختص ہے جبکہ توانائی کیلئے 253 ارب، ٹرانسپورٹ اور مواصلات کیلئے 279 ارب اور پانی کے منصوبوں کیلئے 206 ارب روپے کا ترقیاتی بجٹ مختص ہے۔ 

ذرائع کا کہنا ہے کہ آئندہ بجٹ میں سماجی شعبے کیلئے 280 ارب، صحت کیلئے 45 ارب، تعلیم اور ہائر ایجوکیشن کیلئے 93 ارب، ایس ڈی جیز کیلئے آئندہ مالی سال میں 75 ارب روپے خرچ کرنے کا منصوبہ بنایا گیا ہے۔ 

ذرائع کے مطابق غذائی و زراعت کیلئے 42 ارب روپے، گورننس کیلئے 28 ارب روپے، سائنس و آئی ٹی کیلئے 79 ارب روپے، کے پی میں ضم شدہ اضلاع کیلئے 64 ارب روپے اور آزادکشمیر و گلگت بلتستان کیلئے 75 ارب روپے کا ترقیاتی بجٹ مختص کیا گیا ہے۔

بجٹ دستاویز کے مطابق فوڈ سیکورٹی کیلئے 41 ارب 25 کروڑ روپے، وزارت صحت کیلئے 27 ارب روپے، صنعت و پیداوارکیلئے4 ارب91 کروڑ روپے، وزارت انسانی حقوق کیلئے 10 کروڑ 40 لاکھ روپے، ہاؤسنگ اینڈ ورکس کیلئے27 ارب 68 کروڑ روپے، ہائرایجوکیشن کمیشن کیلئے 66 ارب 31 کروڑ روپے اور آزاد کشمیر اور گلگت بلتستان کیلئے 74 ارب 50 کروڑ روپے کا ترقیاتی بجٹ مختص کیا گیا ہے۔ 

اقتصادی سروے 2023-24: انٹرنیٹ صارفین کی تعداد کے حوالے سے حیران کن خبر 

ویب ڈیسک: اقتصادی سروے 24-2023 کی دستاویز کے مطابق رواں مالی سال کے دوران ملک میں 13 کروڑ 50 لاکھ افراد انٹرنیٹ استعمال کرتے ہیں۔

وفاقی حکومت کی جانب سے جاری اقتصادی سروے کے مطابق ملک میں 13 کروڑ 50 لاکھ افراد انٹرنیٹ استعمال کرتے ہیں۔ ٹیلی کام صارفین کی تعداد 19 کروڑ 46 لاکھ سے بڑھ گئی۔

رواں سال فروری کی نسبت مارچ میں آئی ٹی برآمدات 19.1 فیصد بڑھیں۔ فری لانسرز کے لیے 3 کروڑ 50 لاکھ ڈالر پاکستان میں آئے ہیں۔

اقتصادی سروے 2023-24: ملک میں شرح خواندگی 62.8 فیصد رہی

ویب ڈیسک: اقتصادی سروے 24-2023 کی دستاویز کے مطابق رواں مالی سال کے دوران ملک میں شرح خواندگی 62.8 فیصد رہی جس میں خواتین میں شرح خواندگی 51.9 فیصد اور مردوں میں یہ شرح 71.4 فیصد رہی ہے۔

جاری کردہ اعداد وشمار کے مطابق ملک میں یونیورسٹیوں کی مجموعی تعداد 263 ہے۔ سرکاری یونیورسٹیاں 154 اور نجی یونیورسٹیوں کی تعداد 109 ہے۔

اقتصادی سروے میں خوشخبری: آئی ٹی برآمدات میں اضافہ

ویب ڈیسک: اقتصادی سروے 24-2023 کی دستاویز کے مطابق رواں مالی سال کے دوران آئی ٹی برآمدات کا حجم 2 ارب 28 کروڑ ڈالر رہا۔

رواں سال ملک میں انفارمیشن ٹیکنالوجی کی 20 ہزار کمپنیاں رجسٹرڈ ہوئیں۔ جبکہ پاکستان کی آئی ٹی برآمدات کا حجم 2 ارب 28 کروڑ ڈالر رہا ہے۔ آئی ٹی کے شعبے میں 35 کروڑ ڈالر زرمبادلہ آیا۔

رواں مالی سال کے دوران (جولائی تا مارچ) آئی ٹی برآمدات میں 17.44 فیصد اضافہ ہوا۔ جولائی تا مارچ آئی ٹی برآمدات میں 33 کروڑ90 لاکھ ڈالرز ریکارڈ اضافہ ہوا۔

گذشتہ سال اسی عرصے میں آئی ٹی برآمدات 1 ارب 94 کروڑ40 لاکھ ڈالرز تھیں۔ رواں سال مارچ میں آئی ٹی برآمدات میں 30 کروڑ 60 لاکھ ڈالرز اضافہ ہوا۔

90 ہزار سے زائد پاکستانی عازمین حج سعودی عرب پہنچ گئے

ویب ڈیسک: 90 ہزار سے زائد پاکستانی عازمین حج سعودی عرب پہنچ گئے، سرکاری حج سکیم کے تحت 60 ہزار پاکستانی مکہ پہنچ چکے ہیں جبکہ نجی سکیم کے ذریعے 31 ہزار سے زائد عازمین سعودی عرب پہنچے ہیں۔ 

اس سال تقریبا 30 لاکھ عازمین حج کا فریضہ ادا کریں گے۔ 

حجاج کرام کے سعودی عرب میں معمولات:

7 ذی الحج کو تمام حاجی احرام باندھ لیتے ہیں۔ سات ذی الحج کی شام کے بعد تمام حاجی منٰی میں پہنچنا شروع ہو جاتے ہیں۔

8 ذی الحج کی ظہر سے لے کر فجر تک 5 نمازیں منٰی میں ادا کرنی ہوتی ہیں۔ اس کے بعد تمام حجاج کرام عرافات کی طرف رواں دواں ہو جاتے ہیں۔ 

اس کے بعد حجاج کرام مزدلفہ میں رات قیام کرتے ہیں اور نماز فجر ادا کرتے ہیں۔۔ اس کے بعد سعی کی جاتی ہے یعنی صفا و مرویٰ کے سات چکر لگائے جاتے ہیں۔ 

حجاج کرام سعی کے بعد جمرات پہنچتے ہیں جہاں شیفان کو کنکریاں ماری جاتی ہیں۔ اس کے بعد سر کے بال منڈوا کر طواف وداع کرکے حجاج کرام حج مکمل کرلیتے ہیں۔ 

وفاقی وزارت تعلیم کے بجٹ میں 204 فیصد کا حیران کن اضافہ

ویب ڈیسک: وفاقی حکومت نے تعلیم دوستی کا ثبوت دیتے ہوئے وفاقی وزارت تعلیم کیلیے آئندہ مالی سال کے بجٹ میں 25ارب 75کروڑ مختص کرنیکی تجویز دی ہے۔

وزارت تعلیم کے بجٹ میں 204 فیصد کا حیران کن اضافہ کیا گیا ہے۔ حکام کے مطابق پاکستان نیشنل انڈومنٹ فنڈ کی مد میں 2 ارب مختص کر دیے گئے ہیں۔ آزاد کشمیر اور گلگت بلتستان میں دانش اسکول قائم کرنے کیلئے فنڈزکو50کروڑ سے 5ارب تک بڑھا دیا گیا۔

واضح رہے کہ گزشتہ سال وزارت تعلیم کیلئے صرف 8ارب 50کروڑ مختص تھے۔

بجٹ 2024-25: سرکاری ملازمین کا پاک سیکرٹریٹ کے باہر احتجاج کا منصوبہ

ویب ڈیسک: بجٹ کے موقع پر سرکاری ملازمین سراپا احتجاج ہیں۔ اسلام آباد کے سرکاری سکول کے اساتذہ پاک سیکرٹریٹ کے باہر احتجاج کریں گے۔

جوائنٹ ایجوکیشن کمیٹی نے مطالبہ کیا ہے کہ بجٹ میں سرکاری ملازمین کی پینشنز اور تنخواہوں میں اضافہ کیا جائے۔ سرکاری اساتذہ کی تنخواہوں میں کٹوتی اور تفریق کو ختم کیا جائے۔ 

اساتذہ کا کہنا ہے کہ مہنگائی کے باعث پرانی تنخواہوں پر گزارا ممکن نہیں۔ انہوں نے مطالبہ کیا کہ مہنگائی کے تناسب سے موجودہ بجٹ میں سرکاری ملازمین کی تنخواہوں میں اضافہ کیا جائے۔ پنشن اصلاحات کے نام پر سرکاری ملازمین کا معاشی قتل بند کیا جائے۔ 

بجٹ 2024-25: پنشنرز کیلئے بری خبر، بیٹی کی پنشن ختم کرنے کی تجویز

ویب ڈٰیسک: پاکستان میں آئندہ مالی سال کیلئے وفاقی بجٹ آج قومی اسمبلی میں پیش کیا جارہا ہے۔ جس میں پنشنرز کیلئے بری خبر آگئی ہے۔

تفصیلات کے مطابق پنشن اصلاحات کے تحت نئے بھرتی ہونے والے ملازمین کیلئے رضاکارانہ کنٹری بیوٹری پنشن سسٹم متعارف کیے جانے کا امکان ہے جبکہ ریٹائرہونے والے ملازمین کوتاحیات کی بجائے 20 سال تک پنشن دی جانے کی تجویز ہے۔

ملازمین کی فیملی پنشن کی مدت 10 تا15 سال جبکہ بیٹی کی پنشن ختم اورکموٹیشن کم کرنے کا بھی امکان ہے۔

پنجاب بجٹ 2024-25: صحت،تعلیم کیلئے 167 ارب سے زائد تجویز

ویب ڈیسک: (دانش منیر) پنجاب کے مالی 2024 -25 کی بجٹ تجاویز کے معاملے میں نئی پیشرفت سامنے آگئی۔ سرکاری محکموں کی جانب سے بجٹ تجاویز ارسال کردی گئی ہیں۔ جس کے تحت صحت اور تعلیم شعبوں نے 167 ارب 70 کروڑ 90 لاکھ روپے مختص کرنے کی تجویز دی گئی ہے۔

تفصیلات کے مطابق پنجاب کے مالی سال 2024 -25 کی بجٹ تجاویز کے معاملے میں اہم پیشرفت سامنے آگئی ہے۔  صوبہ پنجاب کے سرکاری محکموں کی جانب سے بجٹ تجاویز ارسال کردی گئی ہیں۔ 

ذرائع کے مطابق پنجاب کے شعبہ صحت اور تعلیم کے لیے بجٹ تجاویز بھجوا دی گئی ہیں۔ تعلیم و صحت کی جانب سے 167 ارب 70 کروڑ 90 لاکھ روپے مختص کرنے کی تجویز دی گئی ہے۔ 

• محکمہ سپیشلائزڈ اینڈ ہیلتھ کیئرنے76 ارب 61 کروڑ 50 لاکھ مختص کرنے کی تجویز دی ہے۔
• پرائمری اینڈ سیکنڈری ہیلتھ کیئر کیلئے 33 ارب 89 کروڑ 70 لاکھ مختص کرنے کی تجویز ہے۔
• سکول ایجوکیشن ڈیپارٹمنٹ کیلئے 51 ارب 69کروڑ 70لاکھ روپے مختص کرنے کی تجویز ہے۔
• سپیشل ایجوکیشن کے لیے دو ارب روپے کی تجویز ارسال کی گئی ہے۔
• لٹریسی و نان فارمل ایجوکیشن کےلیے تین ارب 50 کروڑ مختص کرنے کی تجویز رکھی گئی ہے۔
• محکمہ پلاننگ اینڈ ڈویلپمنٹ بورڈ نے تجاویز محکمہ خزانہ پنجاب کو ارسال کردیں۔

وفاقی بجٹ کے نمایاں خدوخال: دفاع کیلئے 2100 ارب روپے مختص

ویب ڈیسک: آئندہ مالی سال کے وفاقی بجٹ کے اہم خدوخال سامنے آگئے۔ ذرائع کے مطابق بجٹ 2024-25 کا مجموعی حجم 18 ہزار ارب روپے ہو گا۔ جس میں دفاع کیلئے 2100 ارب روپے رکھے گئے ہیں۔ 

تفصیلات کے مطابق آئندہ مالی سال کے بجٹ میں انفراسٹرکچر کیلئے 827 ارب روپے مختص کیے گئے ہیں۔ 

• آئندہ بجٹ میں توانائی کیلئے 253 ارب روپے رکھے گئے ہیں۔
• آئندہ بجٹ میں ٹرانسپورٹ اور مواصلات کیلئے 279 ارب روپے مختص ہیں۔
• آئندہ بجٹ میں پانی کے منصوبوں کیلئے 206 ارب روپے رکھے گئے ہیں۔
• آئندہ بجٹ میں سماجی شعبے کیلئے 280 ارب رکھے گئے ہیں۔
• آئندہ مالی سال کے بجٹ میں صحت کیلئے 45 ارب روپے مختص ہیں۔
• آئندہ بجٹ میں تعلیم اور ہائر ایجوکیشن کیلئے 93 ارب روپے رکھے گئے ہیں۔
• ایس ڈی جیز کیلئے آئندہ مالی سال 75 ارب روپے رکھے گئے ہیں۔
• آئندہ مالی سال کے بجٹ میں زراعت کیلئے 42 ارب روپے مختص ہیں۔
• آئندہ مالی سال گورننس کیلئے 28 ارب روپے رکھے گئے ہیں۔
• سائنس و آئی ٹی کیلئے 79 ارب روپے مختص کیے گئے ہیں۔ 
• کے پی کے میں انضمام شدہ اضلاع کیلئے 64 ارب رکھے گئے ہیں۔
• آزادکشمیر و گلگت بلتستان کیلئے 75 ارب روپے رکھے گئے ہیں۔

وفاقی بجٹ 2024-25: صوبوں کا ترقیاتی بجٹ 2095 ارب روپے ہوگا

ویب ڈیسک: آئندہ مالی سال کے بجٹ کی دستاویزات کے مطابق اگلے مالی سال وفاق اور صوبے مل کر ترقیاتی منصوبوں پر 3792 ارب روپے خرچ کریں گے۔

دستاویز میں بتایا گیا ہے کہ رواں مالی سال کے مقابلے میں مجموعی قومی ترقیاتی بجٹ میں 1012 ارب روپے کا اضافہ ریکارڈ کیا گیا ہے۔ جس کے بعد وفاقی پی ایس ڈی پی 550 ارب اضافے کے ساتھ 1500 ارب روپے مقرر کردیاگیا ہے۔ 

دستاویز میں کہا گیا ہے کہ چاروں صوبوں کا سالانہ ترقیاتی پلان 462 ارب روپے اضافے سے 2095 ارب روپے ہوگیا ہے۔ صوبہ سندھ ترقیاتی منصوبوں پر سب سے زیادہ 764 ارب روپے خرچ کرے گا۔ 

دستاویز میں یہ بھی کہا گیا ہے کہ صوبہ پنجاب نے 700 ارب روپے کا ترقیاتی بجٹ مقرر کر دیا ہے۔ پختوانخواہ نے 351 ارب  اور بلوچستان نے 281 ارب روپے ترقیاتی بجٹ مختص کر دیا ہے۔

شرح نمو میں کمی، اہم اہداف میں ناکامی:قومی اقتصادی سروے آج پیش کیا جائے گا

ویب ڈیسک: وفاقی بجٹ 2024-25 کی تیاریاں جاری ہیں۔ جس کے تحت رواں مالی سال کا قومی اقتصادی سروے آج قومی اسمبلی میں پیش کیا جائے گا۔ اقتصادی سروے میں معیشت میں بہتری کے آثار کو اجاگر کیا جائے گا۔ ذرائع کا کہنا ہے کہ اقتصادی سروے میں معیشت کے اہم اعداد وشمار پیش کیے جائیں گے۔

وفاقی وزیر خزانہ محمد اورنگزیب اقتصادی سروے پیش کریں گے۔ اس موقعے پر وفاقی وزیر منصوبہ بندی ترقی و خصوصی اقدامات احسن اقبال، حکومت کی اقتصادی ٹیم کے اراکین اور دیگر متعلقہ وزارتوں کے سیکریٹری بھی ہوں گے۔ 
قومی اقتصادی سروے میں جاری مالی سال کے دوران اہم سماجی و اقتصادی اہداف اور مختلف شعبوں میں پیشرفت کی تفصیلات شامل ہوں گی۔
اقتصادی سروے میں زراعت، مینوفیکچرنگ، صنعت، خدمات، توانائی، انفارمیشن ٹیکنالوجی و ٹیلی کمیونیکیشن، کیپٹل مارکیٹس، صحت، تعلیم، ٹرانسپورٹ اور مواصلات سمیت مختلف شعبوں میں پیشرفت اور اقتصادی رجحانات کا احاطہ کیا جائے گا۔
اقتصادی سروے کے سامنے آنے والے اعداد وشمار کے مطابق حکومت کو زرعی شعبے کے علاوہ بعض دیگر اہم معاشی اہداف حاصل کرنے میں ناکامی کا سامنا رہا ہے۔

اقتصادی سروے کی حاصل شدہ دستاویزات کے مطابق رواں مالی سال قرضوں، واجبات میں 4643 ارب روپے کا اضافہ ہوا۔ خالص قرضے اور واجبات 67,524 ارب روپے تک پہنچ گئے۔ رواں سال 9 ماہ میں ملکی قرضوں میں 4623 ارب روپے کا اضافہ ہوا۔ 9 ماہ کے دوران ملکی قرضہ 43 ہزار 432 ارب روپے تک پہنچ گیا۔ 

دستاویز میں بتایا گیا ہے کہ اس عرصے میں بیرونی قرضوں میں 89 ارب روپے کی کمی ہوئی۔ رواں مالی سال 9 ماہ میں بیرونی قرضہ 21,941 ارب روپے رہا۔ ملک کا مجموعی عوامی قرضہ جی ڈی پی کا 74.8 فیصد ہے۔ کل ملکی بیرونی قرضے اور واجبات جی ڈی پی کا 43 فیصد ہیں۔ اس وقت ملک کا کل قرضہ جی ڈی پی کا 46.2 فیصد ہے۔

فرٹیلائزر میں 3 فیصد اضافہ: 

ذرائع کا کہنا ہے کہ رواں مالی سال کے 5 ماہ کے دوران ملک میں فرٹیلائزر 3 فیصد بڑھی۔ 5 ماہ میں فرٹیلائزر کی فروخت 2 اعشاریہ 55 ملین ٹن پر پہنچ گئی۔ گزشتہ سال اسی عرصے میں فرٹیلائزر کی فروخت 2 اعشاریہ 49 ملین ٹن تھی۔ مئی میں فرٹیلائزر کی فروخت 13 فیصد کمی سے 4 لاکھ ٹن رہی۔

سیمنٹ کی فروخت میں اضافہ: 

رواں مالی سال کے 11 ماہ میں سیمنٹ کی فروخت میں 3 فیصد اضافہ ہوا۔ اس عرصے کے دوران سیمنٹ کی فروخت بڑھ کر 41.74 ملین ٹن ہو گئی۔ گزشتہ سال اسی عرصے کے دوران سیمنٹ کی فروخت 40.52 ملین ٹن تھی۔ 11 ماہ میں سیمنٹ کی برآمدات میں 66 فیصد کا اضافہ ریکارڈ کیا گیا۔ رواں مالی سال کے 11 ماہ میں سیمنٹ کی برآمدات 6.64 ملین ٹن تک پہنچ گئیں۔ گزشتہ سال اسی عرصے کے سیمنٹ برآمدات 3.99 ملین ٹن تھیں۔

برآمدات میں اضافہ:

سرکاری دستاویزات کے مطابق مئی میں ملکی مجموعی برآمدات میں 27 فیصد اضافہ ہوا۔ مئی میں برآمدات بڑھ کر 2.8 بلین ڈالر تک پہنچ گئیں۔ مئی میں درآمدات 14 فیصد اضافے سے 4.9 بلین ڈالر ریکارڈ کی گئیں۔ مئی میں تجارتی خسارہ 2.1 بلین ڈالر ریکارڈ کیا گیا۔  جولائی سے مئی برآمدات 11 فیصد اضافے سے 28 بلین ڈالر ریکارڈ کی گئیں۔11 ماہ کے دوران درآمدات 2.4 فیصد کم ہوکر 49.8 بلین ڈالر ہوگئیں۔ 11 ماہ کے دوران تجارتی خسارہ 15 فیصد کم ہو کر 21.7 بلین ڈالر رہ گیا۔

غیرملکی سرمایہ کاری میں اضافہ: 

جولائی سے اپریل کے دوران غیر ملکی سرمایہ کاری 659 ملین ڈالر رہی۔ اس عرصے کے دوران غیرملکی سرمایہ کاری میں 93 فیصد اضافہ ہوا۔ جولائی تا اپریل غیر ملکی سرمایہ کاری میں 8 فیصد اضافہ ریکارڈ کیا گیا۔ 10 ماہ کے دوران براہ راست غیر ملکی سرمایہ کاری 1.45 بلین ڈالرریکارڈ کی گئی۔ 10 ماہ میں ایکویٹیز میں سرمایہ کاری بڑھ کر81 ملین ڈالر تک پہنچ گئی۔

کرنٹ اکاؤنٹ خسارہ سرپلس: 

دستاویز کے مطابق مالی سال کے 10 ماہ میں کرنٹ اکاؤنٹ خسارہ 538 ملین ڈالر رہا۔ پچھلے سال کی اسی مدت کے دوران یہ تقریباً 4.2 بلین ڈالر تھا۔ اپریل میں کرنٹ اکاؤنٹ 453 ملین ڈالر سرپلس میں تھا۔ مارچ میں کرنٹ اکاؤنٹ نے 415 ملین ڈالر کا سرپلس بھی دکھایا۔

شرح نمو میں کمی:

رواں مالی سال معاشی ترقی 3.5 کے مقابلے 2.38 فیصد رہی۔ زرعی شعبے کی ترقی 3.6 فیصد ہدف کے مقابلے 6.25 فیصد رہی۔ صنعتی شعبے کی ترقی 3.4 فیصد کے مقابلے 1.21 فیصد رہی۔ خدمات  کےشعبے کی شرح نمو 3.6 فیصد کے مقابلے 1.2 فیصد رہی۔

گندم کی فصل 11.64 فیصد اضافے سے  28.16 ملین رہی۔ کپاس کی فصل 108 فیصد اضافے سے 10.22 ملین بیلز رہی۔ چاول کی پیداوار 34.78 فیصد اضافے سے تقریبا 99 لاکھ ٹن رہی۔ مکئی کی پیداوار 10.3 فیصد کمی سے 98 لاکھ  50 ہزار ٹن رہی۔ رواں سال لائیو اسٹاک کے شعبے میں شرح نمو  3.8 فیصد رہی۔

اسٹیٹ بینک کی نئی مانیٹری پالیسی کا اعلان، شرح سود میں کمی

ویب ڈیسک: اسٹیٹ بینک نے نئی مانیٹری پالیسی کا اعلان کردیا ہے۔ جس کے تحت شرح سود میں کمی کردی گئی ہے۔

تفصیلات کے مطابق اسٹیٹ بینک آف پاکستان (ایس بی پی) نے شرح سود میں ڈیڑھ فیصد کمی کا اعلان کردیا۔ 

مرکزی بینک کے مطابق شرح سود کو 22 فیصد سے کم کر کے 20.5 فیصد کردیا گیا ہے۔ 

ایس بی پی اعلامیہ میں کہا گیا ہے کہ شرح سود 150 بیسسز پوائنٹس کم ہوا ہے۔

بجٹ2024-25:پاورسیکٹر کےترقیاتی بجٹ میں 200 فیصد تک اضافہ

ویب ڈیسک:(جوادملک) ملکی پاور سیکٹر کے ترقیاتی بجٹ میں 200 فیصد اضافے کی تجویز دی گئی ہے جبکہ پاورسیکٹر کیلئے آئندہ مالی سال 14 نئے منصوبے بھی شامل ہوں گے۔

تفصیلات کے مطابق ذرائع کا کہنا ہے کہ آئندہ مالی سال پاور سیکٹر کے لیے اضافی بجٹ مختص کیے جانے کی تجویز زیر غور ہے، وفاقی بجٹ 2024-25 میں پاور سیکٹر کے ترقیاتی بجٹ میں 200 فیصد تک اضافہ کرکے 239 ارب 42 کروڑ روپے سے زائد مختص کرنے کی تجویز دی گئی ہے۔

ذرائع کا کہنا ہے کہ پاور سیکٹر کے لیے آئندہ مالی سال 14 نئے منصوبے بھی شامل ہوں گے، مجوزہ ترقیاتی بجٹ کے مطابق لیہ میں 1200 میگاواٹ سولر پلانٹ کے لیے زمین کی دریافت کا منصوبہ شامل ہے، منصوبے کے لیے زمین کی خریداری لاگت 6 ارب 25 کروڑ روپے مختص ہوگی۔

آئندہ مالی سال کے لیے انرجی بیٹری اسٹوریج منصوبہ بھی پلان میں شامل ہیں، منصوبے کے لیے آئندہ مالی سال ایک ارب 58 کروڑ روپے مختص کیے جانے کی تجویز دی گئی ہے۔

علاوہ ازیں جنکو ون کول پاورپراجیکٹ کے لیے آئندہ بجٹ میں 35 ارب روپے مختص کیے جانے کی تجویز ہے جبکہ جھنگ میں 600 میگاواٹ سولر منصوبے کی جگہ کی خریداری کے لیے 63 کروڑ 30 لاکھ روپے مختص کرنے کی تجویز ہے، اسی طرح بجلی کے ترسیلی نظام کی اپ گریڈیشن کے لیے 5 ارب 50 کروڑ روپے مختص ہوں گے۔

ذرائع کا کہنا ہے کہ کاسا 1000 منصوبے کے انٹرکنکشن کے لیے 4 ارب 88 کروڑ روپے سے زائد رکھنے کی تجویز ہے، این ٹی ڈی سی کے گرڈ اسٹیشنز کی بہتری کے لیے 4 ارب 80 کروڑ روپے رکھنے کی تجویز ہے۔

داسو پن بجلی کے منصوبے سے بجلی فراہمی منصوبہ کا فیز ون بھی آئندہ بجٹ میں شامل ہے، منصوبے کے لیے آئندہ مالی سال میں 22 ارب 11 کروڑ روپے مختص کیے جانے کی تجویز ہے۔

تربیلا 5 توسیعی منصوبے سے بجلی کے اخراج کے لیے ایک ارب 70 کروڑ روپے مختص ہوں گے جبکہ 500 اور 220 کے وی گرڈ اسٹیشنز کی اپ گریڈیشن کے لیے 5 ارب 23 کروڑ روپے مختص کیے جائیں گے۔

بجٹ2024-25:صنعتی پیداوارکیلئے5 ارب 79 کروڑ سےزائدکاترقیاتی بجٹ

ویب ڈیسک: وفاقی حکومت نے بجٹ میں صنعتوں کے فروغ کے لیے مزید اقدامات کا فیصلہ کر لیا۔

تفصیلات کے مطابق ذرائع کا کہنا ہے کہ وزارتِ صنعت و پیدوار کے ترقیاتی بجٹ میں تقریباً 100 فیصد اضافے کی تجویز ہے۔نئے مالی سال میں صنعت وپیداوار کے لیے 5 ارب 79 کروڑ 50 لاکھ روپے کا ترقیاتی بجٹ تجویز کیا گیا ہے۔

ذرائع کا کہنا ہے کہ رواں مالی سال کے لیے وزارتِ صنعت و پیداوار کا ترقیاتی بجٹ 3 ارب روپے مختص تھا جبکہ آئندہ مالی سال صعنت و پیدوار کے 13 جاری منصوبوں کے لیے 5 ارب 64 کروڑ 50 لاکھ روپے رکھنے کی تجویز ہے۔

آئندہ مالی سال صعنت و پیداوار کا نیا منصوبہ شروع کرنے کا فیصلہ کیا گیا ہے۔

پورٹ قاسم انڈسٹریل پارک کے 132 کے وی اے گرڈ اسٹیشن کی تعمیر کے لیے 1 ارب 30 کروڑ روپے رکھنے کی تجویز ہے۔

ذرائع کے مطابق کراچی میں انڈسٹریل پارک کے لیے 70 کروڑ روپے کا ترقیاتی بجٹ رکھنے کی تجویز ہے جبکہ  بلوچستان لسبیلا میں خصوصی اقتصادی زون کی تعمیر کے لیے ایک ارب روپے رکھنے کی تجویز ہے۔

کراچی سمیت بڑے شہروں میں ایس ایم ای بزنس سہولت سینٹرز کے لیے 66 کروڑ روپے رکھنے کی تجویز ہے اور انڈسٹریل ٹیکنالوجی کے حصول سے متعلق منصوبے کے لیے 40 کروڑ روپے کا بجٹ تجویز کیا گیا ہے۔

ملک بھر میں ایک ہزار انڈسٹریل اسٹیچنگ یونٹس کے قیام کے لیے 30 کروڑ روپے جبکہ کراچی، لاہور، سیالکوٹ میں انڈسٹریل ڈیزائنر اور آٹومیشن سینٹرز کی تعمیر کے لیے 30 کروڑ روپے تجویز کیے گئے ہیں۔

بجٹ2024-25: چینی، گھی سمیت بیشتر اشیائے ضروریہ کی قیمتوں میں اضافہ

ویب ڈیسک: آئندہ مالی کے سال کے بجٹ میں چینی اور گھی سمیت بیشتر اشیائے ضروریہ پر سیلز ٹیکس میں اضافے کی تجویز دے دی گئی۔

تفصیلات کے مطابق ذرائع کا کہناہے کہ چینی پر سیلز ٹیکس 18 سے بڑھ کر 19 فیصد ہونے سے چینی کے فی کلو نرخوں میں 5 روپے تک اضافے کاامکان ہے، ایک فیصد سیلز ٹیکس بڑھنے سے گھی 5سے 7 سات روپے، صابن 2 سے 5 روپے، شیمپو 15 سے 20 روپے مہنگا ہونے کا امکان ہے۔

سیلز ٹیکس میں اضافے کے باعث مصالحہ جات کی بیشتر آئٹمز ، چائے اور قہوہ کی پتی ، درجنوں برانڈ بیکنگ آئٹمز ، نوڈلز، پاستہ اور بچوں کے ناشتے کے اشیاء جام، جیلی اور مارمالیڈ مہنگی ہونے کا خدشہ ہے۔

اسی طرح ایک فیصد سیلز ٹیکس بڑھنے سے الیکٹرونکس کی سیکڑوں اشیاء کی قیمتوں میں اضافے کا خدشہ ہے، سیلز ٹیکس بڑھنے سے میک اپ کی اشیاء، کپڑے، لیدر آئٹمز مہنگی ہونے کا امکان ہے۔

ذرائع کے مطابق ایک فیصد سیلز ٹیکس بڑھنے سے ٹشو، پیپر نیپ کنز، بچوں کے ڈائپرز، برتن،اسمارٹ واچ اور گھڑیاں مزید مہنگی ہو سکتی ہیں۔ 

سولر پینلز پر بھاری ٹیکس کے حوالے سے اہم خبر آگئی

ویب ڈیسک: بجٹ 2024-25 میں  سولر سسٹمز پر بھاری ٹیکس عائد کئے جانے کا خدشہ ہے۔ سولر پلیٹوں کی قیمت میں فی واٹ 588 روپے اضافہ کردیا گیا ہے۔

رپورٹ کے مطابق  588 واٹ کی سولر پلیٹ کی قیمت میں اب 4 تا 5 ہزارروپے اضافہ ہوچکا ہے جبکہ 180 واٹ کی سولر پلیٹ اب 1440 روپے مہنگی ہوچکی ہے۔ 

تاہم اس حوالے سے 18 تا 280واٹ کے چھوٹے سولر پینلز کی قیمت فروخت کی شرح میں سب سے زیادہ اضافہ دیکھا جارہا ہے۔ 

ذرائع کا کہنا ہے کہ اس خدشے کی وجہ سے قیمتوں میں بھی اضافہ ہوا ہے کہ وفاقی حکومت نیٹ میٹرنگ ریگولیشنز میں بڑی ترامیم پر کام کر رہی ہے تاکہ سسٹم کو مکمل طور پر ختم کیا جاسکے اور اس کی جگہ مجموعی میٹرنگ سسٹم سے شمسی توانائی کے استعمال کی حوصلہ شکنی کی جا سکے اور صارفین کو زبردستی ناقابل برداشت گرڈ بجلی کی طرف واپس جانے پر مجبور کیا جا سکے۔

ذرائع نے بتایا ہے کہ نیٹ میٹرنگ کے مسئلے پر وفاقی حکومت کو پریشان کن صورتِ حال کا سامنا ہے کیونکہ اس حوالے سے بیورو کریٹس اور سیاست دانوں کے درمیان جنگ کی کیفیت پائی جاتی ہے۔ اس حوالے سے 7 فارمولے زیرِغور ہیں۔

بیورو کریسی کا مؤقف یہ ہے کہ شمسی توانائی کے فروغ سے ملک میں توانائی کا شعبہ شدید بحران کا شکار ہوگا۔ سیاست دان اس منطق یا دلیل کو قبول نہیں کر رہے۔

میڈیا رپورٹ کے مطابق بیورو کریٹس اور حکومتی شخصیت سے قربت رکھنے والے افسران کے مطابق نیٹ میٹرنگ اب اسلام آباد کے لیے ایک بڑے دردِ سر میں تبدیل ہوگئی ہے۔

بیورو کریسی نے، بظاہر توانائی کے شعبے کو بچانے کے لیے، تجویز کیا ہے کہ شمسی توانائی کا نظام مرحلہ وار پھیلانے اور بائی بیک میکینزم کے لیے آسٹریلین موڈ اپنایا جائے۔ 

وزیرِاعظم کی میز پر رکھی جانے والی ایک تجویز یہ بھی ہے کہ بجلی کے بل یونٹس کے بجائے نیٹ میٹرنگ کے تناظر میں طے کیے جائیں۔ شمسی توانائی کے نرخ حکومت حتمی طور پر متعین کرے گی۔

بجٹ 2024-25: کیا Netflix بھی مہنگا ہونے جارہا ہے؟

ویب ڈیسک: فیڈرل بورڈ آف ریونیو (ایف بی آر) نے Netflix کو200 ملین (20 کروڑ) روپے سے زائد کی وصولی کے لیے نوٹس بھیج دیا ہے۔ جس کے بعد ذرائع نے دعویٰ کیا ہے کہ آئندہ مالی سال کا بجٹ پیش کیے جانے کے بعد سٹریمنگ سروس کی ماہانہ فیس میں بھی اضافہ ہوجائے گا۔

یاد رہے کہ Netflix ایک سٹریمنگ سروس ہے جو انٹرنیٹ سے منسلک ہزاروں آلات پر ایوارڈ یافتہ ٹی وی شوز، فلمیں، موبائل فونز، دستاویزی فلمیں اور بہت کچھ پیش کرتی ہے۔

تفصیلات کے مطابق Netflix نے 250  روپے سے لے کر1100 روپے تک  صارفین کو مختلف پیکجز کی پیشکش کی ہے اور ذرائع  کا کہنا ہے کہ کمپنی نے صرف پاکستان میں سال 2021 کے دوران 1.3 بلین کی آمدنی  حاصل کی ہے۔

واضح رہے نیٹ فلکس اور کچھ دیگر کمپنیاں پاکستان میں اپنے دفاتر کے بغیر آف شور ڈیجیٹل سروسز فراہم کر رہی ہیں۔

ذرائع نے مزید کہا کہ ایف بی آر نے نیٹ فلکس سنگاپور کے دفتر کو نوٹس جاری کیا تھا۔

یہ بھی سامنے آیا ہے کہ آف شور ڈیجیٹل سروسز فراہم کرنے والی کمپنیاں مبینہ طور پر ٹیکس سے بچنے کے لیے ڈبل ٹیکسیشن ایگریمنٹس (DTA) کے پیچھے چھپ رہی ہیں۔

ڈی ٹی اے معاہدہ کیا ہوتا ہے؟

یہ بات قابل غور ہے کہ ڈی ٹی اے ایک معاہدہ ہے جس پر دو ممالک نے دستخط کیے ہیں تاکہ دونوں ممالک کی طرف سے ایک ہی آمدنی پر علاقائی دوہرے ٹیکس سے بچنے یا اسے کم کرنے (کم سے کم) کیا جا سکے۔

حکومت پاکستان نے انکم ٹیکس آرڈیننس 2001 میں سیکشن 6 متعارف کرایا تھا تاکہ ہر غیر مقیم شخص کو ٹیکس نیٹ میں  لایا جا سکے جو آف شور ڈیجیٹل سروسز کے لیے پاکستان کے ذریعہ رائلٹی فیس یا تکنیکی خدمات کی فیس وصول کرتا ہے۔

نیٹ فلکس کی اپیل مسترد:

سندھ ریونیو بورڈ پہلے ہی غیر مقیم افراد سے آف شور خدمات پر ٹیکس لگا رہا تھا لیکن اب ایف بی آر غیر مقیم افراد پر بھی انکم ٹیکس عائد کر رہا ہے۔

ذرائع کا کہنا ہے کہ کمپنی نے اپنے ٹیکس کنسلٹنٹ کے ذریعے اسیسمنٹ آرڈرز کو کمشنر اپیل ایف بی آر کے سامنے چیلنج بھی کیا تاہم کمشنر اپیل نے ایف بی آر کے حق میں فیصلہ دیا۔

بجٹ2024-25:وفاقی بجٹ میں درآمدی موبائل فونز پرٹیکس لگےگا

ویب ڈیسک: آئندہ مالی سال کے وفاقی بجٹ میں درآمدی موبائل فونز پر ٹیکس بڑھانے کی تجویز جبکہ درآمدی لگژری موبائل فونز پر پی ٹی اے ٹیکس بڑھانے کی بھی تجویز کی گئی ہے۔

تفصیلات کے مطابق ذرائع کا کہنا ہے کہ آئندہ مالی سال کے وفاقی بجٹ میں درآمدی موبائل فونز پر ٹیکس بڑھانے کی تجویز دی گئی اور درآمدی موبائل فونز پر فیڈرل ایکسائز ڈیوٹی عائد کرنے کی تجویز ہے جبکہ درآمدی موبائل فونز پر ایف ای ڈی کا مجموعی تخمینہ لگایا جا رہا۔

ذرائع ایف بی آر کاکہنا ہے کہ درآمدی لگژری موبائل فونز پر پی ٹی اے ٹیکس بڑھانے کی بھی تجویز ہےاور درآمدی موبائل فونز پر 25 فیصد تک جی ایس ٹی بھی عائد ہے جبکہ آئندہ فنانس بل درآمدی موبائلز پر جی ایس ٹی مزید بڑھانے کی تجویز ہے۔

پہلے سے 25 فیصد جی ایس ٹی عائد ہونے کے باعث مزید جی ایس ٹی مشکل ہے جبکہ 2 ہزار ارب روپے کے نئے ریونیو اقدامات تاریخ میں پہلی مرتبہ لیے جائیں گے۔

بجٹ 2024-25:آئی ٹی کیلئے 27ارب روپےسے زائدمختص

ویب ڈیسک: آئندہ مالی سال 25-2024 کے لیے آئی ٹی اور ٹیلی کام سیکٹر کے لیے خصوصی اقدامات کا فیصلہ کیا گیا ہے۔آئی ٹی اور ٹیلی کمیونیکیشن کے ترقیاتی بجٹ میں 350 فیصد تک اضافے کی تجویز دی گئی، ٹیکنالوجی کے شعبہ کے لیے 27ارب 43 کروڑ 50 لاکھ روپے مختص کیے گئے۔

تفصیلا ت کے مطابق رواں مالی سال میں آئی ٹی اور ٹیلی کم کے لیے6 ارب روپے مختص ہیں جبکہ نئے مالی سال آئی ٹی کے 15 جاری منصوبوں کے لیے 21 ارب 15 کروڑ کی تجویز دی گئی۔

اس کے علاوہ آئی ٹی کے 15 نئے منصوبوں کے لیے 6 ارب 28 کروڑ 50 لاکھ روپے مختص کیے ہیں جبکہ ٹیکنالوجی پارک ڈیولپمنٹ پراجیکٹ کے لیے 9 ارب 92 کروڑ 57 لاکھ روپے رکھنے کی تجویز دی گئی۔

کراچی میں آئی ٹی پارک کے قیام کے لیے 6 ارب 79 کروڑ مختص کیے گئے جبکہ ڈیجیٹل اکانومی منصوبے کے لیے 3 ارب 50 کروڑ، سائبر سیکیورٹی فار ڈیجیٹل پاکستان منصوبے کے لیے 1 ارب روپے، وفاقی وزارتوں اور محکموں کے اسمارٹ آفس کے منصوبے کے لیے 30 کروڑ روپے کا ترقیاتی بجٹ تجویز کیا گیا ہے۔

بجٹ 2024-25: 7 ہزار اشیاء پر اضافی سیلز ٹیکس عائد کرنے کی تجویز

ویب ڈیسک: آئندہ مالی سال 25-2024 کے لیے وفاقی بجٹ رواں ہفتے پیش کیا جائے گا جس میں ملک کی تاریخ کا سب سے بڑا ٹیکس ہدف رکھا گیا ہے۔

ذرائع کے مطابق آئندہ مالی سال 25-2024 کے لیے پیش ہونے والے وفاقی بجٹ میں پاکستان کی تاریخ کا سب سے بڑا ٹیکس ہدف مقرر کیا گیا ہے اور ٹیکس ہدف میں 3440 ارب روپے کا اضافہ تجویز کیا گیا ہے۔ فیڈرل بورڈ آف ریونیو کیلیے 12 ہزار 900 ارب روپے کا ٹیکس ہدف مقرر کیا جائے گا۔

ذرائع ایف بی آر کے مطابق آئندہ بجٹ میں 2 ہزار ارب روپے اضافی ریونیو حاصل کرنے کیلیے نئے ٹیکسز لگانے، سیلز ٹیکس استثنیٰ ختم کرنے کی تجویز ہے۔ 7 ہزار اشیا پر اضافی سیلز ٹیکس عائد کرنے کی تجویز ہے، جس کے نتیجے میں چینی، چاول، دالیں، دودھ، آٹا، چائے کی پتی، تیل، گھی، بچوں کے ڈائپر سمیت ضرورت زندگی کی ہر چیز مہنگی ہونے کا امکان ہے۔

ذرائع نے بتایا کہ پیٹرولیم مصنوعات پر ابتدائی مراحل میں 6 فیصد سیلز ٹیکس عائد کرنے کی تجویز ہے۔ پیٹرولیم مصنوعات پر 6 فیصد سیلز ٹیکس سے تقریباً 600 ارب روپے ریونیو متوقع ہے جب کہ آئندہ مالی سال کیلیے فنانس بل میں تمام سیلز ٹیکس چھوٹ ختم کرنے کی تجویز بھی تیار کی جا رہی ہے۔

آئندہ بجٹ میں ڈبے میں بند دودھ پر سیلز ٹیکس لگانے کا امکان ہے۔ سیلز ٹیکس استثنیٰ ختم کرنے سے تقریباً 550 ارب روپے اضافی آمدن کا امکان ہے جب کہ اضافی ٹیکس ہدف پورا کرنے کیلیے سیلز ٹیکس شرح مزید ایک فیصد بڑھانے کا بھی امکان ظاہر کیا گیا ہے۔

سیلزٹیکس کی شرح 18 فیصد سے بڑھ کر 19 فیصد تک پہنچ جائے گی اور ذرائع کے مطابق سیلز ٹیکس شرح بڑھنے سے تقریباً 100 ارب روپے اضافی ریونیو متوقع ہے۔

ذرائع نے یہ بھی بتایا کہ سیلز ٹیکس کا ایک فیصد اضافہ مختلف برانڈ کی 7 ہزار مصنوعات پر ہو سکتا ہے۔ کمرشل درآمد کنندگان کیلیے درآمدی ڈیوٹیز ایک فیصد بڑھانے کی تجویز زیرغور ہے جب کہ کمرشل درآمد کنندگان پر ڈیوٹیز کی شرح بڑھانے سے 50 ارب روپے کا تخمینہ لگایا گیا ہے۔

ذرائع ایف بی آر کا کہنا ہے کہ سیلز ٹیکس کی شرح بڑھنے  سےمہنگائی کی شرح آئندہ مالی سال بھی بڑھنے کا خدشہ ہوگا جب کہ آئندہ بجٹ کیلیے تمام ٹیکس تجاویز آئی ایم ایف کے ساتھ شیئر کر دی گئی ہیں۔ بجٹ میں 700 ارب روپے مزید حاصل کرنے کیلیے مختلف تجاویز زیرغور ہیں۔

ذرائع کا کہنا ہے کہ چینی پر سیلز ٹیکس 18 سے 19 فیصد ہونے سے چینی فی کلو 5 روپے تک مہنگی ہونے کا امکان ہے۔ ایک فیصد سیلز ٹیکس بڑھنے سے گھی 5 سے 7 روپے کلو مہنگا، خوردنی تیل بھی 5 سے 7 روپے لیٹر مہنگا، صابن 2 سے 5، شیمپو 15 سے 20 روپے تک مہنگا ہونے کا امکان ہے۔

اسی طرح ایک فیصد سیلز ٹیکس بڑھنے سے ٹوتھ پیسٹ کی قیمت میں 5 سے 7 روپے اضافہ، ٹوتھ برش 5 سے 7 روپے مہنگا، پالش 3 سے 5 روپے اضافے کا امکان ہے۔

سیلز ٹیکس 18 سے 19 فیصد کیے جانے کے بعد مشروبات کی فی لیٹر بوتل 5 سے 7 روپے مہنگی ہونے، لال شربت بھی 5 سے 7، کاربونیٹڈ ڈرنکس بھی 5 سے 7 اور شربت پاؤڈر 5 سے 7 روپے پیکٹ، باتھ روم دھونے کی لیکوڈ بوتل 10 سے 15 روپے مہنگی ہونے کا امکان ہے۔

ایک فیصد سیلز ٹیکس میں اضافہ دہی کو بھی 7 سے 10 روپے مہنگا، پاؤڈر دودھ کو 20 سے 30 روپے فی پیکٹ مہنگا، ’فیٹ ملک‘ 5 سے 7 روپے لیٹر مہنگا کرسکتا ہے۔

اس کے علاوہ الیکٹرانکس، میک اپ، بال رنگنے والی اشیا، کپڑے، مختلف برانڈز کے ملبوسات، چمڑے کی مصنوعات میں بھی اضافہ ہوگا۔

مسالہ جات کے درجنوں آئٹمز مہنگے ہوں گے جب کہ چائے اور قہوہ سمیت درجنوں برانڈ کے بیکنگ آئٹمز، نوڈلز، اسپگیٹی، پاستہ مصنوعات، بچوں کے ناشتے کے درجنوں سیریلز، دلیہ، جام جیلی، مارملیڈ، ٹشو، پیپر نیپ کن، بچوں کے ڈائپر بھی مہنگے ہو سکتے ہیں۔

ذرائع کا کہنا ہے کہ ایک فیصد ٹیکس کے بڑھنے سے برتنوں کی سینکڑوں اشیا مہنگی ہونے کا امکان ہے جب کہ لوشن، کریم، مصنوعی زیورات، پرفیوم، باڈی اسپرے، کیمرہ، اسمارٹ واچ اور گھڑیاں بھی مزید مہنگی ہو سکتی ہیں۔

بجٹ2024-25:سپارکو کیلئے 65 ارب 61 کروڑ 70 لاکھ روپے مختص کرنے کی تجویز

ویب ڈیسک: وفاقی بجٹ کے سلسلے میں مختلف تجاویز سامنے آ رہی ہیں، سپارکو کے لیے 65 ارب 61 کروڑ 70 لاکھ روپے مختص کرنے کی تجویز دی گئی ہے۔

تفصیلات کے مطابق ذرائع کا کہنا ہےکہ آئندہ وفاقی بجٹ میں سپارکو کے لیے ایک نیا منصوبہ شامل کرنے کی تجویز ہے، ڈیپ اسپیس آسٹرونومیکل آبزرویٹریز کے لیے 65 کروڑ روپے مختص کیے جائیں گے۔

سیٹلائٹ سسٹم پاک سیٹ ون کے لیے 59 ارب 18 کروڑ 36 لاکھ روپے، پاک سیٹ 2 کی فیزیبلٹی اینڈ سسٹم ڈیفینیشن اسٹڈی کے لیے 24 کروڑ 80 لاکھ، پاکستان اسپیس سینٹر کے قیام کے لیے 4 ارب 18 کروڑ 53 لاکھ روپے، اور پاکستان آپٹیکل ریموٹ سینسنگ سیٹلائٹ کے لیے ایک ارب 35 کروڑ کے فنڈز مختص کرنے کی تجویز ہے۔

ملک میں اہم فصلوں کی پیداوار بڑھانے کے لیے بھی بجٹ میں فنڈز تجویز کیا گیا ہے، گندم کی پیداوار بڑھانے کے لیے بجٹ میں 14 کروڑ روپے، نئے مالی سال گنے کی پیداوار بڑھانے کے لیے 6 کروڑ روپے، چاول کی پیداوار بڑھانے کے لیے 6 کروڑ روپے رکھنے کی تجویز ہے۔

دالوں کی پیداوار بڑھانے کی تحقیق کے لیے 30 کروڑ روپے، کپاس کی پیداوار بڑھانے کے لیے بجٹ میں 19 کروڑ روپے، اور زیتون کی کاشت کو کمرشل بنیاد پر فروغ دینے کے لیے ایک ارب رکھنے کی تجویز ہے۔

وزارت نیشنل فوڈ سیکیورٹی کا ترقیاتی بجٹ بڑھانے کا فیصلہ

ویب ڈیسک: وزارت نیشنل فوڈ سیکیورٹی کے ترقیاتی بجٹ میں 3 ارب 71 کروڑ روپے اضافے کا فیصلہ کیا گیا ہے۔

ذرائع کے مطابق فوڈ سیکیورٹی کا بجٹ 8 ارب 85 کروڑ سے بڑھ کر 12 ارب 56 کروڑ روپے ہو جائے گا، اگلے مالی سال فوڈ سیکیورٹی کے 13 نئے منصوبوں کے لیے 1 ارب 95 کروڑ روپے مختص کیے گئے ہیں۔

غذائی تحفظ کے 21 پرانے منصوبوں پر 10 ارب 61 کروڑ روپے خرچ ہوں گے، جانوروں میں منہ کُھر کی بیماری پر قابو پانے کے لیے 40 کروڑ رکھے گئے ہیں۔

ذرائع کے مطابق آبی گزرگاہوں کی بہتری کا 47 ارب لاگت کا منصوبہ ہے، اگلے سال کے لیے 4 ارب روپے مختص کیے گئے ہیں، زیتون کی کمرشل بنیادوں پر کاشت کے فروغ کے منصوبے پر ایک ارب خرچ ہوں گے۔

زرعی شعبے میں استعدار کار بڑھانے کے نئے منصوبے پر 70 کروڑ خرچ ہوں گے اور خیبرپختونخوا میں پانی ذخیرہ کرنے کے منصوبے کے لیے 60 کروڑ روپے مختص کیے گئے ہیں۔

شمالی علاقہ جات میں ٹراؤٹ فش فارمنگ کے فروغ کے لیے 20 کروڑ رکھے گئے ہیں جبکہ کپاس کی پیداوار میں بہتری کے نئے منصوبے کے لیے 19 کروڑ روپے مختص کیے گئے ہیں۔

بیجوں کا معیار بہتر بنانے کے ٹریک اینڈ ٹریس سسٹم کے لیے 12 کروڑ 78 لاکھ روپے مختص کیے گئے ہیں۔

آئی ایم ایف کی تجویز مسترد،حکومت کی سابق فاٹا کیلئے ٹیکس چھوٹ کی تجویز تیار

ویب ڈیسک: وفاقی حکومت نے آئی ایم ایف کی تجویز مسترد کر کے سابق فاٹا کیلئے ٹیکس چھوٹ کی تجویز تیار کرلی۔

تفصیلات کے مطابق فیڈرل بورڈ آف ریونیو کے ذرائع کا کہنا ہے کہ آئندہ وفاقی بجٹ میں سابق فاٹا کیلئے ٹیکس چھوٹ دینے کی تجویز ہے، سابق فاٹا کی ڈیولپمنٹ کیلئے درآمدی مشینری پر ٹیکس چھوٹ دی جائے گی۔

ذرائع ایف بی آر کے مطابق سابق فاٹا میں کاروبار، فیکٹریوں پر انکم ٹیکس، سیلز ٹیکس اور ایف ای ڈی چھوٹ ہوگی، سابق فاٹا کیلئے ٹیکس چھوٹ معاشی حالات بہتر نہ ہونے کے باعث دی جائے گی۔

ذرائع کا کہنا ہے کہ سابق فاٹا کیلئے ٹیکس چھوٹ 2023ء کے اختتام پر ختم ہوچکی تھی۔

ذرائع کے مطابق آئی ایم ایف نے سابق فاٹا کیلئے ٹیکس چھوٹ ختم کرنے کی تجویز دی تھی جبکہ حکومت نے سابق فاٹا کو مزید ایک سال کیلئے ٹیکس چھوٹ دینے کی تجویز تیار کی ہے۔

ذرائع ایف بی آر کے مطابق سابق فاٹا کی باؤنڈری پر چیک پوسٹ قائم کیے جانے کی بھی تجویز ہے، چیک پوسٹوں کے قیام سے ٹیکس فری مشینری ملک کے باقی حصوں میں نہیں لائی جاسکے گی۔

بجٹ میں صحت کےشعبےکیلئے کتنے فنڈزمختص کیے گئے؟تفصیلات سامنے آگئیں

ویب ڈیسک: وفاقی حکومت نئے بجٹ میں صحت کے شعبے میں کیا کرنا چاہتی ہے،تفصیلات سامنے آگئیں۔

تفصیلات کے مطابق  وزارت صحت کے 64 منصوبوں کیلئے 8 ارب 92 کروڑ روپے کے فنڈز مختص کرنے کی تجویز دی گئی ہے جبکہ نئے بجٹ میں وزارت صحت کے 32 جاری منصوبے ترقیاتی پروگرام میں شامل کرلئے گئے۔

ذرائع کا کہنا ہے کہ نئے بجٹ میں جاری منصوبوں کیلئے 5 ارب 56 کروڑ روپے مختص کرنیکی تجویز دی گئی ہے جبکہ بجٹ میں وزارت صحت کے 30 نئے منصوبوں کیلئے 3 ارب 35 کروڑ روپے مختص ہوں گے اور صحت سہولت کارڈ پروگرام کیلئے 20 کروڑ روپے کے فنڈز مختص کیے گئے ہیں۔

آزاد کشمیراور جی بی کے کینسر کے مریضوں کے علاج معالجے کے پروگرام کو بند کردیا گیا جبکہ آزاد کشمیر میں اندھا پن کی روک تھام کے جاری منصوبے کو بھی بند کردیا گیا ہے اور محکمہ صحت میں ڈرگ کنٹرول سیکشن کو مضبوط بنانے کے 33کروڑ روپےکا نیا منصوبہ بجٹ میں شامل کیا گیا اور بجٹ میں 35 ارب روپے کے وزیراعظم کے قومی پروگرام برائے ہیپاٹائٹس پروگرام شامل کرلیاگیا۔

ذرائع کا کہنا ہے کہ نئے مالی سال کے بجٹ میں پروگرام کیلئے 20 کروڑ روپے مختص کردئیے گئے،اسلام آباد میں کینسر ہسپتال کے قیام کیلئے الات کی خریداری کیلئے ساڑھے 7 ارب روپے کا منصوبہ بجٹ میں شامل کیا گیا جبکہ وزیراعظم کے قومی پروگرام برائے انسدادا زیابیطس بھی نئے بجٹ میں شامل ہے اور منصوبے کی مالیت کا تخمینہ  5 ارب روپے لگایاگیا ہے۔

بجٹ2024-25:آئی ایم ایف کاسیلزٹیکس دوگنا، ہر طرح کا ٹیکس استثناءختم کرنےکامطالبہ

ویب ڈیسک: آئی ایم ایف کا ٹیکس ہدف 12 ہزار 900 ارب روپے مقرر کرنے کے مطالبے کا معاملہ،آئندہ مالی سال ایف بی آر کو 3 ہزار 490 ارب روپے کی زائد ٹیکس وصولی کرنا ہو گی۔

تفصیلات کے مطابق  ذرائع کا کہنا ہے کہ آئی ایم ایف نے انکم ٹیکس جمع کروانے والوں کی تعداد دگنا کرنے کا مطالبہ کیا ہے۔انکم ٹیکس گوشوارے جمع کروانے والے 30 لاکھ تعداد کو بڑھا کر 60 لاکھ کیجائے،آئی ایم ایف نے  تاجروں کو ہر صورت انکم ٹیکس نیٹ میں لانے کا مطالبہ کیا ہے۔

ذرائع  کا کہنا ہے کہ آئندہ سال کا ٹیکس ہدف حاصل کرنے کیلئے ہر طرح کا ٹیکس استثناء ختم کرنے کا فیصلہ کیا گیا ہے جبکہ زرعی اشیاء بیجوں کھاد ٹریکٹر اور دیگر آلات پر مکمل سیلز ٹیکس عائد کیا جائے گا اور خوراک ، ادویات ، سٹیشننری پر 10 فیصد سیلز ٹیکس عائد کرنے کی تجویز دی گئی ہے۔

ذرائع  کا کہناہے کہ ٹیکس ہدف حاصل ہونے میں مشکلات کی صورت میں سیلز ٹیکس کی شرح ایک سے 2 فیصد بڑھانے کی تجویز کی گئی ہے۔

خیبرپختونخوابجٹ 2024-25:پنشنرزکیلئے10فیصداضافہ،صحت کارڈکیلئے34ارب مختص

ویب ڈیسک:خیبرپختونخوا حکومت 1754ارب سے زائد کا سالانہ بجٹ 25 -2024 کی پیش کرنے جا رہی ہے جس میں احساس روزگارکیلئے12ارب،تعلیم کیلئے362ارب،صحت کیلئے232ارب اور صحت کارڈ کیلئے34 ارب مختص کیے گئے ہیں۔

تفصیلات کے مطابق  خیبرپختونخوا کا آئندہ مالی سال کا بجٹ کچھ دیر میں پیش کیا جائے گا،خیبر پختونخوا کے بجٹ کا کل حجم 1754 ارب روپے ہے،ملازمین کی تنخواہوں اور پنشن میں 10 فیصد اضافہ کی تجویز ہے۔جبکہ کم سے کم ماہانہ اجرت 32 سے بڑھا کہ 36 ہزار روپےکرنے کی تجویز ہے۔
تعلیم کیلئے 362 ارب 68 کروڑ، صحت کیلئے 232 ارب روپےمختص  ہیں جبکہ صحت سہولت کارڈ کیلئے 34 ارب،بی آر ٹی سبسڈی کیلئے 3 ارب مختص ہیں۔
خیبرپختونخوا حکومت نے بھی ایئرایمبولینس سروس شروع کرنے کا فیصلہ کرلیا اور احساس روزگار، نوجوان پروگرام، ہنر پروگرام کے تحت ایک لاکھ روزگار ، 12 ارب مختص جبکہ امن و امان کیلئے 140 ارب 62 کروڑ، سیاحت کیلئے 9 ارب 66 کروڑ روپےمختص  ہیں اور زراعت کیلئے 28 ارب 93 کروڑ، توانائی کیلئے 31 ارب 54 کروڑ روپے مختص ہیں۔