کابل:افعان طالبان نے لڑکیوں کے سیکنڈری سکول کھولنے سے متعلق جلد اچھی خبر سنانے کا اعلان کردیا۔ غیر ملکی خبر رساں ایجنسی کو دیئےگئے ایک انٹرویو میں افغان وزیر داخلہ سراج الدین حقانی نے یہ بتایا کہ لڑکیوں کے سیکنڈری اسکول کھولنے کے بارے میں اچھی خبر کا جلد اعلان کرینگے، انہوں نے کہا کہ ہم میں ایسا کوئی نہیں جو خواتین کی تعلیم کے خلاف ہو۔ سراج الدین حقانی کا مزید کہنا تھا کہ لڑکیوں کی اعلیٰ تعلیم کے حصول کے لیے درس گاہوں میں لباس افغان ثقافت اور اسلامی قوانین اور اصولوں کے مطابق ہی ہوگا۔اس سے پہلے اسی سال مارچ کے مہینے میں طالبان نے اسکول، کالجز کھولنے کے چند ہی گھنٹوں کے بعد بند کروادیئے تھے۔ خیال رہے کہ اقتدار پر کنٹرول حاصل کرنے کے بعد طالبان نے خواتین سے کہا تھا کہ وہ حجاب لیں جس میں سر کو ڈھانپا جاتا ہے جبکہ چہرے کو کھلا رکھا جا سکتا ہے۔ البتہ مئی کے مہینےکے آغاز پر طالبان کی طرف سے خواتین کو مکمل برقع اوڑھنے کی ہدایت کی گئی۔