لاہور: گورنر پنجاب سرفراز چیمہ نے وزیر اعلی پنجاب عثمان بزدار کے استعفے کو غیر آئینی قرار دیدیا ۔ نجی ٹی وی کے پروگرام میں گفتگو کرتے ہوئے گورنر پنجاب سرفراز چیمہ نے کہا کہ وزیر اعلی پنجاب عثمان بزدار کا استعفیٰ غیرآئینی تھا کیونکہ استعفےمیں قانونی تقاضے پورے نہیں کیے گئے تھے۔ گورنرپنجاب نے کہا کہ وزیر اعلی نے استعفیٰ گورنر کو دینا ہوتا ہے لیکن انہوں نے وزیراعظم کودیا۔ان کا کہنا تھا کہ آئینی ماہرین سے عثمان بزدار کے استعفے پر رائے مانگی ہے، میں کسی غیرآئینی کام کی توثیق نہیں کروں گا جو عہد لیا ہے اس کی پاسداری کروں گا۔ سرفراز چیمہ کا مزید کہنا تھا کہ اسپیکر اور ایڈووکیٹ جنرل سے پنجاب اسمبلی کے واقعے پر رپورٹ مانگی ہے، ایڈووکیٹ جنرل کی رپورٹ پرآئندہ کےلائحہ عمل کااعلان کریں گے۔ گورنر پنجاب نے مزید کہا کہ ابھی تک کابینہ تشکیل نہیں دی گئی ،شہبازشریف اپنی کرپشن کےثبوت ہٹانےکیلئےاقتدارمیں آئے۔