ویب ڈیسک: مشرقِ وسطیٰ میں کشیدگی کے تناظر میں سعودی عرب اور متحدہ عرب امارات میں امریکی تنصیبات کو مبینہ طور پر ڈرون حملوں کا نشانہ بنائے جانے کی اطلاعات سامنے آئی ہیں۔
میڈیا رپورٹس کے مطابق ریاض میں واقع ایک عمارت، جسے سی آئی اے کے مرکز کے طور پر بیان کیا جا رہا ہے، کو مشتبہ ڈرون حملے میں نقصان پہنچا۔ ذرائع کا کہنا ہے کہ حملے کے نتیجے میں عمارت کی چھت کو جزوی نقصان ہوا۔ تاہم فوری طور پر یہ واضح نہیں ہو سکا کہ واقعے میں کوئی اہلکار ہلاک یا زخمی ہوا ہے یا نہیں۔
برطانوی میڈیا رپورٹس میں دعویٰ کیا گیا ہے کہ امریکی خفیہ ادارے کی جانب سے ماضی میں ایران کی اعلیٰ قیادت سے متعلق اہداف کا تعین کیا گیا تھا، تاہم ان دعوؤں کی آزاد ذرائع سے تصدیق نہیں ہو سکی۔
رپورٹس کے مطابق یہ پیش رفت ایسے وقت میں سامنے آئی ہے جب خطے میں ایران اور امریکا کے درمیان کشیدگی میں اضافہ دیکھا جا رہا ہے۔ بعض اطلاعات میں یہ بھی کہا گیا ہے کہ امریکی ادارے ایران کے اندر حکومت مخالف عناصر سے رابطوں میں مصروف رہے ہیں، تاہم ان دعوؤں پر بھی سرکاری سطح پر کوئی باضابطہ مؤقف سامنے نہیں آیا۔
دوسری جانب دبئی میں واقع امریکی قونصل خانے کی عمارت کے قریب بھی ڈرون حملے کی اطلاع ملی، جس کے بعد عمارت میں آگ بھڑک اٹھی۔ ہنگامی امدادی ٹیموں نے بروقت کارروائی کرتے ہوئے آگ پر قابو پا لیا۔
BREAKING:
— Globe Eye News (@GlobeEyeNews) March 3, 2026
Iranian drone strikes US consulate in Dubai. pic.twitter.com/IrvTuT33Ep
حکام کے مطابق دھماکے کی آواز دور تک سنی گئی، تاہم واقعے میں کسی جانی نقصان کی اطلاع نہیں ملی اور صورتحال کو مکمل طور پر قابو میں قرار دیا گیا ہے۔
تاحال امریکا، سعودی عرب، متحدہ عرب امارات یا ایران کی جانب سے ان واقعات پر باضابطہ اور تفصیلی بیان جاری نہیں کیا گیا۔