ویب ڈیسک :امریکی صدارتی انتخاب کے نتائج سامنے آچکے ہیں اور ڈونلڈ ٹرمپ ایک بار پھر وائٹ ہاؤس میں اپنے قدم رکھنے میں کامیاب ہو گئے ہیں۔ ڈونلڈ ٹرمپ کی کامیابی سے ایلون مسک سمیت ارب پتیوں کی دولت میں راتوں رات اضافہ ۔
رپورٹ کے مطابق جن امریکی ارب پتیوں کی دولت میں اضافہ دیکھا گیا ہے ان میں جیف بیزوس، لیری ایلیسن، وارین بفیٹ، لیری پیج، سرگی برین، جین سین ہُوانگ، مائیکل ڈیل، اسٹیو بالمبر، بل گیٹس شامل ہیں۔ بلومبرگ بلینیئر انڈیکس کے مطابق ایلن مسک کی دولت ایک ہی دن میں 26.5 ارب ڈالر بڑھ گئی ہے۔
جبکہ لیری ایلیسن کی دولت میں 9.88 ارب ڈالر کا اضافہ ہوا ہے۔ وہیں وارین بفیٹ کی دولت 7.88 ارب ڈالر جبکہ لیری پیج کی 5.53 ارب ڈالر بڑھی ہے۔ سرگی برین نے 5٫17 ارب ڈالر تو جین سین ہُوانگ نے 4.86 ارب ڈالر کی کمائی کی ہے۔ اس کے علاوہ مائیکل ڈیل، اسٹیو بالمبر، بل گیٹس کی دولت میں بھی 1.82 ارب ڈالر سے لے کر 3.31 ارب ڈالر تک کا اضافہ ہوا ہے۔
ٹرمپ کی جیت کا مسک کو کافی فائدہ ہوا ہے اور ان کی دولت ایک ہی دن میں 26.5 ارب ڈالر کی چھلانگ لگا کر 290 ارب ڈالر تک پہنچ گئی ہے۔ اگر یہ تیزی آج یعنی جمعرات کو بھی جاری رہتی ہے تو مسک کی دولت 300 ارب ڈالر کے کلب میں شامل ہو جائے گی۔ بدھ کو ان کی کمپنی ٹیسلا کے شیئر میں 14.75 فیصد کا اضافہ دیکھا گیا۔