ڈیموکریٹس کی حمایت کی تو سنگین نتائج کیلئے تیار رہو:ڈونلڈ ٹرمپ

ویب ڈیسک: سابق امریکی صدر ڈونلڈ ٹرمپ نے ارب پتی تاجر ایلون مسک کو خبردار کیا ہے کہ اگر وہ آئندہ انتخابات میں ڈیموکریٹس کی حمایت کرتے ہیں تو اس کے " سنگین نتائج" سامنے آ سکتے ہیں۔

تفصیلات کے مطابق ایک انٹرویو کے دوران ٹرمپ نے واضح کیا کہ ان کا مسک سے تعلق اب ختم ہو چکا ہے، اور مستقبل میں اس تعلق کی بحالی کا بھی کوئی امکان نہیں۔ انہوں نے اس بات پر بھی زور دیا کہ مسک کو ماضی میں سرکاری سطح پر مختلف رعایتیں اور فوائد دیے گئے، لیکن اب وہ کسی قسم کی مزید بات چیت کے لیے تیار نہیں۔

یہ بیانات ایک ایسے وقت پر سامنے آئے ہیں جب ایلون مسک نے سوشل میڈیا پر صدر ٹرمپ کو متنازعہ شخصیت جیفری ایپسٹین سے جوڑنے والی ایک پوسٹ حذف کر دی تھی، جس نے دونوں شخصیات کے درمیان تعلقات کو مزید کشیدہ کر دیا۔

ٹرمپ نے مزید کہا کہ اگر مسک مستقبل میں ڈیموکریٹ پارٹی کی حمایت کرتے ہیں، خاص طور پر 2026 کے وسط مدتی انتخابات میں، تو ان کی کمپنیوں کو حکومتی معاہدوں اور مراعات میں مشکلات کا سامنا ہو سکتا ہے۔ اگرچہ انہوں نے کسی مخصوص کارروائی کی تفصیل فراہم نہیں کی، تاہم ان کا اشارہ ممکنہ سرکاری ردعمل کی طرف تھا۔

ایلون مسک کی جانب سے اس معاملے پر تاحال کوئی باقاعدہ ردعمل سامنے نہیں آیا۔